परेरित 14

इकुनियुम रे पवलुस अवुर बरनबास

1इकुनियुम रेहो पवलुस अवुर बरनबास एहूदिकू राः आराधना ओड़ाः रे मियाँ मियाँ तेकींञ सेनेना। अवुर एयसा कींञ टेबोः तेडा कि एहूदिकू अवुर उनानिकू, नेकू बनर जात रेनकू अखीर कू बिसवास तेडा। 2लेकिन मेने बिसवासेःकू एहूदिकू, अनजातकू हेंकींञ राः बिरोध रेकू भड़को तेडकुआ, अवुर कू एचे चिड़हो गोत्तेड कू। 3पवलुस अवुर बरनबास हेना रे अखीर दिन अँगम कींञ दोहो एना। अवुर परभु राः बारे ते हिमत केते कींञ लाये दोहो एनु। परभु हेंकींञ राः दोवारा ते चिन्ह चमत्कार, अवुर अहचरज कामिय देखो केते, अनेज राः दया राः खभेर मतलोब बढ़ियाँः खभेर राः गोवाहीकिंञ एम दोहो एनु। 4लेकिन सहर रेनकू होड़कू अलग तलग यनकू; कुछ होड़कू एहूदिकू हनते अवुर कुछ होड़कू परेरितकू हन गतर यनकू। 5अनजातकू अवुर एहूदिकू अकू रेनकू अघुवाकू सुदा, परेरित कींञ बेज्जती कींञ लगड अवुर दिरी ते ञेंड गोजकींञ लगड कू मतर एना। 6तहाँ परेरित कींञ नआँ टेबोः कींञ पपाड़ी एना, हेना वरी हेंकींञ लुकाउनिया छेतर राः लुस्तरा अवुर दिरबे सहर रे अवुर आस पास राः जघा तेकींञ ञींरेना, 7अवुर हेना हेनाते बढ़ियाँः खभेर कींञ लाय दोहो एनु।

लुस्तरा अवुर दिरबे रे

8लुस्तरा सहर रे मियाँहोड़ दुड़ूब तना, हेंय कटत मेने चलोः दोहो एनु। हेंय जनम वरी खोड़ाय दोहो एना, अवुर कबोह मेनेय सेनगाडा। 9हेंय पवलुस राः टेबोईय अँजोम दोहो एनु। पवलुस हेंयिय ञेंलहँड़ी वडिया, अवुरिय पपाड़ी यन कि मेय चिकानुः राः बिसवास इदाना। 10हेना वरी पवलुस बडे तेय कहनी तेडा, “कटम राः बल तेम चड़ाँऊ!” हेना मेनकी हेंय डिडी रिमकेन तेय सेन बेड़ाऊ। 11होड़कू पवलुस राः काम कू ञेंलतेडा, तहाँ हेंकू लुकाउनिया भासा ते अहीज केनतेकू कहनी तेडा, “देवता कींञ, होड़कू राः भेस ते अबू राः मँझर रेकींञ अगड़ू मेजकेना।” 12हेंकू बरनबास दो जयूस देवता, अवुर पवलुस दो हिरमेस देवता मेनते कू कहनी वडकिञूँ, कहेकि पवलुस टेबोः चिली रे अघुवाय दोहो एना। 13जयूस देवता राः मँडिल हेंकू राः सहर वरी बहेर हँडे दोहो एना। हेना मँडिल रेनिय आजक बयेल अवुर बहा राः मला सबकेड ते, सहर राः गेट रेय सेनेना, कहेकि हेंय भीड़ रेनकू होड़कू, बरनबास अवुर पवलुस देवता मनो केडकींञ ते, हेंकींञ मड़ंग रे बलि कू रकब मेनते कू सँबह एना। 14हेना वरी बरनबास अवुर पवलुस परेरित कींञ, नआँ टेबोः कींञ अँजोम तेडा, तहाँ दुख केनते अनाकींञ राः कपड़ा कींञ ओड़ेज तेडा, अवुर भीड़ तनकू होड़कू मँझर कींञ हुंको बोलो यनु, अवुर बडे आवाज तेकींञ कहनी तेडा, 15“ए होड़कू! अपे नआँ ची पे ची यडा? अलिंञ हो अपे घयते दुख सुख सहो कींञ होड़कींञ हवे। अलिंञ अपे बढ़ियाँः खभेर लिंञ लाय वपे तना, अपे नआँ बेकार गिआ, हेना बगी वते जीवातय भगवान हनते पे मिड़ाऊ, हेंय सरग, धरती, अवुर समुन्धर अवुर जो कुछ हेना रे इदाना, हेनाय बनो केडा। 16बितो यना जबाना रे, हेंय सींड़ होड़कू अपन झपन होर तेय इकम सेन वडकुआ। 17हेंडे रेहो हेंय अनेज राः साबूतिय तिब अगकेडा, हेंय अगस वरी दाईय एर उयू गेआ, अवुर सही समय रे फसल एमकेते अपे थरे अनेज राः दयाय तिब तेडा; हेंय अपे लगड मुलुक ते अनाजिय ओवा पेआ, अवुर अपे राः मानिय बहाली गोत्तेआ।” 18नेन याःते हेंकींञ लाटपाट ते बलि अलोपे रकाबे मेनते कहनी केते, होड़कू कींञ रोको तेडा।

19हेना वरी कुछ एहूदिकू अन्ताकिया अवुर इकुनियुम सहर वरी मेजकेनते, भीड़ रेनकू होड़कू, अकू गतर हनतेकू ओरतेड कुआ। अवुर हेंकू पवलुस दिरी तेकू ञेंडतेडिया, तहाँ गोजियानाय अड़ींग वडिय ते, सहर वरी बहेर हनतेकू ओर उडूंग तेडिया। 20लेकिन चेलाकू पवलुस थरे चरियो गतर रेकू जवर यनु, तहाँ पवलुस रिमकेन ते सहर हनतेय मिड़ाः सेनेना। अवुर एटाः देवह हेंय बरनबास सुदा दिरबे सहर हनते कींञ चलो एना।

सीरिया राः अन्ताकिया सहर रेय मिड़ाः एना

21हेंकींञ हेना सहर रेनकू होड़कू बढ़ियाँः खभेर कींञ लाय वडकुआ, अवुर अखीर चेला कुकूकींञ बनो तेडा। हेना वरी तयोम ते हेंकींञ लुस्तरा, इकुनियुम अवुर अन्ताकिया हनते कींञ मिड़ाः एना। 22अवुर हेंकींञ चेलाकू राः मन कींञ मजबूत गोःतेडा, अवुर बिनीसवास बगिता लगड कींञ चेडतेड कुआ, अवुर कींञ कहनी तेडा, “अबू अखीर दुख तकलिप सहो केते, भगवान राः राज रेबू सेनुआँ।” 23पवलुस अवुर बरनबास सगोर कलीसिया ते कलीसिया चलो लगड अघुवाकू कींञ चड़ाँ तेडा, अवुर उपास अवुर बिनती केनते, हेंकू परभु राः ती रेकींञ जिमा तेडकुआ, ने-नी परभु थरे हेंकू बिसवास तेडा।

24हेना वरी हेंकींञ पिसिदिया ते पंफूलिया रेकींञ तयाः तेडा; 25अवुर पिरगा सहर रे हेंकींञ भगवान राः बचन लाय केडते, अत्तलिया रेकींञ सेनेना। 26हेना वरी हेंकींञ जहाज ते अन्ताकिया कींञ मिड़ाः मेजेना, हें-डे हेंकींञ भगवान राः किरपा तेकू जिमा वडकिञाँ, हेना काम अब कींञ पूरा केडा। 27हेना रे तयाः केते हेंकींञ कलीसिया रेनकू होड़कू कींञ राःतेड कुआ, अवुर हेंकींञ सींड़ बडे बडेआ काम जो भगवान हेंकींञ सुदा दोहो केनतेय करो तेडा, हेना होड़कू कींञ लाय वडा, अवुर नआँ होकींञ लाय तेडा, करेःते भगवान अनजातकू बिसवासे लगड दुवारिय जिजकेडा। 28अवुर हेना रे हेंकींञ चेलाकू सुदा अखीर दिन मेनते कींञ दोहो एना।

Currently Selected:

परेरित 14: ksz

Highlight

Copy