MATEU 9

1Wanjilile mu ulungu, wazaukile, wahetele ku limbo lienyi mwene. 2Kumanyi, anehene kuli iye mukwa kalepa, kanapombo ha muhela: Yesu ha kumona Ufulielo wo, wambile kuli mukwa kalepa ngwenyi, Mwanami, hamuka; kakukonekena milonga ye. 3Mba amwe a kuli akwa kusonyeka ambile mu mbunge ngwo, Yono kanashililika Zambi. 4Alioze Yesu, nikunyingika yishinginyeka yo, wambile ngwenyi, Kuchi te nunashinginyeka yuma yipi mu mbunge jenu? 5Mumu chashi chika, shina kwamba ngwami, Ngunakukonekena milonga ye, nyi; shina kwamba ngwami, Katuka, wende? 6Alioze hanga nunyingike ngwenu, Mwe Mwana Mutu chiyulo akwete hano hashi cha kukonekena milonga, (hohene yamba kuli mukwa kalepa ngwenyi), Katuka, anda chalo che, uye ku zuwo lie. 7Mba wakatukile, wayile ku zuwo lienyi. 8Muze mbunga achimwene, alishikishilile, achichimiekene Zambi yoze wahanyine chiyulo chipwa haha kuli atu.

9Shimbu Yesu mapalika kuze kulutwe, wamwene mutu, anamuvuluka ngwo, Mateu, kanatwama mu zuwo lia lijimu: neye yamba kuli iye ngwenyi, Ngukaule. Aye wakatukile, wamukawile.

10Shimbu achili ku mesa mu zuwo, akwa kufwetesa lijimu ni yivulumunyi anji ejile, atwamine ku mesa hamwe ni Yesu ni tumbaji twenyi. 11Muze A-Fwariseu achimwene, ambile kuli tumbaji twenyi ngwo, Kuchi te Longeshi yenu anali hamwe ni akwa kufwetesa lijimu ni yivulumunyi? 12Alioze muze Yesu achivwile, wambile ngwenyi, Angunu keshi kufupa mbuki, alioze waze ayiza. 13Alioze yénu, nukalilongese chize muchilumbunuka ngwo, Ngunazange keke, hi chitapo ko; mumu chejile mukutambika akwa ululi, alioze mukutambika yivulumunyi alikonyeke.

14Hohene tumbaji twa Yoano yeza kuli iye, ngwo, Kuchi te yetu ni A-Fwariseu twakulitwamina kulia kanji, alioze tumbaji twe keshi kulitwamina kulia? 15Yesu wambile kuli ayo ngwenyi, Akwa ulungi mahasa kulinyenga shimbu sandungi mapwa hamwe no, nyi? Alioze matangwa kumakeza muze makachiza sandungi kuli ayo, mba hohene makalitwamina kulia. 16Mba niumwe masa chando cha hina lize kulishi kufunyisa ha hina likulu; mumu chando machipapulula lie hina, ni chitutulu chahiana muchipwa. 17Chipwe atu keshi kulonga vinyu yaha mu tuku ja malambu akulu, mokomoko tuku ja malambu mujimengunuka, ni vinyu muyimwangana, ni tuku mujifwa: alioze malonga vinyu yaha mu tuku ja malambu jaha, ni yeswe yiali muyiwaha.

18Shimbu machihanjika yino yuma kuli ayo, mukwa kuyula wejile, wamuwayilile, ngwenyi, Mwanami wa pwo haliapwila lume hafwa, alioze tweya kama, ukasayike kwoko lie hali iye, mba kumapwa ni mwono. 19Yesu wakatukile, wamukawile hamuwika ni tumbaji twenyi. 20Umwe pwo wapwile ni musongo wa kuhita manyinga kumi lia miaka ni miaka yiali, wejile kunyima yenyi, wasele minwe ku lupula wa hina lienyi: 21mumu wanyongene mu mbunge yenyi ngwenyi, Kachi mungusa wika minwe ku hina lienyi, kachi mungupwa mungunu. 22Alioze Yesu ha kutewuluka, yamumona, wambile ngwenyi, Hamuka, mwanami, Ufulielo we hiwakupwisa mungunu. Mba mwe pwo wapwile mungunu chize ku ola yize. 23Muze te Yesu hanjila mu zuwo lia mukwa kuyula, wamwene akwa kwimba ndembo, ni mbunga nikuneha zungo, 24wambile ngwenyi, Lisekulenu, mumu mwana-pwo kafwileko, mu tulo ali. Alioze amusehele. 25Mba muze te hatuhwisa mbunga, wanjilile, wamukwachile ku kwoko, mwana-pwo wahindukile. 26Lufuma wacho wafumanyine mu chifuchi chize cheswe.

27Muze Yesu apalikile kuze kulutwe, tupuputa aali amukawile, nikukololoka ngwo, Tuvwile kama keke, yena, mwana David. 28Muze te hanjila mu zuwo, tupuputa ejile kuli iye: mba Yesu yamba kuli ayo ngwenyi, Nunafuliela ngwe munguhasa kulinga chino, nyi? O yamba kuli iye ngwo, Ewa, Mwene. 29Hohene wasele minwe ha meso jo ngwenyi, Chikapwe kuli yenu nikulita ni Ufulielo wenu. 30Mba meso jo alawile, ni Yesu waahele chikolo koki ngwenyi, Niumwe mutu kanda akachinyingika. 31Alioze atuhukile, afumanyishine lufuma wenyi mu chifuchi chize cheswe.

32Shimbu machituhuka, anehene kuli iye kamama, mukwa ndemoniu. 33Mba muze te hatuhwisa ndemoniu, kamama wahanjikile: ni mbunga alishikishilile ngwo, Kuchasolokele chocho nilimwe tangwa mu Izalele. 34Alioze A-Fwariseu ambile ngwo, Kakutuhwisa andemoniu ni tachi ja mwata wa andemoniu.

35Mba Yesu wayile nikujingajinga ku membo eswe, ni ku yihunda yeswe, nikulongesa mu masunangonga jo, nikwambujola sango lipema lia wanangana, nikuwuka misongo yeswe ni weji weswe mukachi ka atu. 36Alioze muze amwene mbunga, waavwilile keke, mumu alikatalishile nikulimbilambila ngwe mapanga waze keshi kafunga. 37Hohene yamba kuli tumbaji twenyi ngwenyi, Kucha chamwenemwene chinalumbama, alioze akwa milimo akehe. 38Liumbenu kashika kuli Mwenya kucha, hanga atume akwa milimo aye ku kucha chenyi.

Currently Selected:

MATEU 9: Csa

Highlight

Copy