MATEU 8

1Muze te hapalumuka ku mulundu, mbunga jinene jamukawile. 2Ni kumanyi, mukwa mbumba wejile kuli iye, wamuwayilile, ngwenyi, Mwene, kachi mupala kachi muhasa kungupemesa. 3Yesu wolwele kwoko lienyi, wamusele minwe, ngwenyi, Ngunapale; pwako mupema. Haze hene wapemene ku mbumba yenyi. 4Yesu yamba kuli iye ngwenyi, Tala, kanda ukaambulwila niumwe; alioze yako, ukalilweze kuli sasendote, ukalambule chawana chize ambile Mose, chikapwe Shindakenyo kuli ayo.

5Muze te Yesu hanjila mu Kafwanaume, kapitau wejile kuli iye, nikuliumba ngwenyi, 6Mwene, mukweze wami kanapombo mu zuwo, ni kupinda chinji, mukwa kalepa. 7Yesu yamba kuli iye ngwenyi, Mungwiza ngukamuwuke. 8Kapitau wamukumbulwile ngwenyi, Mwene, yami chatelele unjile mu zuwo liami; alioze amba kama liji wika, ni mukweze wami kumahinduka. 9Mumu yami nguli mutu mushi lia chiyulo, nguli no mushi lia yami mwene maswalale: mungwamba kuli yono ngwami, Yako, mba maya; kuli mukwo ngwami, Tweya, mba meza; kuli ndungo yami ngwami, Linga chino, mba machilinga. 10Muze Yesu achivwile, wakomokene, mba wambile kuli waze akawile ngwenyi, Pundu, ngunambe kuli yenu ngwami, Chawanyine Ufulielo upwa haha, chipwe mu Izalele, ka. 11Alioze ngunambe kuli yenu ngwami, Anji a ku Chivumbuko ni ku Chitokelo kumakeza, makatwama ku mesa hamwe ni Apalahama, ni Izake, ni Yakomba mu wanangana wa malilu. 12Alioze kumakambila akwa wanangana mu milima ya haze: kumukukapwa malilo ni kulikopola ku mazo. 13Yesu wambile kuli kapitau ngwenyi, Yako kwe, chizechene ngwe hiwafuliela, chikapwe kuli yena. Mba mukweze wenyi wahindukile ha ola yize yene.

14Muze Yesu hanjila mu zuwo lia Petulu, wamwene naye-weno kanapombo ni kachiki. 15Neye wasele minwe ku kwoko lienyi, mba kachiki wamukatukile, neye wahindukile, waavumbikile. 16Muze hapwile chingoloshi, anehene kuli iye akwa andemoniu anji; neye watuhwishile maspiritu ni liji lienyi; wawukile waze eswe ayijile. 17Hanga chikamanunuke chize ahanjikile ku kanwa lia profeta Izaia ngwenyi, Iye mwene wanjile kukokoloka chetu, wambachile misongo yetu.

18Achi, muze Yesu amwene mbunga jinene kumujingilika, waambile akatuke aye mu sali. 19Mukwa kusonyeka wejile, wambile kuli iye ngwenyi, Longeshi, kumungukukaulu kweswako muoya. 20Yesu yamba kuli iye ngwenyi, Mikuza kali ni mena, tujila a mwilu kali ni yaswa; alioze mwe Mwana Mutu keshi haze ha kushachila mutwe wenyi. 21Mukwo wa kuli tumbaji twenyi wambile ngwenyi, Mwene, ngutayize kama nguhange kuya, ngukafunde tata. 22Alioze Yesu yamba kuli iye ngwenyi, Ngukaule; hichika afu akafunde afu jo ene.

23Muze hanjila mu ulungu, tumbaji twenyi amukawile. 24Kumanyi, kwejile kangonga munene ha Chitende, chocho ulungu wafukiwile ni mikanya; ahoze iye wapwile mu tulo. 25Mba tumbaji ejile, amulawishile ngwo, Mwene, tulamwine kama, tunatoko. 26Neye yamba kuli ayo ngwenyi, Kuchi te nunevu woma, yenu akwa Ufulielo ukepe? Hohene wakatukile, Wámbilile fuji ni meya, mba kwaholele kúlú. 27Atu alishikishilile ngwo, Mutu muka yono, chipwe fuji ni meya mamwononokena?

28Muze ahetele mu sali ku chifuchi cha A-Ngandara, akwa andemoniu aali atakanyine nenyi, kanatuhuka hakachi ka mafuka, yitoji asasu chikolo, chocho niumwe kahashile kupalikila jila yize. 29No kumanyi, akololokele ngwo, Kuchi yetu ni yena, Yesu mwe Mwana Zambi? Uneza kuno mukutupinjisa shimbu mwaka kanda wiza, nyi? 30Achi, kwapwile kusuku no, chendo cha ngulu kanali. 31Andemoniu aliumbile kuli iye ngwo, Kachi mututuhwisa, tutume kama, tunjile mu chendo cha ngulu. 32Neye wambile kuli ayo ngwenyi, Yénu. No atuhukile, anjilile muli ngulu: kumanyi, chendo cheswe alundumukine ha mbongo mu Chitende, afwile mu meya. 33Waze aalishile, achinyine, ayile ku limbo, ambulwile yuma yeswe, ni chize chawanyine akwa ndemoniu. 34Ni kumanyi, limbo lieswe natuhukile mukupatwiza Yesu: ni muze amumwene, aliumbile kuli iye, akatuke ku manjiza jo.

Currently Selected:

MATEU 8: Csa

Highlight

Copy