मरकुस 5

भूतकू लगोतन हेंनिय चिकन तेडा

(मत्ती 8:28-34; लूका 8:26-39)

1हेंकू समुन्धर खँडा केते गिरासेनिकू देस रेकू तयाः तेडा। 2हेंकू डोंगा वरी कू अगड़ू एना, हेनेन तोलोग मियाँहोड़ भूत लगो तनाय होड़ मरघटी हनवरिय मेजुः तोलोग कू ञँमतेडिया। 3हेंय मरघटी रेय दोहोन दोहो एनु, अवुर हेंय कढ़वा तेहो कनय मेने कू तोल सकोः दोहो एनु। 4कहेकि बित्ताही ते हेंय कड़वा अवुर सिकरी तेकू तोलताडिया। लेकिन हेंय कढ़वा होय टोविज तेडा अवुर सिकरी होय कटका कुटकू गोत्तेडू, अवुर हेंय कनय मेने कू कब्जा सकोऊ। 5हेंय हरदम सींञ ञींद मरघटी अवुर बुरू तेय किर्री बेड़ाऊ अवुर दिरी तेय तिकी घाऊः दोहो एनु। 6हेना वरी हेंय ईसु ञेंलकेते सगींञ वरिय धावा सेनेना, हेना वरिय सेनकेन तेय जोहार वडिया। 7अवुर हेंय बडे ते अहीज केनतेय कहनी तेडा, “ओ ईसु, सींड़कू वरी बडेअय भगवान होपोन, ईञाः अम थरे ची काम इदाना? इंञ भगवान कीरिया, अलोम सतापिञूँ।” 8कहेकि ईसु हेंय थरेय कहनी तडा, “ए भूत, नेंय होड़ वरिम उडूगुऊ।” 9ईसु हेंयिय होंबोर तेडा, “अम ञुमू कू ची वआ?” हेना वरी हेंय बको एना, “इंञ ञुमू सेना हवे; कहेकि अले बगरा गिआले।” 10अवुर हेंय ईसु थरे अखीरिय गोड़े पय्याँ एना, “अले न देस वरी एटाः हनते अलोम कुल्ले।” 11हेना बुरू रे सुकरिकू मियाँ लेहँड़ कू चरोः दोहो एनु। 12हेंकू ईसु थरे गोड़े पय्याँ केनतेकू कहनी तेडा, “अले मेंकू सुकरिकू थरेम कुल गोत्तेले, अवुर अले मेंकू थरे ले दोहोना।” 13हेनाते ईसु सुकरिकू थरेय इकम गोडवडकू, अवुर भूतकू उडूंग केनते सुकरिकू थरे कू झपटो एना, अवुर सुकरिकू लगभग दूय हजार कू दोहो एना, हेंकू करखा वरी धावा सेनकेन ते समुन्धर रेकू लोजोर एना अवुर कू डुबो गोजियानू। 14सुकरी चरवाहकू ञींर सेनकेनते सहर अवुर गाँव रे खभेर कू लाय तेडा, अवुर जो होया तना, हेना होड़कू ञेंञेंल कू मेजेना। 15हेंकू ईसु थरे कू मेजेना अवुर भूतकू लगोतन हेंय होड़ कपड़ा लता तुसींञ केते बढ़ियाँ तेय दुड़ूब तना ञेंलतेकू बोरो यनु। 16ञेंञेंल कू भूतकू दोहोएन हेंय राः अवुर सुकरी कुराआ सींड़ हाल कू लाय वडकुआ। 17हेना वरी हेंकू ईसु थरे गोड़े पय्याँ केनतेकू कहनी वडियू, “अले सिवन वरिम चलोऊ” मेनते। 18हेना वरी ईसु डोंगा रेय रकब तोलोग, जे थरे भूतकू दोहो एना, हेंय गोड़े पय्याँ सोताडा कि इंञ हो अम सुदांञ सेनुआ मेनते। 19लेकिन ईसु हेंय अनुमति मेनेय एमगाडिया, अवुरिय कहनी वडियू, “परभु सोग वडमी ते तिमीन बडेआ कामिय काम केडा, हेना ओड़ाः सेनकोःते अमाःकू होड़कुम लायवा।” 20हेना वरी हेंय दिकापुलिस राज रे सेनकेन ते नआँ टेबोईय लाय तेडा कि ईसु इंञ लगड तिमीन बडेआ कामिय करो केडा; हेना अँजोम केते सींड़ कुकू अहचरज यनु।

ईसु आईर कोड़ी होपोनिय जियो तेडा, अवुर रोगिया कोड़ीहोनिय चिकन तेडा

(मत्ती 9:18-26; लूका 8:40-56)

21ईसु फेरेच डोंगा ते समुन्धर वरी मेना पारिय खँडा एना, अवुर हेंय समुन्धर अड़ी रेय दोनोहोएन तोलोगू, अखीर होड़कू हेंय थरे कू जवर यनु। 22आईर मेनते कू ञुमू तडिया, हेनी आराधना ओड़ाः रेनकू मुखियाकू मेंडे मियाँहोड़ मेजेना, अवुर ईसु ञेंलके ते कटत दुबी रे लोजोर केनतेय गोड़े पय्याँ एना, 23अवुर न याःते कहनी केते अखीरिय अरजी एना, “ईञाअय होडिंञय कोड़ी होपोन गोज बंचो केनायू; चिकन कोःते जीवत तेय दोहोन लगड अम मेजकोःते छुयों वियमी।” 24तहाँ ईसु हेंय सुदाय सेनेना; अवुर अखीर होड़कू हेंय तयोम तेकू सेनतेडा। अवुर भीड़ राः चलते ते होड़कू हेंय थरे कू लोजोर बंचोऊ।

25हेना भीड़ रे मियाँहोड़ कोड़ीहोन बारह बरिस अँगम महेनवरी रोग रेय दोहो एना। 26नेंय अखीर बयेधकू थरे एर ईलाज केनते, अखीर दूखिय झेलो तडा, अवुर अनेज राः सींड़ चीजिय खरचा गोत्तेड रेहो कनर फयदा मेने ञँम गना, लेकिन हेंय राः रोग अवुर बड़हो यनु। 27हेंय ईसु राः चरचाय अँजोम केते भीड़ रे तयोम हनवरिय मेजेना अवुर ईसु राः कपड़ाय छुवों तेडा, 28कहेकि हेंय कहनिय दोहो एनु, “मेंय राः कनापड़ांञ छुयों तेंञ चिकानुआ।” 29अवुर तुरेत्ते हेंय राः महेनवरी रोग बँद यनु, अवुर हेना रोग वरिय चिकन यन मेनाआँ अनेज राः देंह रेय अटकर गोत्तेडू। 30ईसु अनेज वरी सक्‍ति उडूंग एना हेना तुरेत्तेय पपाड़ियानू, अवुर तयोम हनते मुँहियों केनते भीड़ रेनकुय होंबोर तेडा, “ईञाः कपड़ा ईया छुयों तेडा?” 31हेना वरी चेला कुतय कहनी तेडा, “अम ञेंलयड कुआ कि होड़कू अम थरे कू लोजोर बंचोः तना, अवुर मी कहनी यडा कि ईया छुयों तेडिञाँ मेनते।” 32नआँ काम ईया काम केडा मेनाआँ ञेंलेय लगड ईसु चारियो गतर हनिय तको तेडा। 33हेंय कोड़ीहोन इंञ थरे तीमिन भलाई होया केना मेनाआँ पपाड़ी केनते, बोर अवुर एखलाः तींग तेय मेजेना, अवुर हेंय ईसु कटा दुबी रे उकड़ुम केनते हेंय थरे सींड़ टेबोः सही सही तेय लाय तेडा। 34हेना वरी ईसु हेंय थरेय कहनी तेडा, “बेटी, अम बिसवास केडा तेम चिकन यना; हँसी खुसी तेम चलोऊ, अवुर नआँ रोग वरी बंचो कोःमी।”

35ईसु नआँ टेनेबोगे तोलोग आराधना ओड़ाः रेनिय अधिकारी ओड़ाः वरी कुछ होड़कू मेजकेन तेकू कहनी तेडा, “अम कोड़ी होपोन दो कोवाया, निहों गुरू ची लगड मी अफेत यडिया?” 36लेकिन हेंकू कहनी तेडा हेना टेबोः ईसु अँजोम गोडवाडियू, अवुर आराधना ओड़ाः रेनिय अधिकारी थरेय कहनी तेडा, “अलोम बो-रू सीरिफ बिसवासेमू।” 37अवुर ईसु, पतरस, एकूब अवुर एकूब बोहोत एहुन्‍ना, हेंय सुदा कू सेनेना अवुर एटाःकू मेनेय इकम सेनगड कुआ। 38आराधना ओड़ाः रेनिय मुखिया ओड़ाः रे ईसु तयाःतेड दो, होड़कू अखीर ईयामकू अवुर काँव राँवुः कुय ञेंलतेडा। 39तहाँ ईसु भीतर बोलो केनते हेंकू थरेय कहनी तेडा, “अपे ची लगड पे गुलगोहार केडा? अवुर पे ईयाम तना? कोड़ी चोंडिज बेगारिय गो-जा, नेय दोय गितीज केना।” 40हेंकू ईसु राः मजाक कू उड़ो दोहो एनु, लेकिन ईसु सींड़कू उडूंग केकू ते कोड़ी चोंडिज इंगा अपा अवुर अनेज गतिकू सुदा कोड़ी चोंडिज दोहो एना, हेना भीतर कू बोलो एना। 41अवुर कोड़ी चोंडिज ती सबकेते हेंय थरेय कहनी तेडा, “तलीता कूमी!” न राः मतलोब हवे, “ए कोड़ी चोंडिज इंञ कहनी वम तना रिमुःमी!” 42तहाँ कोड़ी चोंडिज तुरेत्ते रिमकेन तेय सेन बेड़ा एना, नआँ ञेंलकेते होड़कू अखीर कू अहचरज यनु। नेय कोड़ी चोंडिज बारह बरिस रेनिय दोहो एना। 43ईसु हेंकू चेतो केकू तेय कहनी वडकुआ, “नआँ टेबोः कनय अलो पपाड़ी सकोऊ,” अवुरिय कहनी तेडा, “नेय जोमे लगड कनारा पे ओवायू।”

Currently Selected:

मरकुस 5: ksz

Highlight

Copy