मरकुस 6

नसरेत रे ईसु मेनेकू आदर गडिया

(मत्ती 13:53-58; लूका 4:16-30)

1अवुर हेना जघा वरी उडूंग केनते हेंय अनेज गाँव रेय मेजेना, अवुर हेंय रेनकू चेलाकू हो हे-नी सुदा कू सेनेना। 2सब्द राः दिन रे हेंय आराधना ओड़ाः रेय चेडकू दोहो एनु, अवुर अखीर होड़कू अँजोम केतेकू अहचरज यनु। अवुर कू कहनियूँ, “नेय नआँ घियाः टेबोः करा वरी चेडकेना, अवुर नआँ बुदही करा वरिय ञँमकेडा? ची घयते सक्‍ति राः काम मेय ती वरी होयाः तना? 3नेय एटागी मरियोम होपोन भड़हेय हवे, अवुर एकूब, अवुर जोसेफ, एहूदा अवुर सिमोन एडकू मगत हवे, अवुर नेय मीसित एडकू अबू सुदा मेने कू दोहोना किदो?” हेनाते हेंकू मेने कू अपनो गडिया। 4#एहुन्‍ना 4:44हेना वरी ईसु हेंकू थरेय कहनी तेडा, “भविस्यवक्‍ताकू, अनाकू देस रे अवुर अपन हित नातकू, अवुर अपन ओड़ाः रे आदर इजेत एरो कू ञँमतेडा।” 5अवुर होड़कू ईसु थरे मेने कू बिसवास गडा, हेनाते हेंय बगरा होड़कू मेनेय चिकन गडकुआ, अवुर गोटाचार रोगियाकू तीत ते छुँवो केडकू तेय चिकन तेडकुआ। 6अवुर हेंय हेंकू मेने कू बिसवास गडा तेय अहचरज यनु। अवुर चरियो गतर राः गाँव तेय परचार तेडा।

बारह झन परेरित कुय कुलतेडा

(मत्ती 10:1,5-15; लूका 9:1-6)

हेना वरी हेंय गाँव गाँव ते भगवान राः टेबोईय चेडकू दोहो एनु।

7ईसु मसीह बारहो झन अनेज थरेय राःतेड कुआ, अवुर हेंय बबड होड़ तेय कुलतेड कुआ, अवुर हेंकू भूतकू उडूंग लगड अधिकारिय ओवडकू, 8अवुर हेंय हेंकुय हुकूम वडकू, “होर लगड लाठी छोड़ कनर अलोपे गोऊ, न दो रोटी, न झोला, अवुर न बटू रे पेयसा पे गोऊ। 9पनही दोपे तुसींञे, लेकिन बबटटंग कुरता अलोपे तुसींञे।” 10अवुर हेंय कहनी तेडा, “अपे कनय ओड़ाः रेपे उतरोः रेदो, हेना जघा वरी अनायिन पे चलोः मेन दिन हेन ओड़ाः रेपे दोहोनू। 11#परेरित 13:51#लूका 10:4-11जे जघा रेनकू मेने कू आदर इजेत पे, अवुर अपे राः टेबोः मेने कू अँजोमे रेदो, हेना वरी चलोः तोलोग नेकू थरे गोवाही#6:11 भगवान न्यायेः चेका धुड़ी गोवाही एमेयाँ होयाः लगड कटा पे राः धुड़ी पे कुटा अटु।”

12तहाँ हेंकू सेनकेन तेकू परचार तेडा कि मन पे मिड़ाऊ मेनते। 13#एकूब 5:14अवुर हेंकू अखीर होड़कू थरे लगो तनकू भूत कुकू उडूंग तेडा, अवुर अखीर रोगियाकू सुनूम ते ओजाः केडकू तेकू चिकन तेडकुआ।

बतिस्मा ए-माय एहुन्‍ना कू पूजा तेडा

(मत्ती 14:1-12; लूका 9:7-9)

14 # मत्ती 16:14; मरकुस 8:28; लूका 9:19 हेना तोलोग हेरोदेस अंतीपास राजा हो ईसु राः चरचाय अँजोम तेडा। कहेकि ईसु राः ञुमू मिरीज यन दोहो एनु, अवुर कुछ होड़कू कहनिय दोहो एनु, “बतिस्मा ए-मय एहुन्‍ना गोजतन वरिय जियो रिमकेना, हेनाते मेय राः दोवारा ते सक्‍ति राः काम होयाः तना।” 15अवुराःकू कहनियूँ, “नेय एलियाह हवे।” लेकिन कुछ होड़कू कहनी तेडा, “मरित मरिताःकू कनाय भविस्यवक्‍ताकू मेंडे रे मियाँहोड़ मेन हवे।” 16हेरोदेस नआँ अँजोम केतेय कहनी तेडा, “जे एहुन्‍नांञ एर पूजा तेडा हेनी जियो रिमकेना!”

17 # लूका 3:19,20 हेरोदेस दो अनेज बोहोत फिलिप्पुस कन्याँ हेरोदियासिय असुल तेडा, अवुर हेरोदियास राः चलते ते, सिपाहिकू कुलकेड ते, एहुन्‍ना जेहेल रेय एर डलो तेडिया। 18कहेकि एहुन्‍ना हेरोदेस थरेय कहनी तेडा, “अपन बोहोम कन्याँम असुल यडा, हेना जयेज कोवाआ।” 19हेनाते हेरोदियास एहुन्‍ना थरे खुरेसिय सबताडा, अवुर हेरोदियास एर ञेंड गोजेय लगाडिय चहोः दोहो एनु, लेकिन हेंय मेनेय सको गना। 20हेरोदेस एहुन्‍नाय बोरोवा दोहो एनु, कहेकि हेंय धरमी अवुर पवितर होड़िय अड़ींग वय दोहो एनु, अवुर हेंयिय बंचो दोहो एनु, अवुर हेंय राः टेबोः अँजोम केते अखीरिय घबरो यन दोहो एनु, हेंडे रेहो हेरोदेस खुसी ते एहुन्‍ना राः टेबोईय अँजोमे दोहो एनु। 21एक दिन हेरोदेस राः जनम दिन मेजेना, हेंय अनेज रेनकू बड बडे अधिकारिकू अवुर सयनिककू रेनकू मुखियाकू अवुर गलील रेनकू बडे बडे होड़कू लगड खवा पिवाय एर तयार तेडा। हेन तोलोग मोकाय ञँमतेडा। 22तहाँ हेरोदियास कोड़ी होपोन तू हेंकू मँझर रेय मेजेना, अवुर नाच देखो केते हेरोदेस अवुर हेंय सुदा कू दुड़ूब तनकुय खुस तेडा। तहाँ राजा कोड़ी चोंडिज थरेय कहनी तेडा, “अम जे-नाम चहोः तना हेनाम असींञू, इंञ ओवा मिआँ।” 23अवुर हेंय थरेय कीरिया एना, “अम जे-नाम असीञूँ, आमींञ ओवा मिआँ, इंञ ईञाआँ अदहा राज होंञ ओवा मिआँ।” 24हेंय बहेर हनिय उडूंग केनते इंगातिय होंबोर तेडा, “इंञ चिंञ असिआ?” तहाँ इंगत कहनी तेडा, “बतिस्मा ए-मय एहुन्‍ना भोःमी असी!” 25हेंय तुरेत्ते भीतर रे राजा थरेय सेनेना, अवुर हेंय थरेय अरजी एना, “इंञ चहोः तना निनीहो बतिस्मा ए-मय एहुन्‍ना भोः मियाँटंग टठिया रेम एर असी वंञू।” 26तहाँ राजा अखीरिय मन उदास एना, लेकिन कीरिया तनाय हेना चलते ते अवुर अनेज सुदा कू दुड़ूब तनकू राः चलते ते हेंय मेनेय नहकार गडा। 27हेना वरी राजा तुरेत्ते मियाँहोड़ सिपाही एहुन्‍ना भोः पूजा केते अगुय लगाडिय हुकूम वडिया। 28हेंय जेहेल रे सेनकेनते हेंय भोईय पूजा तेडा, अवुर मियाँटंग टठिया रे मँडो केतेय अगतेडा, अवुर हेंय कोड़ी चोंडीजिय ओवाडू, अवुर कोड़ी चोंडिज अनेज इंगत थरेय एमतेडा। 29नआँ खभेर अँजोम केते एहुन्‍ना रेनकू चेलाकू मेजेना, अवुर हेना लास कू गोःतेडा, अवुर मरघटी रेकू जतन तेडा।

परेरितकू मिड़ाः मेजेना

(मत्ती 14:13-14; लूका 9:10)

30जो कुछ हेंकू करो तेडा, अवुर कू सिखो तेडकुआ, हेना परेरितकू ईसु थरे जवर केनते सींड़ टेबोः कू लाय वडियू। 31अवुर अखीर होड़कू सेनुः मेजुः दोहो एनु, अवुर हेंकू जोमुः राः फुरसेत हो मेने ञँमुः दोहो एनु। हेनाते ईसु हेंकू थरेय कहनी तेडा, “अपे इंञ सुदा कनर एटाः सुनहर ओत रे सेनकोःते दमभर बू लुड़ूऊ।” 32हेना वरी हेंकू ईसु सुदा डोंगा रे रकब केनते सुनहर ओत हनते अना कुते कू चलो एना।

ईसु पाँच हजार कोड़ाकुय खियो तेडा

(मत्ती 14:13-21; लूका 9:10-17; एहुन्‍ना 6:1-14)

33अवुर अखीर होड़कू हेंकू चलोः तोलोग कू चिन्हों तेडकुआ, अवुर सींड़ सहर वरी जवर केनतेकू हुंको सेनेना, अवुर हेंकू वरी मड़ंग तेकू सेन हताड़ तना। 34#मत्ती 9:36ईसु अगड़ू केनते अखीर होड़कुय ञेंलवाडा, अवुर हेंकू थरे सोग लगो एना, कहेकि हेंकू बेगर चरवाहकू भेड़िकू घयतेकू दोहो एना, अवुर हेंय हेंकू अखीर टेबोईय चेडतेड कुआ। 35जब मुलुक ते अयुब यनु, तहाँ हेंय रेनकू चेला कुतय हें-नी थरे सेनकेन तेकू कहनी तेडा, “नआँ सुनहर ओत हवे, अवुर मुलुक ते अयुब यना। 36नेकू बिदा कुमू चारियो गतर राः गाँव अवुर बस्ती रे सेनकोःते अपन झपन जो-मे लगड कनर कनारा कू तिला जोमा।” 37लेकिन ईसु जबाब वडकुआ, “अनापे नेकू दो जोमुः लगड कनारा पे ओवाकू।” तहाँ चेलाकू कहनी तेडा, “अले सव दीनार#6:37 एक दिन राः बनी एक दीनार राः रोटी ले तिला अगुयू, अवुर ले खियो कू किदो?” 38तहाँ हेंय हेंकू थरेय कहनी तेडा, “सेनकोःते ञें-लेपे अपे थरे तिमीन रोटी इदाना?” हेना वरी हेंकू जेर केतेकू कहनी तेडा, “पाँच गोटंग रोटी अवुर बाटंग हकुकींञ इदाना।” 39हेना वरी हेंकू सींड़कू हरियारा घाँस ओत रे हिरे हिर ते दुड़ूब लगाडिय हुकूम वडकू। 40हेना वरी हेंकू सव सव अवुर पचास पचास ते हिरे हिर तेकू दुड़ूब एना। 41ईसु पाँचो गोटंग रोटी अवुर बाटंग हकुकींञिय सबतेडा, अवुर सरग हन तको केतेय धन्यवाद वडा, अवुर रोटी टुटका टुटका ते चेला कुतायिय एम गोःवा, अवुर हेंकू होड़कू कू परोसवा, अवुर बाटंग हकुकींञ हो हेंकू सींड़ कुकू हटींग वडकू। 42सींड़ कुकू जोम बियानू, 43अवुर हेंकू बारह छनवाँ रोटी टुटका अवुर हकु कुकू हलँग जवर तेडा। 44रोटी कू जोम तेडा, हेंकू होड़कू करीब करीब पाँच हजार कोड़ाकू दोहो एना।

ईसु दाः तेय सेनतेडा

(मत्ती 14:22-23; एहुन्‍ना 6:16-21)

45हेना वरी ईसु तुरेत्ते अनेज रेनकू चेला कुतय अनेज वरी पहील ते, डोंगा ते रकब कोःते मेना परोम बयेतसदा हनते चलोः लगाडिय कहनी वडकू, अवुर अनेज भीड़ रेनकुय बिदा दोहो एनु। 46हेंकुय बिदा गोड केडरे हेंय बुरू रे बिनतीः लगाडिय सेनेना। 47अंधराः दोहोएन तहाँ, हेना तवर डोंगा समुन्धर मँझर रे दोहो एना, अवुर ईसु समुन्धर अड़ी रे मियाँहोड़ तेय दोहो एना। 48अवुरिय ञेंलतेड कुआ कि चेलाकू डोंगा संभरो संभरो तेकू लँगा यना। कहेकि होय मड़ंग तुकू हनवरी होयोवा दोहो एनु, ईसु लगभग तीन बजे ञींद दाः अगस ते चेलाकू हनतेय सेन इदी तेडा, अवुर हेंकुय खँडा अटु सोतड कुआ। 49लेकिन हेंकू ईसु मसीह समुन्धर तेय से-ने तोलोग भूत हवे मेनते अड़ींग केनते बोर तेकू अहीज दोहो एनु; 50कहेकि सींड़कू ईसु कू ञेंलवाडिया, अवुर कू बोरो तेडा। तहाँ हेंय तुरेत्तेय कहनी तेडा, “अलोपे बो-रू, हिम्मातेपे इंञ हवे।” 51तहाँ हेंय हेंकू थरे डोंगा रेय मेजेना, अवुर होय हो थबदो यनु, हेना वरी हेंकू अखीर कू अहचरज यनु। 52हेंकू रोटी अवुर हकुकू ओवोड कू रेहो ईसु राः सक्‍ति मेने कू समझो गडा, कहेकि हेंकू जीवित कुकू केटेज तेडा।

गन्‍नेसरत रे रोगिया कुय चिकन तेडा

(मत्ती 14:34-36)

53हेंकू खँडा केनते गन्‍नेसरत कू तयाः तेडा, अवुर डोंगा समुन्धर अड़ी रेकू चड़ाँ तेडा। 54हेना वरी हेंकू डोंगा वरी कू अगड़ू एना, तहाँ होड़कू तुरेत्ते हेंय कू चिन्हों तेडिया। 55अवुर आस पास राः सगोर जघा हनतेकू हुंको एना। जहाँ जहाँ ते ईसु इदानियाँ मेनाः खभेर अँजोम केते, रोगियाकू परकोम तेकू गोः बेड़ा तेडकुआ। 56अवुर हेंय कनर रेहो गाँव, सहर, चहे बस्ती रेय सेनुः दोहो एनु, होड़कू रोगियाकू बाजार रे मँडो केकू ते ईसु राः कपड़ा छोर रोगियाकू कम सेकम एनेम छुवों वकू लगड, ईसु थरे कू अरजीः दोहो एनु, अवुर जेतना हेंय कू छुवों दोहो एनु, सींड़ कुकू चिकन जोम दोहो एनु।

Currently Selected:

मरकुस 6: ksz

Highlight

Copy