ZEKARIA 10
10
1Etenu vula kuli Yehova
ha kakweji wa vula musazu.
Etenu kuli Yehova mukwa kutanga njaji mukwa kuhana vula wa samakwasa,
mukwa kuhana mwambu mu chifuchi.
2Mumu terafimi hanahanjika chize kuchalumbunukine;
tahi hanamono mahuza;
akwa yilota kanaula yilota ya kwonga,
nikulembejeka chamokomoko.
Kashika atu anendangana ngwe mapanga;
kanapinji mumu ha kuhona kafunga.
3Utenu wami unasasaminyina hali tufunga;
mungulamba kastigu tusongo.
Mumu Yehova-wa-Tujita kakusa mbunge
yenyi hali mapanga jenyi, munyachi wa Yunda;
kumakaapwisa ngwe kavwalu wa uhenya mu jita.
4Kuli ayo mukukakatuka liwe lia mbango;
kuli ayo mukukakatuka lumbambo wa mbalaka;
kuli ayo mukukakatuka uta wa jita;
kuli ayo mukukakatuka mukwa kuyula mweswe.
5Hamuwika makapwa ngwe yitakame mu jita,
nikuliachila akwa kulinwa no mu malowa a ha matapalo.
Makasa jita mumu Yehova hwali hamwe no,
mba makakomwesa akwa kwenda hali tuvwalu.
6Kumungukutakamisa munyachi wa Yunda;
kumungukalamwina munyachi wa José.
Mungukaahilwisa mumu ngunaavwila keke,
mba makapwa ngwe chalitunyino,
mumu yami nguli Yehova Zambi yo
kashika mungukaakumbulula.
7Henaho Eframe malumuka ngwe kajita wa ndundo,
ni mbunge jo mujikapwa ni chiseke ngwe cha vinyu.
Ana jo makachimona; makawahilila,
ni mbunge jo mujikalikwiza muli Yehova.
8Mungukaasanyika nikwakonga
mumu hinaakula,
mba kumoka ngwe ha shakulu.
9Chipwe naamwangine hakachi ka mavungu,
hindu ku yifuchi ya kusuku makangwiwuluka;
mba makatwama ni mwono, makahiluka hamwe ni ana jo.
10Ku chifuchi cha Engitu mungukaachiza nikwaneha ku mahio;
chipwe ku Asuria mungukaakonga,
mba mungukaaneha ku chifuchi cha Ngiliate ni Lebano
ndo kukwasalile nawa chihela.
11Makapalika ndusu mu kalunga-lwiji wa luyinda.
Mikanya ya kalunga-lwiji muyikalambiwa,
ni majinga eswe a Nilo makoma.
Ulemu wa Asuria makaununguna,
ni lukanda wa Engitu makachina.
12Mungukaatakamisa muli Yehova
mba kumakenda mu jina lienyi.
Chocho kanambe Yehova.
Currently Selected:
ZEKARIA 10: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
