रोमि 10
10
1एगा भाईकू, अले इसराएलिकू उबारुः लगड इंञ अखीरिंञ चहोः तना, हेनाते भगवान थरेंञ बिनतीः तना। 2इंञ हेंकू राः बारे ते गोवाहिंञ एमियाडा कि हेंकू भगवान लगड दोकू ओसताज गिआ, लेकिन हेंकू काःतेकू सेवाया, हेना राः सही तरिका बेगर कू पावा। 3भगवान अनेज राः नँजेर रे होड़कू काःते धरमिय बनो कुआ, हेना मेने कू पपाड़ी गना, हेंकू भगवान राः इक्छा घयते मेने, लेकिन अनाकू राः इक्छा घयते धरमी बनोः लगड कू कोसिसे दोहो एनु। नेन याःते हेंकू भगवान राः नँजेर रे करेःते धरमी बनेक इदाना, हेना कू नहकार गोत्तेडू। 4कहेकि मसीहा अनेज थरे बिसवास केते धरमी बनेक इदाना मेनते बिसवासेः हेंकू राः बदला ते धरम नियम ची ची करोवे लगड कहनी यडा, हेना सींड़ मसीहा पूरा केडा, ने-ना ते होड़कू धरम नियम मनो केतेकू उबारुआ, अवुर मसीहा थरे बिसवास करेक जरूरत कोवाआ मेनते कहनिय हेंकू राः झूठा सिक्छा मसीहा खतम केडा।
जे जे कू बिसवासेआ हेंकू उबारुआ कू
5अवुर धरम नियम मनो केते भगवान राः नँजेर रे धरमी बनोः मेनतेय चहोआ, हेंय राः बारे ते मूसा हो नआँ घयतेय कहनी केडा, “कनय हो नआँ धरम नियम एगो एगो तेय मनोवेआ, हेंय हे-ना नियम राः चलते ते जीवानिय ञाँमा।”#लेवी 18:5 6लेकिन बिसवास केते भगवान राः नँजेर रे धरमी होड़कू बनोः राः बारे ते धरमग्रंथ रे नआँ घयते इदाना, “अबू लगड मसीहा सरग वरी अगड़ू अगेय लगड, ईया रकाबा मेनते अलोपे पसींदे?”#10:6 लेकिन बिसवास राः दोवारा ते भगवान राः मड़ंग रे धरमी बनोः बारे ते, भविस्यवक्ता मूसा न घयतेय कहनिया कि अपे अपन मन रे न घयते अलोपे पसींदे कि कनय हो नआँ धरम नियम राः अनुसार ते बिलकुल एरोय सेन सको एना, नआँ अबू लगड न घयतेआ कि हेंय अखीर अगस रेया अबू सुहरू तयागिय वरी हो अनागस रेय घयगिआ, फेर अबू नआँ धरम नियम राः अनुसार ते से-ने लगड, अबू मदेद वबू लगड ईया सरग अँगम रकाबा, अवुर तोस रेय अगेया? नआँ घयते अलोपे कहनियू, न घयतेपे कहनियड रेदो, मसीहा सरग वरी तोस रे सही मेते बेगारिय मे-जा मेनते पे कहनी यड घयगिआ। 7अवुर “गोजकेनकू मेंडे रे मसीहा जियो अगेय लगड गोजकेनकू राः जघा रे ईया अगड़ुआ मेनते हो अलोपे पसींदे।”#10:7 अवुर अपे राः मन रे न घयते अलोपे कहनिय कि “नआँ धरम नियम जो कुछ कहनिया, हेना घयते करोवे लगड बहुत मुस्किल गिआ, कनय सयते हो मेने होयाआ, ‘ईया अबू लगड गोजकेन कुराः जघा रेय सेनुआँ, अवुर मदेद वबू लगड मियाँहोड़ मदेद ए-मायिय आगू? ताकि अबू हेना धरम नियम राः अनुसार तेबू से-ने,’ नआँ घयते अलोपे कहनियू ना घयतेपे कहनिय रेदो, मसीहा सही मेते गोजेन वरी मेनेय जियो रिम गना, अवुर गोजकेन कुराः जघा बेगारिय मे-जा घयते होयाआ।” लेकिन मसीहा अबू लगड अबू बंचो लगड सरग वरी तोस रेय मेजकेना, अवुरिय जियो होय जियो रिमकेना। 8सही मेते मूसा न घयतेय कहनिया कि भगवान राः बचन अखीर अगस सरग रे कोवाआ, अवुर धरती रे अखीर गहीर रे कोवाआ; हेंय राः बचन बनादेम रेआ, अवुर हेना अहम रेआ, अवुर अमाः मन रेआ,#बेवस्था 30:12-14 ने-ना बचन राः बारे ते मतलोब बिसवास वआ बचन राः बारे ते अले मसीहा थरे बिसवास केतेकू बंचोआ मेनते बढ़ियाँ खभेर ले लाय यडा।#10:8 सही मेते मूसा न घयतेय कहनिया कि “भगवान राः बचन अखीर अगस सरग रे कोवाआ, अवुर धरती राः अखीर गहीर रे कोवाआ। हेंय राः बचन बँनादेम रेआ, अवुर हेना अनाहम रेआ, अवुर अमाः मन रेआ।” ने-ना बचन राः बारे ते मतलोब बिसवासेआ बचन राः बारे ते अबू मसीह रे बिसवासे रे बू बंचोआ मेनते बढ़ियाँः खभेर ले लाय यडा। 9अवुर हेना बचन नआँ हवे, अम अपन अहा ते, ईसु परभु हवे मेनतेम कबूले, अवुर अमाः मन रे भगवान हेंय गोजतन वरिय जियो रिमकेडिया मेनतेम बिसवासे रेदो, अम जरूरिय उबर मिआँ। 10कहेकि धरमी ठहरोः लगड कनय हो अपन मन रेय बिसवासेआ, अवुर उबारुः लगड अहत तेय कबुलेआ। 11कहेकि धरमग्रंथ रे न याःते लिखल इदाना, “कनय हो हेंय थरेय बिसवासेआ, हेंय एरोय लजियो एना।”#एसा 28:16 12अवुर नआँ बचन सींड़कू लगड हवे, कहेकि हेंय सींड़कू रेनिय परभु हवे, हेनाते एहूदिकू अवुर उनानिकू थरे कनर फरक कोवाआ, अवुर जे जे हेंय कू गोहरोआ, हेंकू हियाखोल तेय ओवा कुआ। 13कहेकि कनय हो परभु राः ञुमुय ञुमू केतेय गोहरोआ, हेंय उबारुअयू मेनते, भगवान राः बचन रे कहनी यडा।#जोए 2:32
14लेकिन जे थरे मेने कू बिसवासेआ, हेंय काःतेकू ञुमूया? अवुर हेंकू भगवान राः बारे ते मेने कू अँजोमे रेदो, काःते हेंय थरे कू बिसवासेआ? अवुर हेंकू कनय मेने लाय वकू रेदो, हेंय राः बारे ते काःतेकू अँजोमेआँ? 15अवुर कनय हेंकू थरे, कनय मेने कू कुल रेदो, कनय सेनकोःते काःतेय परचारेआ? न राः बारे ते धरमग्रंथ रे लिखल इदाना, “बढ़ियाँः खभेर कू इदिआ, हेंकू कटा तीमिन बनल ओकोन गिआ।”#एसा 52:7
16लेकिन सगोर कुदो बढ़ियाँः खभेर मेने कू मनो गडा, कहेकि एसायाह भविस्यवक्ता ना याःतेय कहनिया, “ओ परभु, अले लाय तेड हेना बढ़ियाँः खभेर रे ईया बिसवास केडा?” #एसा 53:1 17हेनाते बिसवास, बचन अँजोम रे मेजुआ, अवुर मसीहा राः बारे ते परचारे रे हेंडेकू अँजोमेआँ।
18लेकिन इंञ होंबोर यडा, इसराएलिकू अले लाय तेड हेना बढ़ियाँः खभेर बेगर कू अँजोम किदो? जरूर कू अँजोम केडा, कहेकि धरमग्रंथ रे लिखल इदाना,
“हेंकू राः आवाज गोटा दुनिया रे तयाः गोत्तेडा,
अवुर हेंकू परचार तेड हेना गोटा चँवदीस रे मिरीज यना।”#सिरिंग 19:4
19इंञ फेरिंञ होंबोर यडा, इसराएलिकू नआँ टेबोः मेने कू जेर गडा किदो? हेंकू जेर तेडाकू, भगवान मूसा राः दोवारा तेय कहनी तेडा,
“इंञ अनजातकू एयसांञ उपयोग कुआ,
कि अपे हेना ञेंल तेपे एठेडा;
अवुर जे भगवान राः बारे ते मेने कू पपाड़िआ, हेंकुंञ उपयोग कुआ,
अवुर अपे हेना ञेंल तेपे धकोआ।”#बेवस्था 32:21
20अवुर एसायाह हो हिमत केतेय कहनियाँ,
“जे इंञ मेने कू छपंञ दोहो एनु, हेंकू ञँमकेडिञाँ कू;
अवुर जे होंबोर घली मेने कू होंबोर गडिञाँ, हेंकू थरेंञ देखर केना।”#एसा 65:1
21लेकिन इसराएलिकू राः बारे ते भगवान हाँःतेय कहनियाँ,
“गोटा दिन तींञ जे जे ईञाः टेबोः मेने कू चे-डेआ, अवुर इंञ कू बिरोधा,
हेंकू हनतेंञ फयलो बगी तडा।”#एसा 65:2
Currently Selected:
रोमि 10: ksz
Highlight
Share
Copy
Want to have your highlights saved across all your devices? Sign up or sign in
© 2022, Wycliffe India. All rights reserved.
