मरकुस 4

बिहन मे-राय राः उदाहरड़

(मत्ती 13:1-9; लूका 8:4-8)

1 # लूका 5:1-3 हेना वरी फेर ईसु समुन्धर अड़ी रेय चेडकू दोहो एनु; अवुर हेना रे एतना होड़कू जवर एना कि समुन्धर रे मियाँटंग डोंगा रे रकब केनतेय दुड़ूब यनु, अवुर सींड़ होड़कू समुन्धर अड़ी तेकू चड़ाँ तना। 2अवुर हेंय उदाहरड़ दे-दे ते, अखीर टेबोईय चेडकू दोहो एनु, 3अवुरिय कहनी तेडा, “अँजोम पे! मियाँहोड़ बिहन मे-राय बिहन मे-रिय उडूंग एना। 4मेमेर तोलोग अवुराः बिहन होर अड़ी ते लोजोर एना, अवुर हेना तितीजकू मेजकेन तेकू डोंगो जोम तेडा। 5अवुराः बिहन चटाँड़ीवन ओत रे लोजोर एना, हेना रे बगरा हास मेने ञँमगाडा। अवुर बगरा हास मेने ञँमगड ते हलिते ओमोन एना, 6तहाँ बेर उगोएन दो गुरलो यनु, अवुर मेने जेड़ियो गना ते लोहोड़ यनु। 7अवुराः बिहन जनोम भेंजुड़ ते लोजोर एना, तहाँ जनोम भेंजुड़ हरा केनते दबो तिल गोत्तेडू, हेनाते हेना मेने दना गना। 8अवुराः बढ़ियाँ ओत रे लोजोर एना, अवुर हेना ओमोन एना, अवुर हरा केनते दना एना; अवुर तीस गुना अवुर साठ गुना अवुर सव गुना पयदा एना।” 9अवुरिय कहनी तेडा, “जे थरे अअँजोम लगड लूतुर इदाना, हेंय अँजोमियू।”

उदाहरड़ राः मतलोब

(मत्ती 13:10-17; लूका 8:9-10)

10ईसु मसीह मियाँ होड़ तेय दोहो एना, तहाँ बारह झन चेला कुतय अवुर एनेटाः चेलाकू हो उदाहरड़ राः बारे तेकू होंबोर तेडिया। 11तहाँ हेंय हेंकू थरेय कहनी तेडा, “अपे भगवान राः राज राः भेद जे-रे लगड अपे बरदान ञँमकेना। लेकिन एटाःकू लगड सींड़ टेबोः उदाहरड़ तेंञ लाय वकुआ। 12हेनाते हेंकू अँजोमे रेहो एरो कू समझो तेडा, अवुर ञेंले रेहो एरो कू चिन्हों तेडा, न घयते अलो होयाऊ कि हेंकू इंञ हनतेकू मिड़ाः मेजुऊ अवुर माफींञ ओवाकू।”

बिहन मेमेरय राः उदाहरड़ राः मतलोब

(मत्ती 13:18-23; लूका 8:11-15)

13ईसु हेंकू थरेय कहनी तेडा, “अपे नआँ उदाहरड़ मेने पे जेर यडा किदो? हेंडे दो अवुराः सींड़ उदाहरड़ काःतेपे जे-रेआ? 14मेमेराय भगवान राः टेबोईय मे-रा। 15होर अड़ी रे मेरतेड हेना नेकू हवे, नेकू भगवान राः टेबोः अँजोम तुदो कू अँजोमेआँ, लेकिन सयतान तुरेत्ते मेजकोः ते भगवान राः टेबोः हेंकू राः कोठी कया वरिय उडूंग गोत्तेआ। 16नेन घयते चटाँड़ी ओत रे मेरतेडा हेना नेकू हवे, नेकू अँजोमेसी खुसी कोःतेकू अपनो वेआ। 17लेकिन हेंकू जीवित कुरे भगवान राः टेबोः बढ़ियाँ ते मेने जेड़ियो अते, हेंकू कुछ दिन अँगम कू दोहोना; हेना वरी भगवान राः टेबोः राः चलते ते दुख चहे बिरोध होयाः तहाँ, तुरेत्ते तयोम हनतेकू मिड़ाः जोमा। 18भेंजुड़ रे मेरतेडा हेना नेकू हवे, नेकू टेबोः दोकू अँजोमेआँ, 19लेकिन हेंकू संसार राः चिन्ता अवुर धन राः लोभ अवुर अलग अलग चीज राः लालच ते भगवान राः टेबोः दबो गोत्तेआ, अवुर हेंकू थरे बढ़ियाँ दना मेने बेयठोआ। 20अवुर बढ़ियाँ ओत रे मेरतेडा हेना नेकू हवे, टेबोः अँजोम केतेकू अपनो वेआ अवुर फल कू आगा, कोई तीस गुना, कोई साठ गुना कोई सव गुना।”

दीया राः उदाहरड़

(लूका 8:16-18)

21 # मत्ती 5:15; लूका 11:33 ईसु हेंकू थरेय कहनी तेडा, “चवकी चहे परकोम पेंदी रे दोहोय लगड दीया मेने कू जाबेआ, लेकिन हेना अगस रेकू टेंगवा तआ। 22#मत्ती 10:26; लूका 12:2निहों मेनते उकू केना, अवुर मेने ञेंलुः तना, हेना एक दिन देखारूआ। 23जे लूतुर वनायू, हेंय अँजोम जोमियू।” 24#मत्ती 7:2; लूका 6:38फेरेच ईसु हेंकू थरेय कहनी तेडा, “ची पे अँजोम यडा हेना राः धियान रेपे दोहोनू। जे नाप तेपे नपोवेआ, हे-ना नाप ते अपे लगड होय नपोवेआ,#4:24 अपे ईसु राः टेबोः रे धियान पे एम रेदो, भगवान बुद्हिय ओवा पेआ। अवुर बगरा तेय ओवा पेआ। 25#मत्ती 13:12; 25:29; लूका 19:26कहेकि जे थरे इदाना, हेंय अवुरिय ओवाया; अवुर जे थरे कोवाआ, हेंय थरे जे-ना इदाना हेना होय अँगेर अविया।”

ओमोनुः हेना दाना राः उदाहरड़

26ईसु फे-रिय कहनी तेडा। “भगवान राः राज न घयगिआ, मियाँहोड़ किसान खेत तय रे बिहानिय मेरतेडा, 27अवुरिय चलो एना। अवुर जेस जेस ते दिन बितो एना, हेना ओमोन केनते हरा एना, अवुर हेंय मेनेय पपाड़िआ। 28हास अपने आप ते खेती उपजो वेआ, मड़ंग ते जरेयुआ, हेना वरी बलिआ, फेर बलित रे दाना तयारुआ। 29लेकिन जब खेती बिलीआ, हेंडे हेंय तुरेत्ते इईरिय बोंहड़ियाँ, कहेकि इईर राः समय होया जोमा।”

सरसों दना राः उदाहरड़

(मत्ती 13:31-32,34-35; लूका 13:18-19)

30फेर ईसु कहनी तेडा, “भगवान राः राज ची सुदांञ बरो बरेआ, करा उदाहरड़ तेंञ समझो बुआ? 31हेना सरसों दना राः बरोबर गिआ, हेना ओतेत रे मे-रे रेदो ओत राः सींड़ दना वरी होडींञ दोहोना, 32लेकिन मे-रे तहाँ ओमोन कोःते सींड़ अड़ाः वरी हरा जोमा, अवुर अगस रेनकू तितीजकू हेना उँबुल रेकू डेरा सकोः घयते, बडे बडेआ डाँड़ उडूंगुआ।” 33हेंकू नेन याःते अखीर उदाहरड़ दे-दे ते हेंकू जे-रे घयते भगवान राः टेबोईय लाय वकू दोहो एनु। 34अवुर हेंय उदाहरड़ बिना ते होड़कू थरे कनर मेनेय कहनी दोहो एनु; लेकिन हेंय अनेज रेनकू चेलाकू सुदा अना कुते कू दोहोएन रे सींड़ टेबोः राः मतलोबिय समझोकू दोहो एनु।

ईसु गरा घटाय थबदो तेडा

(मत्ती 8:23-27; लूका 8:22-25)

35हेन चेका सींगड़ यन रे ईसु अनेज रेनकू चेलाकू थरेय कहनी तेडा, “दू, मेना परोम बू चलोऊ।” 36हेना वरी होड़कू बगी वते, ईसु पहीलिय दुड़ूब एना हेना डोंगा रे चेलाकू इदी तेडिया, अवुर एटाः डोंगा हो हेना राः साथ ते दोहो एना। 37तहाँ अखीर गरा घटा मेजेना, अवुर एतना हिलकोस एना कि डोंगा रे दाः पेरेजुः दोहो एनु। 38लेकिन ईसु डोंगा तयोम राः गद्दी रेय गितीज दोहो एनु। तहाँ चेलाकू जगो केडिय तेकू कहनी तेडा, “ओ गुरू, अबू दाः रेबू डुबोः तना हेना राः चिन्ता कोवाः किदो?” 39तहाँ हेंय रिमकेन ते गरा घटाय दबेट तेडा, अवुर दाईय कहनी वडा, “सनीतुःमी, थबदोः मी!” तहाँ होय थबदो यनु, अवुर एकदम जपनो यनु। 40अवुर ईसु चेलाकू थरेय कहनी तेडा, “अपे ची लगड पे बोर तना? निहों मेनते मेने पे बिसवास यडा किदो?” 41हेंकू अखीर कू बोरो यनु, अवुर अनाकू अनाकू होंबोर ओड़ेंगू, “नेय ईया हवे? गरा घटा अवुर दाः घली नेय राः टेबोः अँजोमेआँ?”

Currently Selected:

मरकुस 4: ksz

Highlight

Copy