ZEKARIA 6
6
1Cheka nawa yinguhetula meso jami, yingumona matemba-a-jita awana kanatuhuka hakachi ka milundu yiali. Milundu te milundu ya unengu. 2Temba litangu liapwile ni tuvwalu achila; liamuchiali tuvwalu alá; 3liamuchitatu tuvwalu atoma; temba liamuchiwana tuvwalu a yipekayipeka ya kutomonoka. 4Yinguhula mungelo yoze wahanjikile ni yami ngwami, Wano kuchi apwa, mwene wami? 5Mungelo yangukumbulula ngwenyi, Wano fuji jiwana ja malilu jize jakutuhuka muze te halikunjika kuli Mwene wa hashi heswe. 6Temba lia tuvwalu alá linayi kutalikisa ku chifuchi ku Norte; atoma kanayi kutalikisa ku chifuchi ku Chitokelo; akwa yipekayipeka o kanatalikisa ku chifuchi ku Sule. 7Ha kutuhuka tuvwalu kanalipupwisa kuya akendeleze hashi. Mba iye yamba ngwenyi, Yénu nukendeleze hashi. Chocho yaya nikwendeleza hashi. 8Mba yakololoka kuli yami ngwenyi, Waze hatalikisa ku chifuchi cha ku Norte hatulisa Spiritu yami ha chifuchi cha ku Norte.
9Liji lia Yehova yiliza kuli yami ngwenyi, 10Sakula kuli njize Heldai, ni Tobija, ni Jedaia, waze hanakatuka ku Babilonia haneza, nukaye tangwa lioliene ku zuwo lia Josia mwana Zefania. 11Tambula kuli ayo prata ni oru; linga yipangula ukayise ha mutwe wa sasendote mukwa lutwe Yoshua mwana Jehozadake, 12ukambe kuli iye ngwe, Yehova-wa-Tujita kanambe ngwenyi, Talenu mwe lunga jina lienyi Mutango; mumu makatatuka muma mwenyi; makatungisa tembele ya Yehova. 13Iye mwene makatungisa tembele ya Yehova; uhenya wa wanangana muukapwila hali iye, mba makatwama nikuyula ha ngunja yenyi. Ku ngunja yenyi kumukukapwa sasendote; hakachi ko aali makalitesa ni sambukila. 14Yipangula yize muyipwa mu tembele ya Yehova, Chiwulwiso kuli Heldai, ni Tobija, ni Jedaia, ni Hene mwana Zefania.
15Waze ali kusuku makeza akakwase kutunga tembele ya Yehova, mba mununyingika Yehova-wa-Tujita wangutumine kuli yenu. Chino muchiza kupwa nyi munwononoka ku liji lia Yehova Zambi yenu ni mbunge yeswe.
Currently Selected:
ZEKARIA 6: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
