लूका 11

ईसु चेलाकू बिनती ईय चेडतेड कुआ

(मत्ती 6:9-15)

1एक दिन ईसु मियाँटंग जघा रेय बिनतीः दोहो एनु, बिनती पिटो केन रे मियाँहोड़ चेला कहनी तेडा, “ओ परभु, एहुन्‍ना दो चेला कुतय बिनतीः लगाडिय चेडतेड कुआ, हेन घयते अले हो बिनतीः मी चेड ले।”

2हेना वरी ईसु हेंकू थरेय कहनी तेडा, “न याःतेपे बिनतिऊ, ‘ओ अपा, अम ञुमू पवितर गिआ, अमाः राज मेजुऊ। 3अले दिन भराआ अन्‍न रोज मी ओवा ले। 4अले हो अले राः बिरूध रेकू कसूरेः हेंकू ले माफा, हेन घयते अले राः पाप होम माफे अवुर अले परिक्छा रे अलोम एनेम पड़ो वले’।”

बिनतीः हेना राः बारे ईसु चेडतेड कुआ

(मत्ती 7:7-11)

5हेना वरी ईसु फे-रिय कहनी तेडा, “मान ले अपे मेंडे रे कनय अदहा रात गतित ओड़ाः रे सेनकोःते, ‘पँयचा ते पेयटंग रोटीम ओवाञूँ मेनतेय असियू, 6इंञ गति कनर हनतेय चलोः तोलोग निनीहो इंञ ओड़ाः रेय मेजकेना, हेंय खियो लगड इंञ थरे कनर कोवाआ।’ 7अवुर हेंय भिनीतर वरिय कहनियूँ, ‘इंञ अलोम अफेतिञूँ, अले इंगन होपोन तेले गितीज तना, रात भर लगड दुवारिंञ सींञ केडा। हेनाते निहों इंञ रिमकोःते कनर सहेता एरोंञ एम सको एना।’ 8इंञ अपेंञ लाय वताना, हेंय गतित हवे ते हेंय रिमकोःते मेनेय ओवायू, अगर बित्ताही ढीठ केते दुवारिय ठोकोवे रेदो, रिमकोःते जे चीजिय असिआ हेना जरूरिय ओवाया।

9हेनाते इंञ अपे थरेंञ कहनी यडा, अपे असिय महल रेपे दोहोन रेदो, अपे असिय हेनाय ओवा पेआ। अपे छपई महल रेपे दोहोन रेदो, अपे छपई हेना पे ञाँमेआँ, ठोकोवे महल रेपे दोहोन रेदो, अपे लगड दुवारिय जीजेआ। 10कनय हो असिय रेदो कू ओवाया, अवुर जे छपई हेनी, ञाँमेआयू। अवुर दुवारिय खटखटोः हेनी लगड कू जीजेआ। 11अगर अपे मेंडे रे कनय हो, कोड़ा होपोन तू अपत थरे रोटिय असी रेदो, थोरे दिरिय ओवाया, अवुर हकुय असी रेदो, हकु राः बदला ते थोरे बीञिंय ओवाया। 12चहे होनोनीय असी रेदो, किदींञ थोरेय ओवाया। 13अपे खराब होड़कू घलि, चोंडिजकू तपे बढ़ियाँः चीज पे ओवा कुआ, दो अपे सरग रेनिय भगवान अपा, पवितर आत्मा असीः हेंकू ची लगड एरोय ओवड पेआ?”

ईसु अवुर बालजबूल

(मत्ती 12:22-30; मरकुस 3:20-27)

14एक दिन फेर ईसु गूँगी भूतिय उडूंग तेडा। हेंय उडूंग एन तहाँ दो गूँगा होड़ टेबोः दोहो एनु, हेना वरी हेंय ञेंलकेते होड़कू अहचरज यनु। 15#मत्ती 9:34; 10:25लेकिन हेंकू मेंडे रे कुछ होड़कू कहनी तेडा, “नेय दो भूतकू रेनिय मुखिया बालजबूल राः सहेता ते भूतकुय उडूंग यडा।” 16#मत्ती 12:38; 16:1; मरकुस 8:11सही मेते ईसु भगवान कुलकेडिया किदो बेगर मेनाआँ पपाड़ी लगड कुछ होड़कू अगस वरी मियाँटंग चिन्ह तिब लगड कू कहनी सोवाडिया।

17हेंकू मन मन रेकू पसींद तेडा, हेना ईसु पपाड़ी केनते हेंकू थरेय कहनी तेडा, “जे जे राज रेनकू होड़कू एक जूट ते मेने कू दोहोना, हेना राज रेनकू होड़कू तितीर बितीर जोमाकू; अवुर जे ओड़ाः रे एक जूट ते मेने कू दोहोना, हेना ओड़ाः खंघार जोमा। 18इंञ दोपे कहनी वंञ तना सयतान राः सहेता ते भूतकुय उडूंग यडा मेनते, अगर सयतान अनानेज रअय बिरोध रेदो, हेंय राः राज काःते बनो बगी कोआ? 19अगर इंञ सयतान राः सहेता ते भूत कुंञ उडूंग यड रेदो, अपे रेनकू चेलाकू ईया राः सहेता तेकू उडूंग कुआ? हेनाते अपे राः हेनकू न्यायेआ। 20अगर इंञ भगवान राः सक्‍ति ते भूत कुंञ उडूंग यड रेदो, भगवान राः राज अपे राः मँझर रे मेजियाना। 21अगर बहगँड़ होड़ हथियार सबकेते ओड़ाः तुय पहरा रेदो, हेंय राः अन धन कनय एरो लुसी सको एना। 22अगर हेंय वरी मियाँहोड़ बहगाँड़य टुटोः रेदो, हेंयिय हरोविया अवुर जे हथियारिय भरोसा वआ, हेना लुसी केते हेंय राः सींड़ अन धनिय हटींग गोत्तेआ। 23#मरकुस 9:40इंञ गतर रे कोवाया, हेनी होड़ ईञाः बिरोध रेया, अवुर इंञ सुदा मेनेय सकेल कुआ, हेंय होड़कुय अलग तलागा।”

अधूरा सुधार ते बिपेत

(मत्ती 12:43-45)

24“कनय होड़ वरी भूत उडूंग जोम तहाँ, लुड़ूः लगड पुयूर ओतिय छपा बेड़ाआ, हेना वरी मेनेय ञाँमे तहाँय कहनियाँ, ‘जे ओड़ाः वरिंञ उडूंग केना हेन ओड़ाः रे फेरिंञ मिड़ाः सेनुआँ।’ 25मिड़ाः मेजुः तहाँ हेंय हेना ओड़ाः साफ सुथरा अवुर सजोता तोलोगिय ञाँमेआँ। 26हेना वरी हेंय अनेज वरी हो सात गोटंग अवुर जरजठ भूतकुय आगा। हेना वरी हेंकू हेंय होड़ थरे कू रसो बसो जोमा, अवुर हेंय होड़ राः दसा पहीलाः वरी हो बेहज जोमा।”

ईया आसीसित गिआ?

27ईसु नआँ टेबोईय टेबोः तोलोग, हेना भीड़ वरी मियाँहोड़ कोड़ीहोन बडे बडे तेय कहनी तेडा, “आँमिय जनम केडा, अवुर दुदूय पियो केडमिआँ, हेनी तीमिन आसीसित गिआयू।” 28हेना वरी ईसु कहनी तेडा, “हे, भगवान राः टेबोः अँजोम केते, मनोवेः हेंकू आसीसित गिआकू।”

सरग राः चिन्ह कू ञँम बेड़ाआ

(मत्ती 12:38-42)

29 # मत्ती 16:4; मरकुस 8:12 अखीर होड़कू जवारूः दोहो एनु, तहाँ ईसु कहनी तेडा, “नआँ जबाना रेनकू होड़कू अखीर कू उजड़ यना, नेकू चिन्ह कू ञँम बेड़ा यडा। जोना#11:29 मरिआ नियम रेनिय भविस्यवक्‍ता राः चिन्ह छोड़ अवुर कनर चिन्ह एरोंञ तिबवड कुआ। 30जेयसे जोना नीनवे सहर लगड चीनिय ठहरो एना, हेन घयते होड़ होपोन हो, नआँ जबाना रेनकू होड़कू लगड चीनिय ठहरोआ। 31सिबा देस रेनिय रानी,#11:31 सिबा देस रेनिय रानी नेय एहूदी जात रेनिय मेनेय दोहो गना, नेंकू एक हजार छो सव किलो मीटर सगींञ वरी मेजकोः ते सुलेमान भगवान बुद्हिय ओवाडिय हेना अँजोम लगाडिय मेजुः दोहो एनु। अवुर नआँ जबाना रेनकू होड़कू सुदा न्याय होयाः चेका चड़ाँ कोःते नेकुय दोस कुआ, कहेकि नेय धरती राः छोर वरी सुलेमान राः टेबोः अँजोम लगाडिय मेजेना। अवुर अँजोम पे, नआँ रे सुलेमान वरी हो बडेअय होड़ इदाना। 32नीनवे रेनकू होड़कू न्याय होयाः चेका नआँ जबाना रेनकू होड़कू सुदा कू चड़ाआँ, कहेकि नीनवे रेनकू जोना राः परचार अँजोम केते मन कू मिड़ाः तेडा, अवुर अँजोम पे, नआँ रे जोना वरी हो बडेअय इदाना।”

ईसु आत्मिक दीया राः बारे तेय चेडकू दोहो एनु

(मत्ती 5:15; 6:22-23)

33 # मत्ती 5:15; मरकुस 4:21; लूका 8:16 “कनय होड़ दीया जबके ते मेनेय उकुया, अवुर हेना कनारा चीज ते मेने कू हरूबेआ। हेना भीतर बहेर बोल उडूंगुःकू मरसलवा लगड अगस रेकू टेंगवा तआ। 34लेकिन अमाः देंह राः ढिबरी मेड मी हवे, मेड मी फरी गिरेदो, अमाः गोटा देंह रे मरसालेआ। लेकिन मेड मी फरी कोवाः रेदो, अमाः देंह अंधरा ओत हनते गोगेआ। 35हेनाते सँवचेती तेम दोहोनू, भगवान अमाः देंह रे इंजोतिय एमकेडा, हेना अलोम इकम अंधरावा। 36अमाः देंह इंजोत ते भरो केन रेदो, कनर हँडे अंधरा कोवाआ। हेंडे दीया जबता घयते एयसा चमकोआ।”

ईसु एहूदी नियम चेचेडकू अवुर फरीसिकू राः गलतिय लाय तेडा

(मत्ती 23:1-36; मरकुस 12:38-40; लूका 20:45-47)

37ईसु टेबोः दोहो एनु, हेन तोलोग कनय मियाँहोड़ फरीसी इंञ ओड़ाः रेम जोमुः मेनते गोड़िय गिरो एना, हेना वरी हेंय ओड़ाः सेनकेन ते ईसु जोमूईय दुड़ूब एना। 38अवुर हेंय बेगर अंचा ते जोमूईय दुड़ूब एना, हेना ञेंलते फरीसिकू अहचरज यनु।

39तहाँ परभु हेंकू थरेय कहनी तेडा, “ए फरीसिकू, अपे डुबहा अवुर टठिया अगस अगस दोपे मँजो वेआ, लेकिन अपे भीतर रे कचरा अवुर दुस्टता भरो केना। 40ए बोया होड़कू, बबानोवय बहेर तुय बनो केडा, दो भीतर तू बेगारिय बनोआ किदो? 41अपे, बरतन भीतर राः चीज कनय गरीब होड़कू पे ओवा रेदो, अपे लगड सींड़ चीज अमिञुआँ।”

42“लेकिन ए कपटी फरीसिकू, अपे अखीर दुख रेपे पड़ोआ, अपे तेने मेनाः अपन कर कमाय राः दसवाँ अंस दोपे एमेया। लेकिन होड़कू सुदा बढ़ियाँ ते मेने पे चाल बेहवारुआ, अवुर भगवान सुदा परेम हो मेने पे रखोवेआ, जयेज ए दोहो एना कि नआँ होपे करो तेडू अवुर हेना हो अलोपे बगी तेडू। 43ए फरीसिकू, अपे हो अखीर दुख रेपे पड़ोआ, आराधना ओड़ाः रे बड बडेआ पद, अवुर बाजार ते जोहार वपेः हेना पे ञँम बेड़ाआ। 44अपे हो अखीर दुख रेपे पड़ोआ, कहेकि अपे ओतेत रे मिलो कोआ मरघटी घयते इदान पेआ, अवुर होड़कू हेना अगस तेकू से-नेआ, लेकिन भीतर रे सोया कोआ, हेना मेने कू पपाड़िआ।”

45एहूदी नियम चेचेडकू वरी मियाँहोड़ जबाब वडिया, “ए गुरू, नआँ घयतेम कहनी यड रेदो, अम अलेम निन्दा यडा।”

46ईसु कहनी तेडा, “अपे एहूदी नियम चेचेडकू हो अखीर दुख रेपे पड़ोआ, कहेकि मेने रिम सकोः हेना बोझवा, एटाःकू पे लदगो हँबाला, खुदे अंगरी पेते घलि मेने पे घसको वेआ। 47अपे अखीर दुख रेपे पड़ोआ, नआँ तीमिन दुख राः टेबोः हवे, अपे भविस्यवक्‍ताकू लगड मरघटी पे बनो यडा, अपे रेनकू दादी पुरखाकू हो हेंकुकू ञेंड गोजतेड कुआ। 48अपे दादी पुरखाकू राः काम रे सहमत इदान पेआ, कहेकि हेंकू भविस्यवक्‍ता कुकू ञेंड गोजतेडा, अवुर अपे हेंकू राः मरघटी पे बनो यडा। 49हेनाते अपे राः बारे ते भगवान अपन गियान तेय कहनी केडा, ‘इंञ हेंकू थरे भविस्यवक्‍ताकू अवुर परेरित कुंञ कूला, हेना मेंडे केय झनकू ञेंड गो-जा, अवुर केय झनकू सतो कुआ।’ 50हेनाते दुनिया राः बोंहड़ित वरी भविस्यवक्‍ताकू राः रक्‍ती कू बोहो तेडा, हेंकू राः हिसाब भगवान नआँ जबाना रेनकू होड़कू थरेय तिलाया। 51हाबिलिय ञेंड गोजतेड वरी अखरी रे जकरयाह धाम अवुर पवितर अस्थान राः मँझर रेकू ञेंड गोजतेडिया। इंञ अपे थरे सही मेतेंञ कहनी यडा, जकरयाह अँगम राः हिसाब भगवान नेन समय रेनकू होड़कू थरेय तिलाया। 52एहूदी नियम चेचेडकू अपे हो दुख रेपे पड़ोआ। भगवान थरे काःते सेनुआ, हेना पे पपाड़ी तन रेहो मेने पे लाय यडा। अपे खुदे मेने पे सेनियाडा, अवुर सेनियड कू हो मेने पे इकाम सेनवाँ कू तना।”

53हेना वरी ईसु उडूंग एना, तहाँ एहूदी नियम चेचेडकू, अवुर फरीसिकू अखीर टेबोः चोरा लगड सवाल कू होंबोरियू, अवुर हेंय राः पीछा कू लगो यनु। 54अवुर हेंय अहा वरी कनर गलती टेबोः पकड़ो लगड तक तक रेकू दोहो एना।

Currently Selected:

लूका 11: ksz

Highlight

Copy