ZEKARIA 5
5
1Cheka nawa yinguhetula meso jami, yingumona mukanda umwe wa chivungo unahumuka. 2Aye yamba kuli yami ngwenyi, Yika unamono? Yingukumbulula ngwami, Ngunamono mukanda wa chivungo unahumuka; usuhe wawo makumi aali a mbandu, ni utohe wawo kumi lia mbandu. 3Henaho yamba kuli yami ngwenyi, Lie shingo lienalio linayi chifuchi cheswe, mumu kulutwe mweswawo meya chuma mamusuma nikulita ni mukanda, ni mweswawo malishinga ni mahuza mamusutula nikulita nawo. 4Yehova-wa-Tujita kanambe ngwenyi, Munguutuma mba muunjila mu zuwo lia mwiji, ni mu zuwo lia mukwa kulishinga ni mahuza ni jina liami, mba muutwama mu zuwo lienyi nikulilia lieswe, ni mitondo ni mawe.
5Mba mungelo yoze wahanjikile ni yami yakundama, yamba ngwenyi, Hetula meso je umone. Chino chinayi, chika? 6Yingwamba ngwami, Mba chika? Aye yamba ngwenyi, Yino ye *efa yakwenda. Yamba nawa ngwenyi, Uno we uhenge chifuchi cheswe. 7Kumanyi chifuko cha shumbu achizundwile; umwe pwo unatwama muchima lia *efa! 8Mungelo ngwenyi, Yono we Ungulungulu. Mba yamukona mu *efa nikusa chifuko cha shumbu ha kanwa liayo. 9Yinguhetula meso jami, kumanyi mapwo aali anakundama! Fuji yapwile mu mapulwa jo, te kali ni mapulwa ngwe a chitokola, mba yazundula ye *efa hakachi mu tetela. 10Yingwamba kuli mungelo yoze wahanjikile ni yami ngwami, Kulihi anatwala ye *efa? 11Aye yamba kuli yami ngwenyi, Ku chifuchi cha Shinare akayitungile zuwo, mba muze halifunga matumbikilako ye efa ha umanyino wayo.
Currently Selected:
ZEKARIA 5: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
