रोमि 4

अबराहम राः नमूना

1मनवाँकू राः हिसाब ते अब्राहम अबू एहूदिकू रेनिय पुरखा दोहो एना, हें-नी वरी अबू इसराएलिकू बू फयलो केना, अबू बिनीसवास केतेबू बंचोआ, हेना राः बारे ते हेंय चीय चेडेना? 2अगर अब्राहम अनेज राः काम ते धरमी हो-ड़िय ठहरो एन रेदो, हेंय अनेज राः बारे ते फुलायवा लगड कनारा जघा दोहोएन मेनू, लेकिन भगवान राः मड़ंग रे एरोय फुलय सको एना। 3हेनाते धरमग्रंथ न घयते कहनिया, “अब्राहम भगवान थरेय बिसवास तेडा, हेनाते भगवान हेंय राः बिसवास धार्मिक्‍ता हवे मेनतेय गिनो तेडा।”#उत्प 15:6; गला 3:6

4बुताअय राः बनी एम हेना दान न लगे, हेना दो हेंय राः हँक हवे। 5लेकिन पापी होड़कू धरमी ठठहरोवाय भगवान, जेयसे अब्राहम धरमिय गिनो तेडिया, हेन घयते होड़कू अकू राः काम ते मेने, लेकिन हेंय थरे कू बिसवासेआ ते धरमिय गिनो कुआ। 6हेन घयते भगवान जे होड़ बेगर काम ते धरमिय ठहरोविया, हेंय आसीसिय ञँमकेडा।

7दाऊद राजा हो अनेज लिखो केडा सिरिंग रे न घयतेय लिखो केडा,

“जे जे राः कसूर माफ यना,

अवुर जे जे राः पापिय तोपो गोत्तेडा,

हेंकू आसीस कू ञँमकेडा।

8अवुर जे होड़ भगवान पापी मेनते मेनेय ठहरोविया,

हेंय आसीसिय ञँमकेडा।”#सिरिंग 32:1,2

9दो, आसीस ञँमकेडा, मेनाः कहनी खतना केनकू लगड भर न लगे, बेगर खतना केनकू लगड हो हवे। अबू कहनियाँ, “अबराहम बिसवास तेडा ते धरमिय गिनो एना।” 10हेंडे दो हेंय करा तोलोग धरमी हो-ड़िय गिनो एना? खतना केन रे कि बेगर खतना रे? खतना केन रे मेने, हेंय अनायिन खतनाः रे धरमी हो-ड़िय गिनो एना। 11अब्राहम अनायिन खतनाः रे हेंय थरे बिसवास दोहो एना ते, भगवान हेंय धरमी हो-ड़िय गिनो तेडिया, मतलोब हेंय राः बिसवास धरमी हवे मेनतेय गिनो तेडा, अवुर भगवान हेंय धरमिय ठहरो केडिया मेनाः लाय लगड चिन्ह राः रूप ते खतना रिवाजिय ओवाडिया। अब्राहम एर खतना एन हेना, नआँ गोवाही एमियाडा कि हेंय अनायिन एर खतनाः रे हेंय राः बिसवास राः चलते ते भगवान धरमिय ठहरो तेडिया। हेनाते बेगर खतनाकू बिसवासे रेहो, अब्राहम सींड़कू रेनिय आत्मिक अपय बनो यना, सीड़कू धरमी होड़कू ठहरोकू लगड नआँ भगवान राः इक्छा हवे। 12अवुर अब्राहम खतना केनकू रेनिय हो अपा हवे, मतलोब सींड़ खतना केनकू रेनिय न लगे, लेकिन खतना केन राः बाद रे जेयसे अबू रेनिय अपा अबराहम खतनाः वरी पहिल तेय बिसवास तेडा, हेन घयते बिसवासेःकू रेनिय अपा हवे।

बिसवास राः दोवारा ते जबान ञँमेना

13हेंकू धरती रेनकू हँकदारी कू होयाः मेनाः जबान, अब्राहम अवुर हेंय रेनकू चोंडिजकू धरम नियम कू मनो तेडा ते मेने ञँमगाना, हेंय बिसवास तेडायू, अवुर धरमी हो-ड़िय गिनो एना, अवुर भगवान हेंय जबान होय जबान वडिया।#उत्प 17:4-6; 22:17,18; गला 3:29 14अगर धरम नियम कू मनो तेडा ते भगवान जबान केड हेना कू ञँमतेड रेदो, बिसवास फलतू यना, अवुर अबराहमिय ओवाडा हेना जबान बे-मतलोब यना। #गला 3:18 15धरम नियम मनोवे मेनते कोसीसेःकू थरे धरम नियम हमेसा दंड आगेआ, कहेकि धरम नियम सही सही ते मेने मनोवे रेदो, भगवान धकोअयू। लेकिन जहाँ रे धरम नियम कोवाआ, हेनारे नियम टेविज राः दो बाते कोवाआ।

16हेनाते भगवान जबान केड हेना, होड़कू बिसवासे रे हेंडेकू ञाँमेआँ। भगवान जबान केड हेना फोकोट ते ञँमुआँ ईनाम घयगिआ। हेनाते न घयते होयाः तना। अबराहम पीढ़ी रेनकू सगोर कुकू ञाँमे मेनते भगवान राः इक्छा इदाना। भगवान जबान केड हेना, जे थरे धरम नियम इदाना हेनकू लगड भर न लगे, लेकिन अबराहम घयतेकू बिसवासेआ, हेंकू लगड हो हवे। कहेकि अबराहम अबू सीड़कू रेनिय अपाबू हवे।#गला 3:7 17ने-ना टेबोः धरमग्रंथ रे अबराहम थरेय कहनी तेडा, “इंञ अखीर जातकू रेनिय अपांञ ठहरो केडमिआँ,”#उत्प 17:5 अबराहम, गोजकोःकुय जियोआ, अवुर एकेआ वरी अनेज राः टेबोः ते सींड़ चीजिय बनोआ, हेंय भगवान थरेय बिसवास तेडा, हेनाते अबराहम, भगवान राः नँजेर रे अबू रेनिय अपाबू हवे।

18अबराहम चोंडिजकू होयाः राः असरा मेने दोहो गना, लेकिन हेंय भगवान थरेय बिसवास बगी तडा, अवुर असरा मेनेनेय टोविज गडा, हेनाते अखीर जातकू रेनिय अपय बनो यना। नआँ जेयसे धरमग्रंथ रे लिखल इदाना, हेन घयते होया केना, हेनारे न घयते लिखल इदाना कि “अमाःकू चोंडिजकू इपिलकू घयते अनगिनित कू होयाआ।” 19हेना तोलोग अबराहम सव साल रेनिय दोहो एना, हेंय राः देंह रे चोंडिजकू पयदा राः ताकत मेने दोहो गना, हेंय राः देंह गोजियाना घयते दोहो एना, अवुर सारा राः कोख हो गोजियान घयते दोहो एना, नआँ टेबोः अबराहम पपाड़ी दोहो एनु, हेंडे रेहो हेंय बिसवास रे मेनेय कमजोर गना। 20हेंय बिसवास मेनेय टोविज गडा, अवुर भगवान जबान वडिय हेनारे मेनेय संखा गडा, लेकिन बिसवास रेय मजबूत एना, नेन घयते भगवान पूराया जबान लगड भगवानिय आदर इजेत तेडा। 21हेंय पक्‍काय भरोसा तडा कि जे टेबोः लगड भगवान जबान केडा, हेना पूराय लगड हेंय थरे सक्‍ति इदाना। 22ने-ना बिसवास राः चलते ते धरमी हो-ड़िय गिनो एना, मतलोब भगवान हेंय राः बिसवास धरमिय गिनो तेडा। 23“हेंय धरमी हो-ड़िय गिनो एना” मेनाः टेबोः, हें-नी लगड भर बेगर लिखोआ। 24लेकिन अबू लगड हो हवे, जे अबू रेनिय परभु ईसु मसीह गोजेन वरिय जियो तेडिया, हेंय भगवान थरे बू बिसवासे रेदो, अबू हो बिसवास राः चलते ते धरमी होड़कू बू गिनोआ। 25अबू कसूर केडा ते भगवान ईसु मसीह कुरूस रे गोजुः लगाडिय एमतेडिया, अवुर अबू धरमी होड़कू ठहरोबू लगाडिय जियो तेडिया।

Currently Selected:

रोमि 4: ksz

Highlight

Copy