ZEKARIA 7
7
1Ha mwaka wamuchiwana wa mwanangana Dariu liji lia Yehova yiliza kuli Zekaria ha tangwa liamuchiwana lia kakweji wamuchilivwa (wa Chisleve). 2Achi akwa Mbetele te hatuma Sharezere ni Rejeme-Meleke ni malunga jo akafupe vumbi lia Yehova, 3akahule asasendote a zuwo Iia Yehova-wa-Tujita ni aprofeta ngwenyi, Changutamba kulinyenga ni kulitwamina kulia ha kakweji wamuchitano chizechene ngwe nakulinga miaka yino yinji nyi ka? 4Mba liji lia Yehova-wa-Tujita yiliza kuli yami ngwenyi, 5Amba kuli atu eswe a mu chifuchi hamwe ni asasendote ngwenu, Ha kulitwamina kulia ni kulinyenga ha kakweji wamuchitano ni wamuchishimbiali, miaka yino makumi shimbiali, te yami nunachilingila? 6Ni shimbu munulia ni shimbu mununwa te kunwalile, kunwanwine kuli yenwene? 7Shimbu machitwama mu Yerusaleme ni kuwaha ni yihunda yeswe ya kujingilika, ni chifuchi cha ku Sule ni chifuchi cha ku mwanda yeswe ni atu, te Yehova kambile maliji wano ene kuli aprofeta jenyi a kushi?
8Liji lia Yehova yiliza kuli Zekaria ngwenyi, 9Yehova-wa-Tujita kanambe ngwenyi, Patulenu ni ululi; lingenu ni utu ni keke mutu mweswe kuli mukwo. 10Kanda nupinjisa twamishi, hanji shiwa, hanji njize, hanji chiswale. Niumwe kanda atakila mukwo chuma chipi mu mbunge yenyi. 11Alioze katayile kupanjika; yangutalikisa chipaya cha pami; yajika matwi jo kuchina mevwa. 12Yapwisa mbunge jo jikalu ngwe diamante kuchina mevwa shimbi ni maliji aze Yehova-wa-Tujita watumine ni Spiritu yenyi kuli aprofeta a kushi. Kashika ufwatulo unene wejile wa kuli Yehova-wa-Tujita. 13Yehova-wa-Tujita kanambe ngwenyi, Yami naasanyikine, o katayile kupanjika; chocho nawa o asanyikine ni yami chatayile kupanjika. 14Kashika naamwangine ni chijimbi hakachi ka mavungu eswe kaanyingikine. Chocho chifuchi cho chasalile cha hululu; niumwe wapajekelemo, ni chifuchi chipema achipwishile cha hululu.
Currently Selected:
ZEKARIA 7: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
