MATEU 3

1Ha matangwa aze Yoano Chipapachisa wasolokele nikwambujola mu puya ya Yundeya, 2ngwenyi, Likonyekenu; mumu wanangana wa malilu hiunakundama. 3Mumu yono amuvulukile ku kanwa lia profeta Izaia ngwenyi,

Liji lia yoze wakukololoka mu puya ngwo,

Lulikenu jila ya Mwene,

Lulamisenu yikoka yenyi.

4Yoano mwene wapwile ni mazalo jenyi a wona a kamelu, ni muya wa lambu kujingilika mu zalilo yenyi; kulia chenyi chapwile makumbi ni wuchi wa mu musenge. 5Hohene kwatuhukile kuli iye A-Yerusaleme, ni A-Yundeya eswe, ni akwa chifuchi cheswe cha kujingilika Yordau; 6waapapachishile mu lwiji Yordau, o nikushikisa milonga yo.

7Alioze muze amwene anji a kuli A-Fwariseu ni A-Satuseu kaneza ku upapachiso wenyi, yamba kuli ayo ngwenyi, Yenu, vungu lia yihili, iya unakanutoweza kuchina utenu uze muwizaho? 8Imenu kashika mihuko ya kutela kulikonyeka: 9kanda nushinginyeka kwamba muli yenwene ngwenu, Apalahama tuli nenyi kaka: mumu ngunambe kuli yenu ngwami, Chipwe ku mawe ano Zambi mahasa kusangula ana kuli Apalahama. 10Chipwe haliapwila hasa njimbu ku miji ya mitondo: kashika mitondo yize yeswe kuyishi kwima mihuko yipema mayipakula nikuyimbila mu kahia.

11Yami chamwenemwene ngunanupapachisa mu meya nulikonyeke: alioze yoze meza kunyima yami kakangana kuhiana yami, haku jenyi chatelele kujimbata: iye kumakanupapachisa muli Spiritu Musandu ni mu kahia: 12chifujilo chenyi mu kwoko lienyi chili, kumakapemesa liakulu chizungwilo chenyi, kumakakungila tiliku lienyi mu chila, alioze yizungu makayocha ni kahia kaze kukeshi kuhasa kujima.

13Hohene Yesu yakatuka ku Ngalileya yeza ku Yordau kuli Yoano, akamupapachise. 14Alioze Yoano wamukwikile, ngwenyi, Chatamba ungupapachise yena, mba uneza kuli yami, nyi? 15Alioze Yesu wamukumbulwile ngwenyi, Chitayize haliapwila: mumu chocho chatutamba kumanununa ululi weswe. Hohene yamutayiza. 16Muze te hamupapachisa, Yesu watutukile mu meya, ni kumanyi, malilu azulukile kuli iye, neye wamwene Spiritu ya Zambi kanahulumuka ngwe katele, nikwiza hali iye. 17Ni liji liatuhukile mu malilu ngwo, Yono mwe Mwanami, ngunamuzange chikolo, muli iye ngunawahilila.

Currently Selected:

MATEU 3: Csa

Highlight

Copy