ZEKARIA 12
12
1Chikuma cha liji lia Yehova lia kutwala kuli A-Izalele. Yehova mukwa kuzazulula malilu, mukwa kukolesa hashi, ni kululika Spiritu ya mutu muli iye, kanambe ngwenyi, 2Nyingikenu ngunambe kupwisa Yerusaleme musenge wa kuzengesa mavungu eswe a kujingilika. Muukalimika ni Yunda nawa ha kuseleka Yerusaleme ni jita. 3Ha tangwa lize mungukapwisa Yerusaleme luliwe lulemu ha mavungu eswe. Waze eswe maluzundula malilemeka, ni mavungu eswe a hashi malikungulula kulimika nalwo. 4Yehova kanambe ngwenyi, Ha tangwa lize munguvwisa mwongo tuvwalu eswe; munguzalwisa waze akwaendesa. Alioze ku munyachi wa Yunda mungukalawishila meso jami muze mungukafwisa meso ja tuvwalu eswe a mavungu. 5Henaho akwa minyachi ya Yunda mamba mu mbunge jo ngwo, Akwa Yerusaleme kali ni tachi mumu hali Yehova-wa-Tujita mwe Zambi yo.
6Ha tangwa lize mungukapwisa akwa minyachi ya Yunda ngwe ndeho ya kahia hakachi ka kunyi; ngwe soka lia kahia lia kulekwoka hakachi ka yichita ya mwambu. Kumakalalisa mavungu eswe a kwajingilika ku sali lia chindume ni lia chimeso, shimbu Yerusaleme muyitwama ni atu jamo lume, mwe mu Yerusaleme.
7Yehova mahanga kuhana kukumba ku mbalaka ja Yunda, chocho uhenya wa munyachi wa David ni uhenya wa akwa Yerusaleme kuuchi kahiana helu lia uhenya wa Yunda. 8Ha tangwa lize Yehova majingilika akwa Yerusaleme ni lukepwe, chocho chipwe alelu chikolo hakachi ko ha tangwa lize makapwa ngwe David, mba akwa munyachi wa David makapwa ngwe Zambi, ngwe mungelo wa Yehova kulutwe lio. 9Ha tangwa lize mungulisela kwonwona mavungu eswe waze malimika ni Yerusaleme.
10Mungukazukula ha munyachi wa David ni hali akwa Yerusaleme Spiritu ya vumbi ni kulembela. Kumakahulikila meso yoze amutuwile. Kumakalishimwoka hali iye ngwe mutu kakulishimwoka hali mwanenyi wa lunga wa wika. Makamuvwila chinyengo ngwe chinyengo chize cha mutu hali mwanenyi mutangu. 11Ha tangwa lize kulishimwoka mu Yerusaleme muchikapwa chinene ngwe kulishimwoka hali Hadade-Rimone ha chana cha Megidu. 12Chifuchi muchikalishimwoka, munyachi ni munyachi ukawawo. Usoko wa munyachi wa David ukawawo, ni mapwo jo ukawo; ni usoko wa munyachi wa Natane ukawawo, ni mapwo jo ukawo; 13ni usoko wa munyachi wa Levi ukawawo, ni mapwo jo ukawo; ni usoko wa munyachi wa A-Shimei ukawawo, ni mapwo jo ukawo; 14ni minyachi yize yeswe yalisalaho, munyachi ni munyachi ukawawo, ni mapwo jo ukawo.
Currently Selected:
ZEKARIA 12: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
