MATEU 2

1Achi, muze te Yesu hanasemuka mu Mbeteleme, chihunda cha mu Yundeya ha matangwa ja mwanangana Heronde, kumanyi, akwa mana a ku Chivumbuko ejile ku Yerusaleme, 2ngwo, Ulihi yoze unasemuka Mwanangana wa A-Yunda? Mumu twamwene lutongonoshi wenyi mu Chivumbuko, hitweza mukumuwayila. 3Muze mwanangana Heronde achivwile, walipikalile, ni A-Yerusaleme eswe hamwe nenyi. 4Ha kukungulula asasendote akwa lutwe eswe, ni akwa kusonyeka ja atu, waahulile kuze Kristu masemukina. 5No ambile kuli iye ngwo, Mu Mbeteleme, chihunda cha mu Yundeya; mumu chocho chinasonewa ni kwoko lia profeta ngwenyi,

6Ni yena, Mbeteleme, mu chifuchi cha Yunda,

Hi uli mukepekepe ko hakachi ka akwa kuyula ja Yunda:

Mumu muli yena kumakatuhuka mukwa kuyula,

Mwenawo kumakapwa kafunga ka atu jami A-Izalele.

7Hohene Heronde watambikile akwa mana ku tenga, waahulile pundu shimbu lize lutongonoshi wasolokele. 8Waatumine ku Mbeteleme, ngwenyi, Yénu, nukahule pundu ha kutwala kuli mwe mwana; muze munumuwana, nukeze, nukangwambulwile, hanga ni yami nawa ngukaye, ngukamuwayile. 9No muze hevwa mwanangana, ayile mu jila yo; ni kumanyi, lutongonoshi yoze amumwene mu Chivumbuko, wayile kulutwe lio, ndo wahetele nikumana helu kuze mwe mwana wapwile. 10Muze amwene lutongonoshi, awahililile ni uwahililo unene wahiana. 11No anjilile mu zuwo, amwene mwe mwana hamwe ni naye Maria; afulamanyine nikumuwayila, no nikupakula upite wo, amulambwile yawana ya oru ni libano ni mira. 12No se Zambi haatoweza mu chilota kanda ahilukila kuli Heronde akatukile mukuya ku chifuchi cho ku jila yeka.

13Achi, muze te hakatuka, kumanyi, mungelo wa Mwene yasoloka kuli José mu chilota, ngwenyi, Katuka, utwale mwe mwana ni naye, uchinyine ku Engitu, ukapweko ndo mungukakwambulwila, mumu Heronde mafupa mwe mwana mukumwonwona. 14Mba José wahindukile, watwalile mwe mwana ni naye ha ufuku, wakatukile mukuya ku Engitu; 15wapwileko ndo ku kufwa cha Heronde; hanga chikamanunuke chize ahanjikile Mwene ku kanwa lia profeta ngwenyi, Natambikile mwanami akatuke ku Engitu.

16Hohene Heronde, muze amwene ngwe akwa mana hamulelesa, wevwile chikolo ufwatulo, mba watumine, akashihe ana-malunga eswe mu Mbeteleme, ni manjiza jacho eswe, chize ku miaka yiali ni waze kanda aheta ku miaka yiali, nikulita ni tangwa lize wevwile pundu kuli akwa mana. 17Hohene chamanunukine chize ahanjikile ku kanwa lia profeta Jeremia ngwenyi,

18Liji alivwile mu Rama,

Malilo ni kunenganyana chinene,

Rakele kanalilila anenyi;

Katayile amulembejeke, mumu akuhi.

19Alioze muze te Heronde hafwa, kumanyi, mungelo wa Mwene yasoloka kuli José mu chilota mu Engitu, ngwenyi, 20Katuka, utwale mwe mwana ni naye, uye ku chifuchi cha Izalele; mumu waze afupile kwenyeka mwono wa mwe mwana hanafu. 21Wahindukile, watwalile mwe mwana ni naye, wahetele ku chifuchi cha Izalele. 22Alioze muze evwile ngwo, Arkelau kanayulu mu Yundeya kusalakana tato Heronde; wevwile woma kuyako, alioze se Zambi hamutoweza mu chilota, wayile kweka ku yihanda ya ku Ngalileya; 23wahetele, watwamine ku limbo analivuluka ngwo, Nazare; hanga chikamanunuke chize ahanjikile ku makanwa ja aprofeta ngwo, Kumakamuvuluka ngwo, Ka-Nazare.

Currently Selected:

MATEU 2: Csa

Highlight

Copy