ZEKARIA 11
11
1Ena Lebano, azulula mapito je
hanga kahia kakalalise misedru ye!
2Ena mutondo wa kupresu, lila mbimbi mumu musedru halimbuka;
mitondo ya uhenya hiyalumbuka!
Carvalho ja ku Mbashanu, lilenu mbimbi,
mumu usaki uze wajika haupakula!
3Halakanenu mbimbi ya tufunga;
mumu uhenya wo haupupa!
Halakanenu kuhiohia cha ndumba,
mumu mushitu ya Yordau hayiteta!
4Yehova Zambi yami wambile ngwenyi, Fungenu mapanga aze hanaafunjikila kufwa. 5Waze akwalanda kakwashiha ni kastigu yakuhi, ni waze akwalanjisa kakwamba ngwo, Yehova afumane, hinapwa pichi. Chipwe tufunga two ene kaavwilile keke. 6Mumu Yehova kanambe ngwenyi, Chichi kapwa nawa ni keke hali akwa chifuchi chino. Nyingikenu, mungukalimbwisa mutu mweswe mu kwoko lia kafunga kenyi. Mutu mweswe mungukamukunjika mu kwoko lia mwanangana wenyi mba makafwenya hashi. Chichi kapulula niumwe ku moko jo.
7Chocho nalumukine kafunga ka mapaagu aze hanaafunjikila kufwa mumu hali akwa kusepa ni mapanga. Yingwanda milumbu yiali. Umwe naulukile ngwami, Vumbi; ukwo naulukile ngwami, Kununga. Yingufunga mapanga. 8Ha kakweji umuwika nonwene tufunga atatu, mumu janguhwa no; no te kananguvwila kupiha. 9Chocho yingwaamba ngwami, Chichi kapwa kafunga kenu. Yoze hamufunjikila kufwa, akafwe; yoze hamufunjikila kwonwona, amwonwone; waze malisalaho akalie musunya wo, umwe kuli mukwo ni mukwo. 10Yingwanda mulumbu wami Vumbi, yinguumakuna, nikushiha usendo uze nalingile ni e mavungu eswe. 11Chocho usendo wafwile tangwa lize, mba akwa kusepa ni mapanga waze apwile nikungupanjika anyingikine ngwo, Liji lia Yehova. 12Yingwamba ngwami, Nyi chanupemena-ngwehenu fweto yami. Nyi ka litwaminenu. Chocho yangupezalishila ha fweto yami makumi atatu a mbongo ja prata. 13Mba Yehova yamba kuli yami ngwenyi, Ujimbile mu milambu, ndando yipema yize anguselele. Kashika yingwanda je mbongo ja prata makumi atatu yingujimbila mu milambu mu zuwo lia Yehova. 14Henaho namakwine mulumbu wami wamuchiali Kununga, nikushiha usoko hakachi ka Yunda ni Izalele.
15Mba Yehova yamba kuli yami ngwenyi, Anda cheka nawa ye yikwata ya kafunga wamokomoko. 16Mumu mungusolola mu chifuchi kafunga umwe kechi kusa mbunge waze anafu, kechi kufupa akwa kujimbata, kechi kuwuka yilema, hanji kulela angunu, alioze kakulia musunya wa akwa maji, nikuzununa chipwe sende jo.
17Lamba kuli kafunga wamokomoko,
yoze wakwehuka mapanga!
Katana amulambe mu kwoko lienyi ni mu liso lienyi lia chindume!
Kwoko lienyi likasosewe liakulu
ni liso lienyi lia chindume Ukafwe liakulu.
Currently Selected:
ZEKARIA 11: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
