परेरित 1

परिचय

1ए थियोफिलुस, इंञ पहीलाः कागद रे ईसु जो कुछिय करो तेडा, अवुर हेंय राः सिक्छा राः बारे तेंञ लिखो वडमिआँ।#लूका 1:1-4 2कामिय बोंहड़ी तेड वरी अगस हनते अनायीनिय रिम गोगेय मेन दिन हेंय ची चीय करो तेडा, अवुर ची चीय चेड दरवर तेडकुआ, हेना सींड़ टेबोईंञ लिखो केडा। अगस हनते अनायीनिय रिम गोगेय रे ईसु अनेज रेनकू परेरितकू पवितर आत्मा राः दोवारा तेय हुकूम वडकुआ। 3गोजेन वरी तयोम ते केय्यो एस ईसु जीवत तेकू ञेंलवाडिया। नेन घयते इंञ जीवत गिअंञ मेनाआँ, हेंकू पक्‍का साबूतिय तिःवाड कुआ। अवुर चालीस दिन अँगम मेनतेय देखर एना, अवुर चेलाकू भगवान राः राज राः बारे तेय चेडकू दोहो एनु। 4मियाँ एस ईसु हेंकू सुदा जोमुः तोलोगिय कहनी वडकू, “एरुसलेम अलोपे बगिवा बल्कि अपुंञ ईनाम ए-मे लगाडिय जबान केड हेना अनायिन पुरोः मेन दिन तँगिय पे,#लूका 24:49 अवुर इंञ नआँ जबान राः बारे तेंञ लाय वडपेआ। 5एहुन्‍ना दो दाः ते बतिस्माय एमतेडा, लेकिन कुछ दिन बाद रे पवितर आत्मा ते अपे बतिस्मा पे ञाँमा।”#मत्ती 3:11; मरकुस 1:8; लूका 3:16; एहुन्‍ना 1:33

ईसु सरग हनतेय चलो एना

6हेंकू मियाँ रेकू जवार तन तोलोग ईसु कू होंबोर तेडिया, “ए परभु, अम नीनिहों इसराएलिकू राः राज इसराएलिकू राः हाँथ रेम मिड़ागेआ किदो?”

7तहाँ ईसु हेंकू थरेय कहनी तेडा, “भगवान अपा फसला केड हेना दिन अवुर समय पपाड़ीः लगड अपे राः काम कोवाआ, नआँ सींड़ टेबोः हें-नी राः हाँथ गाँथ रेआ। 8लेकिन अपे थरे पवितर आत्मा मेजुः रे हेंडे अपे सक्‍ति पे ञाँमा, अवुर एरुसलेम अवुर गोटा एहूदा अवुर सामरिया ते अवुर धरती राः अखरी छोर अँगम अपे ईञाः गोवाहिकू पे बनोआ।”#मत्ती 28:19; मरकुस 16:15; लूका 24:47,48 9नेंदोरा टेबोईय टेबोः केड राः बाद रे होड़कू राः देखते देखत ते भगवान अगस हनते ईसुय रिम गोःतेडिया, अवुर लिंबिर ते उकू गोत्तेडियू।#मरकुस 16:19; लूका 24:50,51 10हेंय चलोः तोलोग हेंकू अगस हन कू तेरेज दोहो एनु, तहाँ बा होड़ कोड़ाकींञ पुंडी पुँडिआ चमकोआ कपड़ा तुसींञ केते हेंकू बँदे रेकींञ मेन चड़ाँ यनु। 11अवुर हेंकू थरे कींञ कहनी तेडा, “ए गलील रेनकू होड़कू, अपे सरग हन ची पे तेरेज यडा? ने-नी ईसु, अपे वरी सरग हनतेय रिम गोःयाडिया, जेयसे अपे सरग हनते पे ञेंल गोडवाडिया, हेन घयते फे-रिय मेजुआ।”

एहूदा राः जघा रे मत्तिया कू चुनो तेडा

12तहाँ चेलाकू जयतुन काठ इदान हेना बुरू वरी एरुसलेम हनतेकू मिड़ाः मेजेना, (नआँ अधा कोस मेन दोहो एना मतलोब सब्द राः दिन जेतना कू सेन सकोआ, हेना मेन सँगिंञ दोहो एना)। 13अवुर नेकू एरुसलेम कू तयाः केडते अगस कोठरी रे जहाँ रेकू दोहोन दोहो एनु, हेना रेकू सेनेना, हेंकू नेकू हवे ः पतरस, अवुर एहुन्‍ना, अवुर एकूब, अन्दिरयास, फिलिपुस, थोमा, बरतुलमय, अवुर मत्ती, अवुर हलफई कोड़ा होपोन एकूब, अवुर सिमोन जेलोतेस, अवुर एकूब कोड़ा होपोन एहूदा।#मत्ती 10:2-4; मरकुस 3:16-19; लूका 6:14-16 14नेकू सुदा केय झन कोड़िकू होकू दोहो एना, अवुर ईसु इंगत मरियोम अवुर हेंय बोहोत एडकू सुदा एक मन केनते बिनतीः महल रेकू दोहो एना।

15हेन तोलोग पतरस लगभग एक सव बीस झन ईसु थरे बिसवासेःकू दोहो एना, हेंकू मँझर रे चड़ाँ केनतेय कहनी तेडा, 16“ए भाईकू, एहूदा राः बारे ते धरमग्रंथ रे लिखल इदाना, हेना टेबोः उतरोः लगड जरूरी दोहो एना, कहेकि दाऊद पवितर आत्मा राः दोवारा ते पहील तेय लाय तडा, नेय एहूदा ईसु पकड़ोकू रेनिय अघुवा दोहो एना। 17नेय अबू चेलाकू मेंडे मियाँहोड़ दोहो एना, अवुर नेय, परभु अबू सुदा काम लगाडिय रखो तडिया। 18(एहूदा अनेज राः अधर्म काम राः पेयसा ते मतलोब ईसुय एर पकड़ो तेडा पेयसा ते खेतीय तिला तेडा, हेनारे हेंय बिडकेन तेय लोजोर एना, अवुर लजतू पोटिज उडूंग यन दोहो एनु। 19अवुर नआँ राः बारे ते एरुसलेम रेनकू सींड़ कुकू पपाड़ी दोहो एनु, हेनाते नआँ लोहू राः खेत मतलोब ‘हकलदमा’ मेनते हेंकू भासा तेकू कहनी वआ।)#मत्ती 27:3-8

20कहेकि सिरिंग रे लिखो केना,

‘हेंय राः ओड़ाः उजाड़ुऊ,

अवुर हेना रे कनाय अलोकू दोहोनू’#सिरिंग 69:25

अवुर नआँ घयते हो लिखल इदाना,

‘हेंय राः जघा कनय एटागी अँगेरे।’#सिरिंग 109:8

21हेनाते परभु ईसु जेतना दिन अबू सुदाय सेन बेड़ा एना, मतलोब एहुन्‍ना बतिस्मा ए-मय वरी सरग हनतेय रिम गोःतेडिया, हेना मेन दिन अबू सुदा लगातार ते दोहोनय मियाँहोड़ होड़, 22ईसु मसीह जियो रिमकेनाय हेना राः गोवाहिय बनोऊ, नआँ जयेज गिआ।”

23तहाँ चेलाकू बा होड़ कू चड़ाँ तेडा, मियाँहोड़ उसुफ दोहो एना, नेय बरसबा मेनते कू कहनी वय दोहो एनु, अवुर रोम रेनकू नेय उस्तुस मेनते होकू कहनी वय दोहो एनु, अवुर मियाँहोड़ ञुमू मत्तियाह मेनते दोहो एना। 24अवुर चेलाकू बिनती एना, “ए परभु, अम सींड़कू राः मन मी पपाड़िआ, नेकींञ बा होड़ मेंडे काय मी चुनो केडा, हेंय मी तिःवाले। 25ताकि एहूदा लगड दोहो एना जघाय#1:25 परेरित राः पद अँगेरू, कहेकि एहूदा सगोर चेला काम बगी वते अपन जघा हनतेय चलो यना।” 26तहाँ हेंकू बना होड़ ञुमू ते चिट्ठी कू डलो तेडा, अवुर मत्तियाह ञुमू ते हेना चिट्ठी उडूंग एना, हेना वरी हेंय ग्यारह झन परेरितकू सुदा, बारह झन यनाकू मेनते कू लेखा तेडिया।

Currently Selected:

परेरित 1: ksz

Highlight

Copy