रोमि 11

इसराएलिकू थरे भगवान दयाआ

1 # फिलि 3:5 हेंडे दो इंञ होंबोर यडा, भगवान अनेज रेनकू होड़कू इसराएलिकुय बगी वडकुआ मेनते पे अड़ींग तना किदो? बेगारू! इंञ होता इसराएली हवे; अवुर अबराहम राः खनदान अवुर बिन्यामीन गोति रेनिय हवे।#फिलि 3:5 2भगवान पनाहिल तेय चुनो केडकुआ, हेंकू अनेज रेनकू होड़कू बेगारिय बगी कुआ। एलियाह राः बारे ते धरमग्रंथ रे ची मेनते लिखो केना, हेना अपे मेने पे पपाड़िआ किदो? हेंय इसराएलिकू राः बिरोध रे भगवान थरे न याःतेय गोहरोआ, 3“ओ परभु, हेंकू अमाःकू भविस्यवक्‍ता कुकू ञेंड गोज केडा, अवुर अमाः धाम चिली होकू उजड़ गोत्तेडा; अवुर ईनिंञ भर अटा केना, इंञ होकू ञेंड गोजेंञ मेनते कू छपा यडिञाँ।”#1 राजा 19:10,14 4हेना वरी भगवान हेंय ची मेनतेय जबाब वडिया? हेंय कहनी तेडा, “इंञ, ईनिंञ लगड सात हजार कोड़ाकुंञ बंचो केडा, हेंकू बाल देवता मड़ंग रे बेगर कू उकड़ूमा।”#1 राजा 19:18 5निहों हो नेन घयतेआ, भगवान अनेज राः किरपा ते एहूदिकू मेंडे रे कुछ होड़कुय चुनो केडकुआ, हेनाते निहों मेनते कुछ होड़कू बंचो केना कू। 6भगवान नेकू राः धरम काम ञेंलके ते मेने, लेकिन अनेज राः किरपा तेय चुनो केडकुआ; अगर हेंकू राः धरम काम ञेंलके तेय चुनो तेडकू रेदो, किरपा राः कनर मतलोब कोवाआ।

7तहाँ ची होया एना? इसराएलिकू भगवान राः नँजेर रे धरमी होड़कू कू बनोः मेनते कू कोसीसे दोहो एनु, लेकिन हेंकू मेने कू बनो सको गना, चुनो तडकुः हेंकू भर बनो एना, अवुर कुदो जीवित कुकू कठोर गोत्तेडू। 8अवुर नेकू राः जीवन धरमग्रंथ रे इदान घयते होया एना,

“भगवान हेंकू भारी नींद रेय डलो गोत्तेड कू, हेनाते हेंकू कनर मेनेकू समझोआ,

अवुर हेंकू मेडवन रेहो मेने कू ञेंल सकोः तना,

अवुर लूतुर वन रेहो मेने कू अँजोम यडा, अब मेनते नेन घयते होयाः तना।”#बेवस्था 29:4; एसा 29:10

9अवुर दाऊद राजा हो नेकू कठोर मन वालाकू राः बारे ते न घयतेय कहनियाँ,

“हेंकू राः जोमुः चरोः तकू जाल अवुर फँदा बनोऊ;

अवुर हेंकू अनाकू राः आसीस लोजोरुः राः ओढोर तू बनोऊ,

अवुर हेंकू सजा कू ञाँमू।

10हेंकू मेडतू कू अंधरा उरकू, ताकि अलोकू ञेंल सकोऊ,

अवुर हेंकू देया, हँबल ते कुबड़ा बगी कोऊ।”#सिरिंग 69:22,23

अनजातकू उबारुः हेना

11इंञ फेरिंञ होंबोर यडा, इसराएलिकू तोहोड लोजोर एन वरी मेने कू रिमगाना किदो? मेने! हेंकू लोजोर एन हेना राः चलते ते, अनजातकू उबर केना, ताकि इसराएलिकू अनजातकू ञेंलके कुते कू एठेडू, अवुर हेंकू थरे हो उबारुः राः इक्छा पयदाऊ। 12इसराएलिकू लोजोर एना हेना राः चलते ते, गोटा चँवदीस रेनकू आसीस कू ञँमतेडा, अवुर इसराएलिकू कम एन हेना राः चलते ते, अनजातकू अखीर आसीस कू ञँमतेडा, दो पसींदे पे, चुनो केडकुः हेंकू इसराएलिकू मसीहा थरे बिसवास केते सींड़ कुकू बंचोः रेदो, तीमिन आसीस न दुनिया रे ञँमुआँ।

कलम केड हेना डाँड़ राः उदाहरड़

13इंञ अपे अनजातकू थरेंञ कहनी यडा, भगवान अपे अनजातकू लगड परेरितिय ठहरो केडिञाँ, इंञ नआँ काम रे महत्विंञ एमियाडा। 14ताकि कनर न कनर याःते, ईञाःकू सगाकू, अपे अनजातकू ञेंलके तेकू एठेडू, अवुर हेंकू मेंडे कुछ होड़कू उबारुऊ। 15कहेकि भगवान इसराएलिकुय बगिवड तहाँ, अनजातकू राः रिस्ता भगवान सुदा बनो यनु, अगर इसराएलिकू भगवान थरे कू मिड़ाः मेजुः रेदो, गोजकेन वरी कू जियो रिमकेन घयगिअकू। 16भगवान लगड कू रकाबेआ, हेना पहला रोटी घली पवितर गिआ, दो सुवेड केडा सगोर आटा हो पवितर गिआ; अवुर दुबीत जेड़ित घली पवितर गिआ, दो डाँड़ पखुर तुहो पवितर गिआ।#11:16 अबराहम अवुर एट एटाः पुरखाकू भगवान रेनकू होड़कू दोहो एना, हेनाते हेंकू रेनकू चोंडिज कुहो भगवान रेनकू कू होयाआ

17इसराएलिकू जोः लगड भगवान रोहे तेडा काठ घयगिअकू, अवुरिय ञेंल अँजोम यडकुआ। अवुर अपे अनजातकू बुरू रे अपने अपन ते ओमोनुआ काठ घयगी अपे। भगवान अनेज रोहे तेडा, हेना काठ राः कुछ डाँड़ पखुर तुय गेर गोत्तेडा, अवुर अपे बुरू रे ओमोनुआँ काठ राः डाँड़ पखुर घयगी अपे, अवुर अपे कलम केपे ते हेना रेय जोरो केडपेआ, हेनाते अपे हो जड़ीत सुदा पे जोरो यना, अवुर अपे हो हे-ना जड़ी वरी रस गोरस ञँमुआँ। 18दो गेर गोत्तेडा डाँड़ पखुर वरी अले बढ़ियाँ गिआले, कहेकि अले हेना रेय जोरो केडलेआ मेनते अलोपे सयाँड़ू, हे, सयँड़ रेदो उहयर तपे, अपे जड़ीत मेने पे सम्भरो वेआ, लेकिन अपे जड़ीत सम्भरो पेआ, मतलोब इसराएलिकू राः आसीस वरी अपे आसीस ञँमुः तना, अपे राः आसीस वरी हेंकू मेने ञँमुः तना।

19फेर अपे, “अलेय जोरो लगड डाँड़ पखुर तुय गेर तेडा” मेनते अलोपे कहनिय जहानू। 20ठिके इदाना! लेकिन हेना डाँड़ मतलोब इसराएलिकू मसीहा थरे मेने कू बिसवास गडा, हेना तेय गेर गोत्तेड कुआ, लेकिन अपे मसीहा थरे पे बिसवास केडा ते हेना जघा रेय जोरो केडपेआ; हेनाते अलोपे सयाँड़ू, लेकिन बोर पे। 21कहेकि भगवान, असलिआ डाँड़ पखुर तू घली मेनेय अटा गडा, दो अपेय अटा पेआ? 22हेनाते अपे भगवान राः किरपा भर अलोपे तियागे, केटेज गिअय हेना होपे तियागे! जे जे हेंय राः टेबोः मेने कू चे-डा, हेनकू लगाडिय केटेजा, लेकिन अपे हेंय थरे पे बिसवास बगिता, हेंडे हेंय राः किरपा अपे थरे दोहोना, नहींता अपे होपे एर चोपाआ। 23अवुर इसराएलिकू मसीहा थरे कू बिसवासे रेदो, हेंकुय जोरो कुआ; कहेकि भगवान फेर जोजोरो होय सुजाड़ाँ। 24अपे अनजातकू, बुरू तआ काठ राः डाँड़ पखुर तू घयतेपे दोहो एना, अपे घली गेर अक्‍केड पेते, अनेज रोहे तेड हेना बढ़ियाँः दुबीत रेय जोरो केडपेआ; बुरू तआ काठ राः डाँड़ गेरकेते बढ़ियाँः काठ राः डाँड़ रे मेने कू जोरोया, लेकिन भगवान जोरो केडायू, दो पहीलिय गेरतेड हेना डाँड़, फेर एरोय जोरो सको एना किदो?

सगोर इसराएलिकू बंचोअकू

25एगा भाईकू, अपे अपन आप बुधमान गिअंञ मेनते अलोपे पसींदे जहानू; हेनाते इंञ भगवान उकू केड हेना, नआँ भेद पे पपाड़ी लगाडिंञ चहोः तना, अवुर हेना भेद नआँ हवे, कि कुछ इसराएलिकू राः मन कठोर यना; लेकिन हेंकू हमेसा लगड बेगर कू कठोरा; अवुर अनजातकू जेतना ना भगवान चुनो केडकुआ, हेंकू सींड़कू भगवान थरे अनायिन कू मेज हनीः मेन दिन हेंकू राः मन कठोर बगी कोआ। 26अवुर नेन याःते सींड़ इसराएलिकू भगवान उबर कुअयू। कहेकि धरमग्रंथ रे न याःते लिखल इदाना,

“छछाडोवय सियोन#11:26 एरुसलेम वरिय मेजुआ,

अवुर एकूब खनदान रेनकू वरी सींड़ गलत कामिय उडूंगेआ;#एसा 59:20

27इंञ हेंकू राः पापिंञ अड़िया,

अवुर हेना तोलोग हेंकू सुदा ईञाः वादा ने-ना दोहोना।”

28अवुर हेंकू बढ़ियाँः खभेर रे मेने कू बिसवास गडा ते, अपे राः चलते ते भगवान रेनकू मुदेय कुकू बनो यना; अवुर नआँ अनजातकू लगड फयदा गिआ, लेकिन भगवान इसराएलिकू रेनकू दादी पुरखा कुय जबान वडकुआ, हेनाते भगवान हेंकू इसराएलिकुय चुनो केडकुआ, अवुर हेंकुय दुलर कुआ। 29कहेकि भगवान जे-जेय चुनो कुआ, अवुर बरदानिय ओवा कुआ, हेना राः बारे ते अनेज राः मन कभी मेनेय बदलो वेआ। 30कहेकि अपे अनजातकू पहील भगवान राः टेबोः मेने पे चेडगाडा, लेकिन अब इसराएलिकू हो हेंय राः हुकूम मेने कू चेडियाडा ते, अपे भगवान दया वडपे अयू; 31हेन घयते अब इसराएलिकू मन मिड़ाः केते बढ़ियाँ खभेर रेपे बिसवासे मेनाः हुकूम मेने कू मनो यडा, तहाँ अपे थरेय दया केना, लेकिन एक दिन हेंकू थरे होय दयाआ। 32हेनाते भगवान सींड़कू हुकूम अलो चेड राः बंधनू रेय इकावड कुआ, ताकि सींड़कू थरेय दयाऊ।

भगवान राः स्तुति

33बाप रे! भगवान अनेज राः बुद्ही अवुर गियान ते जो कुछिय करो केड हेना, ईया जेर सकोआ? अवुर हेंय कामेः हेना तरिका हो ईया जेर सकोआ?

34धरमग्रंथ कहनिया,

“परभु राः बिचार ईया जेर सकोआ?

अवुर हेंय सलाह ओवय लायिक ईया इदाना?

35अवुर कनय पहिल ते कनाराय ओवाडिया किदो?

ताकि हेंय बदलाय मिड़ाः वयू?”#अय्यू 41:13

36कहेकि सींड़ चीज हें-नी हनवरी मेजुआ, अवुर हें-नी राः दोवारा ते सींड़ चीज टेको केना, अवुर सींड़ चीज हें-नी राः हवे,#1 कुरि 8:6 अवुर हें-नी राः मान मरजाद जुग जुग होयाः महल रे दोहोनू। आमेन।

Currently Selected:

रोमि 11: ksz

Highlight

Copy