PALABURU 24
24
Porongo i Saki
24:1-67
1I Burahima matuʼamo mpodago, paikanya tongawa kojo pangadonco i mPue katuwunya. 2Ri anu sandeme natoʼo i Burahima ri anamayununya anu tukaka mpodago, anu mampasilolongani pura-pura aga-aganya, “Dikamo palemu ri puʼu mpaʼaku. 3Pontandokoromo mamposabi toʼo i mPue, Pue Ala tumpu yangi pai lino, kasikonya bareʼe da mampepali rongo anaku i Saki ungka ri oyo waʼa ntau anu ri tana Kanaʼa seʼi. 4Siko sangaya-ngaya da mewalili ri tana mpebete ntanoanaku da mampepalika siʼa rongonya ungka ri oyo waʼa ngkasangkompoku.”
5Nepa meoasi anamayunu setu ri siʼa natoʼo, “Paikanya ewambeʼi ane rapanya anaweʼa setu bareʼe napokono mampalaika ine pai papanya, bareʼe napokono malulu yaku maʼi ri tana seʼi? Bara da anami anu da kukeni njoʼu ri tana mpebete ntanoanami?”
6Paikanya mesono i Burahima natoʼo, “Jaga kojo! Neʼe boi nukeni anaku njoʼu njairia! 7I Pue Ala anu mangkuasai yangi anu mangkenimo yaku ungka ri banua mpapaku pai ungka ri tana waʼa ntinaku, pai Sira roo montandokoro ri yaku da mangawai tana seʼi ri waʼa muliku. Sira da mangampokau malaekaa da mantulungi siko da naka nurata weʼa anu da naporongo anaku ungka njairia. 8Paikanya ane bareʼe napokono anaweʼa setu malulu siko, bareʼemo da nakoni tandokoromu seʼi siko. Paikanya mau bara ewambeʼi ntano neʼe boi nukeni anaku njoʼu njairia.” 9Ungka lairia nadika anamayunu setu palenya ri puʼu mpaʼa mpuenya i Burahima nepa montandokoro siʼa da mangawianaka nunjaa anu naperapi i Burahima setu.
10Natima anamayunu setu sampuyu unta nepa naʼulayaka mpengaya-ngaya mparewa mpuenya anu masuli nepa malai siʼa njoʼu ri kota kareʼe mpeari i Nahori ntongo tuwupa siʼa; ri tondo utara Mesopotamia kareʼenya. 11Karatanya njairia, napapeʼonto waʼa untanya setu napapeosa mosu ri tibubu ri sambaliku ngkota. Laukamo reme, jelamo waʼa mbeʼa maʼi monombu ri tibubu setu. 12Mekakai anamayunu setu natoʼo, “Pue, Pue Ala mpueku i Burahima, nditulungi da naka mowua tetalaku ri sandeme seʼi; ndipokapurumo pueku i Burahima. 13Ndipeole yaku mekakore ri sori ntibubu seʼi. Sakodipa tempo da jelamo waʼa anaweʼa ungka ri kota maʼi mantombu ue. 14Yaku da mompau ri sambaʼa anaweʼa ungka ri oyo ntau seʼe, da kutoʼo, ‘turubaka gumba mponombumu setu waikaku ue da kuinu. Ane mesono siʼa natoʼo ndipanginumo, pai waʼa untami woʼu da kupapanginu!’ siʼamo anu ndipilisi i mPue tila anamayunumi i Saki. Ane ewanceʼe pewalinya, manotomo ri rayaku ewambeʼi kapuru ndaya i mPue ri pueku i Burahima.”
15-16Sindara mpekakainya setu, ratamo ri tibubu setu i Ribeka sambaʼa anaweʼa anu madolidi pai mangurapa mampasaʼa gumba mponombu. Siʼa ana i Betueli, pai anu mampoana i Betueli inceʼemo i Nahori pai Milika; i Nahori setu tukaka i Burahima. I Ribeka njoʼu ri tibubu setu mabangani gumbanya, nepa da mewalili muni. 17Molonco anamayunu i Burahima setu mantimosuki anaweʼa setu nepa natoʼo, “Merapi tulungi yaku ana, waikaku ue da kuinu ungka ri gumbamu setu.”
18Mesono anaweʼa setu natoʼo, “Ndipanginumo papa,” ganggara naturubaka gumba ungka ri awaanya, napapanginumo anamayunu setu ungka ri gumbanya. 19Roo manginu anamayunu setu; natoʼo anaweʼa setu, “Yaku da mangantombu ue da ndapapanginuka waʼa untami, da naka osa karanganganya pura-pura pinatuwu setu.” 20Ungka lairia maliga-liga natawa ue ri gumbanya setu ri tampa mpanginu unta, nepa molonco woʼu njoʼu natombu ue ri tibubu da naka gana nainu waʼa mpinatuwu setu. 21Sindara setu anamayunu i Burahima mampatomata mpaliu paikanya bareʼe mompau siʼa mau sapiu. Da rayanya mangaincani bara i Pue da mampapowua potetalanya bara bareʼe.
22Butu puramo manginu waʼa unta setu pai osamo karanganganya, natima anamayunu i Burahima setu jali wuyawa anu masuli napatakaka ri engo anaweʼa setu. Pai napatakaka toga wuyawa ri palenya mpotimali-mali. 23Nepa natoʼo anamayunu setu, “Koisa toʼo kaku isema papamu. Pai bara da reʼe tampa ngkasambengiku pai yunuku ri banuanya?”
24Mesono anaweʼa setu natoʼo, “Papaku i Betueli, ana i Nahori pai Milika. 25Ri banua mami reʼe tampa ngkasambengimi pai maria woʼu deami anu da nakoni mpinatuwu.”
26Inceʼe painaka mombukotu manyomba ri mPue anamayunu setu. 27Natoʼo, “Teundemo i Pue, Pue Ala mpueku i Burahima. Sira anu mawawanaka yaku painaka liu momberata pai waʼa ntinaa.”
28Ungka lairia molonco anaweʼa setu ndeku ri banua inenya, mampau waʼa anu mewali setu. 29-30I Ribeka reʼe sambaʼa tukakanya anu tuama toʼonya i Laba. Nadonge pampau ntuaʼinya kono anamayunu setu. Nakita woʼu jali wuyawa ri engo ntuaʼinya pai toga wuyawa ri pale ntuaʼinya setu. Inceʼe painaka molonco i Laba ungka ri banua setu njoʼu mampomberataka anamayunu i Burahima setu anu ntongo njaupa mekakakore sangkani-ngkani pai untanya mosu ri tibubu. 31Nepa natoʼo i Laba, “Komi tau anu ndadonco i mPue! Neʼe maroo-roo ri sambalikunya seʼi. Ndikaliga maʼi ri banua mami. Roomo kapatoka lincu da kareʼemi ewanceʼe seʼe da kareʼe waʼa untami.”
32Melulumo anamayunu setu rantani mesua ri raya banua. Nataunaka i Laba ulaya waʼa unta setu, nepa nawaika pangkoni waʼa mpinatuwu setu. Roo setu nakenika anamayunu i Burahima sangkani pai waʼa ntaunya ue ndawusoʼika witi ntau seʼe. 33Ri katokamo mpangkoni pai ndasalemo da mangkoni, mompaumo anamayunu setu natoʼo, “Yaku bareʼepa da mangkoni ane bareʼepa kuparata patuu anu kukeni.”
Natoʼo i Laba, “Nditoʼomo patuu seʼe.”
34Natepuʼumo anamayunu setu i Burahima mompau, natoʼo, “Yaku seʼi anamayunu i Burahima. 35Maʼai kojo pangadonco i mPue pueku seʼe painaka maʼai kojo kakoreʼea. Ndawai i mPue ri sira waʼa bimba, mbula, japi, unta, kalide, ewanceʼe seʼe salaka, wuyawa, sangkani pai waʼa anamayunu tuama pai weʼa. 36Matuʼamo sira nepa moana rongoa i Sara sambaʼa ana tuama, pai anaa setumo anu mewali tumpu mpanta ri pura-pura aga-agaa setu. 37Sira mampokau yaku mojanji ri pontandokoro da naka mepoʼinaya ri songkaa. Ndatoʼo, ‘Neʼe boi nupilisika anaku rongonya ungka ri oyo anaweʼa ri tana Kanaʼa seʼi, 38paikanya da nupepalika ungka ri tina ngkasangkompo mpapaku. Mewali palaimo njoʼu maliga-liga njoʼu njairia.’ 39Nepa meoasi yaku ri sira kutoʼo, ‘Paikanya ewambeʼi ane rapanya anaweʼa setu bareʼe napokono malulu yaku?’ 40Mesono sira ndatoʼo, ‘I Pue anu pepoʼinayaku, da mampokau malaekaa da mangantulungi siko da naka kobangani pelinjamu. Siko da mangarata rongo anaku ungka ri oyo ntinaku ngkalioku, inceʼemo ungka ri tina ngkasangkompo mpapaku. 41Podo ane rapanya bareʼe nasabeka ntau seʼe, bareʼemo da nakoni tandokoromu siko.’
42Pai ri karataku ri tibubu ngena, kumekakai ri rayaku, kutoʼo, ‘Pue, Pue Ala mpueku i Burahima, ndipapowua pelinjaku seʼi. 43Yaku da mekakore mpaliu ri sori ntibubu seʼi. Ane reʼe anaweʼa maʼi mantombu ue, da kuperapi ri siʼa ue da kuinu. 44Ane napokono mawianaka inceʼe, pai napapanginu woʼu waʼa untaku, manoto siʼa anu ndapilisi i mPue da mewali rongo ana mpueku setu.’ 45Bareʼepa pusa pekakaiku ri rayaku setu, jelamo i Ribeka mampasaʼa gumba mponombu setu mantombu ue ri tibubu. Ungka lairia kumompau ri siʼa kutoʼo, ‘Merapi tulungi yaku waikaku uemu da kuinu.’ 46Ganggara kojo napanturubaka gumbanya setu ungka ri awaanya, nepa natoʼo, ‘Ndipanginumo, pai waʼa untami woʼu da kupapanginu.’ Nepa kumanginu, roo setu waʼa untaku woʼu napapanginu. 47Roo setu meoasi yaku kutoʼo, ‘Isema papamu?’ Mesono siʼa natoʼo, ‘Papaku i Betueli, ana i Nahori pai Milika.’ Inceʼe painaka kupatakaka siʼa jali wuyawa ri engonya pai toga ri palenya mpotimali-mali. 48Mombukotu yaku manyomba pai maunde i Pue, Pue Ala mpueku i Burahima. Sira anu mawawanakamo yaku rata ireʼi, ri oyo waʼa ntina mpueku, painaka kukoto mampomberataka anaweʼa anu da naporongo anaa. 49Mewali seʼi-seʼi, ane ndisabe mpodago tinako ndaya mpueku seʼe ua lawi sira kasangkompomi da mabuya rayami mabangani, mbolimo da nditoʼoka yaku, pai ane bareʼe mabuya rayami nditoʼo woʼu, da naka kuincani nunjaa anu da kupowia.”
50Mesono i Laba pai Betueli, “Ua anu mewali seʼi ungka ri Pue puʼunya, kami bareʼe sintinaja da mawai botusinya. 51Seʼi i Ribeka; mbolimo na palulu komi da mewali rongo ana mpuemi, silulu pai pantoʼo i mPue ngkalioa.” 52Butu nadonge anamayunu i Burahima pau ntau seʼe, metutu siʼa manyomba ri Pue. 53Nepa napapesuwu waʼa rengko, parewa salaka pai wuyawa, nawaika i Ribeka pura-pura. Ewanceʼe seʼe tukakanya pai inenya nawaika woʼu waʼa mparewa anu masuli olinya.
54Roo setu nepa mangkoni anamayunu i Burahima setu sangkani pai waʼa ntaunya pai sambengimo njairia. Bangke reme membangu tau seʼe mawuro-wuro, natoʼo anamayunu setu, “Da metompamo yaku da mewalili ri pueku.”
55Paikanya natoʼo ntukaka pai ine i Ribeka, “Mbolimo i Ribeka da maroo-roo pai kami kambanya tesaminggu bara sampuyu eo waseʼi, ane roo inceʼe mayamo siʼa malai.”
56Paikanya mesono anamayunu setu natoʼo, “Neʼemo nditaʼamaka yaku, i Pue mangabanganimo pelinjaku; ndiwaimo naka mewalili yaku ri pueku.”
57Mesono tau seʼe natoʼo, “Moruana tapeboo i Ribeka da tapampeoasi parata ndayanya.” 58Nepa napeboo ntau seʼe i Ribeka, napeoasi, “Bara nupokono da malulu tau seʼi?”
Mesono anaweʼa setu natoʼo, “Io, kupokono.”
59-60Ungka lairia napapoiwomo ntau seʼe i Ribeka sangkani pai topeporewunya malai sangkani-ngkani pai anamayunu i Burahima pai waʼa ntaunya. Nepa nadonco ntau seʼe i Ribeka pai pau anu ewaseʼi,
“Mbolimo siko Ribeka da mewali ine ntau anu mojuta-juta!
Mbolimo waʼa mulimu da mampapeʼuru waʼa ngkota!”
61Ungkaliria mompatikalimo i Ribeka sangkani pai waʼa mbeʼa anu mangurapa anu da mewali anamayununya, melamba ri unta nepa malai malulu anamayunu i Burahima setu.
62Sindara setu i Saki mewalilimo ungka ri pada bone, moliu siʼa ri tibubu anu ndapapotoʼo, “Sira Anu Mampetiro Yaku” pai maroo-roo siʼa ri tondo selata ntana Kanaʼa. 63Ri anu sangkani lauka reme, mesuwu siʼa ungka ri kemanya melinja-linja ri bonde, nepa nakita kamaʼi waʼa unta setu natotoka kareʼenya. 64Pangkita i Ribeka i Saki, menaʼu siʼa ungka ri wawo untanya, 65nepa meoasi siʼa ri anamayunu i Burahima setu natoʼo, “Isema tuama anu njau ri bonde anu maʼi madadu kita setu?”
Mesono anamayunu setu natoʼo, “Siramo pueku.” Nepa natima i Ribeka tabobonya nasiluka lionya.
66Ungka lairia napaumo anamayunu setu ri Saki nunjaa anu roo nawianaka. 67Roo setu nakenimo i Saki i Ribeka mesua ri raya ngkema inenya i Sara naporongomo i Ribeka. Napotowe kojo i Saki i Ribeka; painaka lindomo raya i Saki ua mampomapari ndaya kamate inenya.
Currently Selected:
PALABURU 24: LAIPMF
Highlight
Share
Copy
Want to have your highlights saved across all your devices? Sign up or sign in
