MATEU 11

1Muze te Yesu hamanununa kuhana shimbi kuli tumbaji twenyi kumi ni aali, wakatukile kuze mukulongesa nikwambujola mu membo jo.

2Achi, muze Yoano evwile mu zuwo lia ususu yitanga ya Kristu, watumine tumbaji twenyi, 3wambile kuli iye ngwenyi, Yena uli yoze meza nyi, shina mututala weka? 4Yesu waakumbulwile ngwenyi, Yénu nukambulwile Yoano yize nunevu ni yize nunamono. 5Tupuputa kanalaula ku meso, ni yilema kanende, akwa mbumba kanapeme, ni afwa matwi kanevu, ni afu kanahinduka; kuli yiswale kakwambujola sango lipema. 6Kawaha mweswawo keshi kuwana chitalingiso muli yami.

7Shimbu wano akatukile nikuya, Yesu waputukile kwamba ku mbunga ha kutwala kuli Yoano ngwenyi, Yika nwayilile mu puya mukutala? Lumbungu unanyiki ni fuji, nyi? 8Alioze yika nwayilile mukutala? Mutu unazala mahina a lefuna, nyi? Waze akuzala mahina a lefuna mapwa mu mazuwo ja mianangana. 9Alioze yika nwayilile mukutala? Profeta, nyi? Ewa, ngunambe kuli yenu ngwami, Umwe Wahiana chikolo profeta. 10Mumu yono, chinasonewa ha kutwala kuli iye ngwo,

Mungutuma kanganda kami kulutwe lia meso je,

mwenawo kumakalulika jila ye kulutwe lie.

11Pundu ngunambe kuli yenu ngwami, Hakachi ka waze akusemuka kuli mapwo, kakatukile umwe munene Wahiana Yoano Chipapachisa: alioze yoze mukepe Wahiana eswe mu wanangana wa malilu kanapu munene kuhiana iye. 12Chize ku matangwa ja Yoano Chipapachisa ndo haliapwila kakutambula wanangana wa malilu ni tachi, ni akwa tachi kakuutambula ni tachi. 13Mumu mikanda ya aprofeta ni ya shimbi yeswe yaprofetezele ndo kuli Yoano. 14Nyi kachi munupala kuchitambula, iye mwe Eliya yoze meza. 15Yoze uli ni matwi a kwivwa, evwe.

16Alioze ngwe aya mungutesa chisemuko chino? Chinapu ngwe twanuke aze anatwama mu yitanda, waze akutambika kuli akwo, 17ngwo,

Twembanga ndembo kuli yenu, alioze kunwahanganyine;

twalinyenganga, alioze kunwalilile mbimbi.

18Mumu Yoano wejile chipwe kalile, chipwe kanwine, o mamba ngwo, Ndemoniu akwete. 19Mwe Mwana Mutu wejile nikulia, nikunwa, o mamba ngwo, Chipulutu, mukwa kuzengewa, kasendo ka akwa kufwetesa lijimu ni yivulumunyi! Alioze mana hanasambe hali ana jenyi.

20Hohene waputukile kwámbila membo kuze alingile yipupu yenyi yinji, mumu kalikonyekeneko. 21Ngwenyi, Lamba kuli yena Karazene! lamba kuli yena Mbeteseta! mumu kachi yipupu yize alingile hakachi kenu, ayilingile mu Teru ni Sendone kachi alikonyekene kulu ni chikeleyi ni uto. 22Alioze ngunambe kuli yenu ngwami, Kumuchikapwa chashi hali Teru ni Sendone ha tangwa lia upatwilo, chikalu hali yenu. 23Ni yena Kafwanaume hakunangamisa ndo mwilu, kumakakuhulumuna ndo ku Heteze: mumu kachi yipupu yize alingile muli yena, ayilingile mu Sondome, kachi kuchasala ndo tangwa lino. 24Alioze ngunambe kuli yena ngwami, Kumuchikapwa chashi ha chifuchi cha Sondome ha tangwa lia upatwilo, chikalu hali yena.

25Ha mwaka uze Yesu wakumbulwile ngwenyi, Ngunakuhalisa Tata, Mwene wa lilu ni hashi, mumu wahengekele yino yuma kuli akwa mana ni akwa malinjekela, wayisolwele kuli ana-akemba. 26Ewa, Tata, mumu chocho chakupemenene. 27Kanangukunjika yuma yeswe kuli Tata, mba niumwe manyingika mwe Mwana, shina Tata, chipwe niumwe manyingika Tata, shina mwe Mwana, ka, ni kuli mweswawo mwe Mwana mapala kumusolola. 28Tweyenu kuli yami, yenu eswe nwakukilikita nikulemewa, ni yami kumungunuhwimisa. 29Lilemenu ni kanga yami, lilongesenu kuli yami; mumu nguli mukwa kushimbika, mukwa kulilelesa mu mbunge; mba kumunukawana uhwimino ku mbunge jenu. 30Mumu kanga yami yashi, ni chiteli chami chilelu.

Currently Selected:

MATEU 11: Csa

Highlight

Copy