Joh. 19

1Lepa alanangan Jesus si Pilatus, kaunangan rabobo nia. 2Tikairangan kirit rui tai saladdu, kaurangan nia ka utenia. Leppeiakerangan ka tubunia leppei simabonan, 3lepa oi sia ka matania, kuarangan, “Salam, rimatada tai Jahudi!” Lepa lippatrangan nia. 4Bela minca si Pilatus, kuanangan ka matda, “Itco kam, kuambit nia ka matamui, bule nuseseake kam ta anai beri sara akusese jonia.” 5Lepa bela Jesus sibara kirit rui samba leppei simabonan. Kuanangan si Pilatus ka matada, “Itco kam sirimatua nene!”

6Kele araitco nia tai imam sabeu samba sapaguguletda, pugereirangan, “Siliktengaake nia!”

Kuanangan ka matada si Pilatus, “Alaan kam nia, siliktengaake kam nia; aipoi kaku ta anai akusese jonia.”

7Alegirangan nia tai Jahudi, “Siripot surukatmai, buita tumateiake le nia, aikau poi tubunia Togat Taikamanua.”

8Kele aiarep tiboiet nene si Pilatus, memei maloloto nia, 9guru nia minca ka purapanan, kuanangan ka matat Jesus, “Kaipa anubara?” Tapoi ta aialegi Jesus. 10Kuanangan ka matania si Pilatus, “Ta noba nupatiboake aku? Ta nuagai, ai gegeku kubelaake ekeu, samba ai gegeku kusiliktengaake ekeu?”

11Aleginangan nia Jesus, “Ta anai gegem ka tubuku, ke ta tuake kekeu gege sibara ka pata. Ia te lulunia sipasisesegeake aku kekeu, nia pei le abeu jo.”

12Teret nenda besiakenangan si Pilatus masibelaake Jesus. Tapoi mugerei le tai Jahudi kuarangan, “Ke nubelaake nia, ta mususuruak ekeu kai Kaisar. Kasei sikau tubunia rimata, sisaggangi Kaisar le nia.”

13Kele aiarep tiboiet nene si Pilatus, belaakenangan Jesus, ia geti puuddetnangan ka uddenan pasiukuman sipuoni bagat lalep bukku; ka ngangan Ibrani onininia Gabbata.

14Gogoi nenda ia te panarengan Paska, malegere bobo pulu rua tugge. Kuanangan ka matada tai Jahudi si Pilatus, “Itco kam rimatamui!”

15Pugereirangan, “Areuake nia! Siliktengaake nia!” Kuanangan ka matada si Pilatus, “Kusiliktengaake rimatamui?”

Alegiranngan nia tai imam sabeu, “Ta anai bagei rimatamai, Kaisar le!” 16aIa geti segeakenangan Jesus si Pilatus ka tubuda rapattake nia ka siliktenga.

Katusiliktengaat Jesus

(Mat. 27:32-44; Mrk. 15:21-32; Luk. 23:26-43)

16bAlarangan Jesus, ambitrangan nia ratuitui. 17Bairatnangan ailiktengania Jesus mei ka kudduat sipuoni leleu Lakkupat, ka nganganda tai Ibrani: Golgota. 18Sedda te rasiliktengaake nia samba rua sabagei, patsila tubunia, Jesus geti ka talaga. 19Suratnakenangan sara surat si Pilatus, ottotnakenangan nia ka siliktenga, kise ngangania, “Jesus tai Natsaret, Rimatada tai Jahudi.” 20Maigi sia tai Jahudi sibasa surat nene, aipoi ka kudduat pasisiliktengaat Jesus malegere ka kota samba tusuratnake kagangan Ibrani, ngangan Latin samba ngangan Grika. 21Kuarangan tai imam sabeura tai Jahudi ka matat Pilatus, “Ba susuratnake, ‘Rimatada tai Jahudi’, tapoi sikuania le, ‘Aku te Rimatada tai Jahudi.’ ”

22Aleginangan nia si Pilatus, “Sinuratnakenenku, akusuratnakean.”

23Sia tai saladdu, lepa arasiliktengaake Jesus, alarangan bibilet tubunia, rubeirangan nia epat ngarubeiat, senen saladdu sangarubeiat; leppeinia leu raala. Leppei nene taisusuilangen le, sigalai le barania ka pata aili ka epe. 24#Psalm. 22:19 Patiborangan pasasambada, “Tatabibiritnake nene, tapauktukngake le nia, kasei sibakkati nia.” Ia te ipuaili sitususurat ka Surat Sipunenan,

“Rarubei le bibilet tubuku,

pauktuk le sia kalulut leppeiku.”

Ia te aragalaiake tai saladdu.

25Tapoi ai le muririo ka bebet siliktengan Jesus inania, sarainan inania, si Maria sinanalep Kleopas samba si Maria Magdalena. 26Kele aiitco inania Jesus samba sipasiului kilibet bagania murio ka bebenia kuanangan ka matat inania, “Ina, ia te togam!” 27Lepa kuanangan ka matat sipasiuluinia, “Ia te inam!” Ka teteret nenda, alanangan nia sipasiului ka lalepnia.

Kamateiat Jesus

(Mat. 27:45-56; Mrk. 15:33-41; Luk. 23:44-49)

28 # Psalm. 69:22, 22:16 Pasat nene, kele aiagai Jesus atulelean sangamberinia, samba bule ipuaili sinibooi Surat Sipunenan, kuanangan, “Maoggouan aku.”

29Sedda ai sara kudduat suat anggur simalaga. Somakerangan romon ka anggur simalaga nenda, kokkokngakerangan nia ka buttet manggea, kaurangan nia ka ngungun Jesus. 30Lepa ailo anggur simalaga Jesus, kuanangan, “Atulettungan!”

Lukkukngakenangan utenia, sege isegeake engania.

Rapunu usut Jesus

31Kalulut panarengan poi gogoi nenda, samba bui ikuddu tubuda ka siliktenga ipot gogoi Sabat – bulat abeu poi Sabat nene – tiddourangan kai Pilatus tai Jahudi bule rabakbakngake rereda siniliktengaakenen, samba ragorosoynake tubuda. 32Ia geti oi sia tai saladdu, bakbakngakerangan reret siboiki samba reret nenda sara alei Jesus tusiliktengaake. 33Tapoi kele araoi ka Jesus, itcorangan atataan nia, taibakbakngakerangan rerenia; 34tapoi sara ka talagat tai saladdu masipunuake sosoat ka usunia, belanangan logau pagalu oinan.

35Tubut sipasiitco sibabara nene masimunengake nene samba sineseat le simunengakenenia, samba iagai sibulatnia sikuania, samba bule kam leu matonem bagamui. 36#2Mos. 12:46; 4Mos. 9:12; Psalm. 34:21 Aipoi aibara sangamberinia nene, bule ipuaili sitususurat ka Surat Sipunenan, “Beri sara tolatnia tubakbakngake.” 37#Zakh. 12:10; Pamoil. 1:7 Ai leu ruang bagei sipasikukua, “Raiitco leu gati nia sipununda.”

Pasirateiat Jesus

(Mat. 27:57-61; Mrk. 15:42-47; Luk. 23:50-56)

38Pasat nene ei si Josep sibara ka Arimatea masitiddou kai Pilatus bule igorosotnake tubut Jesus. (Si Josep nene ia te sipasiului Jesus, tapoi simalipput le, maloto poi nia ka tai Jahudi.) Panindogatnia nene iobaake si Pilatus. Einangan leu gorosotnakenangan tubut Jesus. 39#Joh. 3:1, 2 Si Nikodemus leu ia te sieei siburu ka Jesus sinoibo, amoi nia. Ambitnangan tula mur pagalu tulat simoite, ai telu pulu kilogram sanenia. 40Alarangan tubut Jesus tabutrangan nia komang juto, kaurangan simasingin siripot arat pasiraratei ka tai Jahudi. 41Ka legeret kuddut pasisiliktengaat Jesus ai sara mone. Ka mone nene ai sara ratei sibau, beri pei rateiakera sirimanua ka bagania. 42Kalulut gogoi panarengan poi ka tai Jahudi, malegere pei bagei ratei nene, galakngakerangan tubut Jesus sedda.

Currently Selected:

Joh. 19: MWV

Highlight

Copy