ZEKARIA 9
9
1Chikuma cha liji lia Yehova chalimika ni chifuchi cha Hadrake;
kumuchikatula ha Ndamaseku.
Mumu meso ja atu ni ja minyachi yeswe ya A-Izalele
kuli Yehova ali.
2Ni Hamate nawa, chifuchi chize chalihata nacho,
ni Teru ni Sendone, chipwe ali ni mana anji.
3A-Teru halitungila chipanga-cha-mawe.
Hanalilumbikila prata ngwe fufuta;
hanalilumbikila oru ngwe mavu a ha matapalo.
4Hindu Mwene makamuchiza yikumba yenyi;
makambila upite wenyi mu kalunga-lwiji
ni che chihunda makachocha ni kahia.
5Asekalone makachimona; makevwa woma;
ni Ngeza nawa mba makalifwita ni yikola.
Ni Ekrone nawa mumu kutalatala chenyi hichafuwa.
Mwanangana wa Ngeza makafwa;
Asekalone makasala keshi ni atu.
6Amwe atu keshi chinyingi makatwama mu Ashedode,
mba mungukasulisa kulengumuka cha A-Filistea.
7Mungukachiza manyinga mu kanwa lienyi,
mungukachiza chuma cha lwaji hakachi ka mazo jenyi,
neye nawa makapwa ngwe atu a masalila kuli Zambi yetu;
kumakalumuka ngwe umwe munyachi wa Yunda,
ni A-Ekrone makapwa ngwe A-Yepushe.
8Henaho mungukatwama ku zuwo liami ngwe kalayi,
niamwe kechi kendako ngwe maswalale;
niumwe mukwa kupinjisa makaakumba nawa
mumu haliapwila ngunamono ni meso ja yami mwene.
9Ena mwana-pwo Zaione, Wahilila chikolo!
Ena mwana-pwo Yerusaleme, likwize!
Mwanangana wenu kaneza kuli yenu;
aye mukwa kukangana, mukwa kukumba,
hindu kanalikehesa, kanende hali chimbulu,
te hali mwana-chimbulu wa kusemuka kuli chimbulu.
10Temba lia jita mungukaliteta ku Eframe;
kavwalu wa jita mungukamuteta ku Yerusaleme.
Uta wa jita makautetako,
mba iye kumakatumina sambukila ku mavungu.
Chiyulo chenyi muchikapwa chize ku kalunga-lwiji ndo ku kalunga-lwiji;
chize ku Lwiji ndo ku masongo a hashi.
11Ha kutwala kuli yenu nawa, mungukatusula funge jenu ku wina uze kuushi meya
mumu ha manyinga ja usendo wami ni yenu.
12Enu funge nwakutalatala, hilukenu kuma kwenu kwa tachi.
Musono ngunanulweze ngwami,
Mungukanukundulula yisuho yiali.
13Mumu hinanana Yunda ngwe uta wami,
hinapwisa Eframe mwivu wami.
Ena Zaione, mungulinga ni ane a malunga
kulamba ana a malunga a yena Ngresia.
Mungulinga ni yena ngwe uli katana wa kajita.
14Mba Yehova masoloka helu lio,
mivu yenyi muyipwa ngwe njaji.
Mwene Yehova mahumuna chitavwi,
matuhukila ni yijimbi ya ku Sule.
15Yehova-wa-Tujita maafunga;
makashiha ni kuliata akwa kukonga mawe.
Makanwa manyinga jo ngwe vinyu.
Makazala ngwe misenge,
ngwe mbango ja chilumbilo ja pwocha ni manyinga.
16Ha tangwa lize Yehova Zambi yo makaalamwina,
mumu o te mbunga ya atu jenyi.
Kumakahenya ha chifuchi chenyi
ngwe diamante ha chipangula chenyi.
17Ewa muchikapwa chipema, cha uhenya.
Mbuto muyikawahisa akweze
ni vinyu yaha muyikawahisa ana-mapwo.
Currently Selected:
ZEKARIA 9: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
