MATEU 7

1Kanda nupatwila akwenu, mba kechi kanupatwila. 2Mumu upatwilo uze munupatula nawo akwenu, kumanupatwila: ni cheseko chize munweseka nacho, kumanwesekela. 3Alioze kuchi te unatale ku koma kaze kali mu liso lia mukwenu, alioze kushi kumona mukambo uze uli mu liso lie? 4Hanji ngwe kuchi muwamba kuli mukwenu ngwe, Ngutayize, nguchize koma mu liso lie; kumanyi, mukambo uli mu liso lia yena mwene? 5Chilembese, Uliange kuchiza mukambo mu liso lie; mba mumona kanawa kuchiza koma mu liso lia mukwenu.

6Kanda nuhana yuma yisandu kuli tuwa, chipwe kanda numbila kakanga kenu kumeso ja ngulu kuchina hanji mamuliata ni sende jo, mba matewuluka anupapulule.

7Etenu, mba kumanwaha; fupenu, mba kumunuwana; ngongwelenu, mba kumanwazulwila. 8Mumu mweswe meta, matambula; ni yoze mafupa, mawana; ni yoze mangongwela, kumamwazulwila. 9Hanji mutu muka, kachi mwanenyi mamwita mbolo, mamwaha liwe? 10Hanji kachi meta yishi, mamwaha kapela, nyi? 11Kachi yenu, nuli api, nunanyingika kuhana yawana yipema kuli ana jenu, Shinaho chikolo Tatenu yoze uli mu malilu mahana yuma yipema kuli waze mamwita, nyi? 12Yuma yeswe kashika nunazange atu akanulinge, chizechene lingenu kuli ayo: mumu chino ye shimbi ni ye yiyulo ya aprofeta.

13Njilenu ku chikolo chikehe: mumu chikolo chize chatwala ku kwonwona, chinene, ni ye jila kuyatoha, ni waze akunjilamo anji. 14Alioze chikolo chize chatwala ku mwono, chikehe, ni ye jila yikehe, ni waze akuyiwana akehe.

15Alioze keyelenu aprofeta a kwonga, waze akwiza kuli yenu ni mazalo ja mapanga, alioze muchima kanapu tungunga a kunuwumbula. 16Ku mihuko yo kumunukaanyingika. Atu mahela uva ku mingonga, nyi? Hanji makuyu ku mikalale, nyi? 17Chizechene mitondo yeswe yipema kuyakwima mihuko yipema, alioze mutondo wamokomoko kuwakwima mihuko yipi. 18Mutondo upema kuushi kuhasa kwima mihuko yipi, chipwe mutondo wamokomoko kuushi kuhasa kwima mihuko yipema. 19Mitondo yize yeswe kuyishi kwima mihuko yipema mayipakula, mayimbila mu kahia. 20Kashika ku mihuko yo kumunukaanyingika.

21Hi mweswe ko mamba kuli yami ngwenyi, Mwene, Mwene, makanjila mu wanangana wa malilu, alioze yoze wakulinga upale wa Tata yoze uli mu malilu. 22Anji kumakamba kuli yami ha tangwa lize ngwo, Mwene, Mwene, kutwaprofetezele ni jina lie, nyi? Ni jina lie kutwatuhwishile andemoniu, nyi? Ni jina lie kutwalingile yipupu yinji, nyi? 23Hohene mungukaakumbulula ngwami, Chanunyingikine nilimwe tangwa: katukenu kuli yami, yenu, nwakulinga uhulia.

24Kashika mweswawo mevwa wano maliji jami, nyi maalinga, kumamupwisa ngwe mukwa kukanyama yoze watungile zuwo lienyi ha liwe: 25vula wanokene, ni mihwiji yejile, ni fuji yalambile ha zuwo lize; alioze kuliapuzukile: mumu alitungile ha liwe. 26Mweswe mevwa wano maliji jami, keshi kwalinga, kumamupwisa ngwe chihepuke, yoze watungile zuwo lienyi ha masekeseke: 27ni vula wanokene, ni mihwiji yejile, ni fuji yapupile zuwo lize; mba liapuzukile; ni kupuzuka chalio chapwile chinene.

28Muze te Yesu hamanununa maliji ano, mbunga alishimwokene ha longeso lienyi. 29Mumu waalongesele ngwe umwe ukwete chiyulo, hi ngwe akwa kusonyeka ko.

Currently Selected:

MATEU 7: Csa

Highlight

Copy