MATEU 10

1Watambikile kuli iye tumbaji twenyi kumi ni aali, waahele chiyulo helu lia maspiritu a luchisa, hanga akaatuhwise, ni hanga akawuke misongo yeswe ni weji weswe.

2Achi, majina ja apostolo kumi ni aali wano: Mutangu Semone, jina lienyi likwo, Petulu, ni mwanakwo Andeleu; Tiangu mwana Zembendeu, ni mwanakwo Yoano, 3Fwilipe, ni Mbatolomeu; Tomase, ni Mateu mukwa kufwetesa lijimu; Tiangu, mwana Alefweu ni Lepeu, jina lienyi likwo, Tateu; 4Semone Kazelo, ni Yundase Ka-Keriote, yoze nawa wamukunjikile.

5Wano kumi ni aali Yesu waatumine, waahele koki ngwenyi, Kanda nukaya mu jila ya akwa mavungu, kanda nunjila mu limbo lia A-Samaria: 6alioze yenu Shinaho kuli mapanga a kutoka a ku zuwo lia Izalele. 7Shimbu munuya, ambujolenu ngwenu, Wanangana wa malilu hiwakundama. 8Wukenu mieji, hindwisenu afu, pemesenu akwa mbumba, tuhwisenu andemoniu; hinunatambula wana, hanenu wana. 9Kanda numbata oru, chipwe prata, chipwe mbongo mu miya yenu; 10kanda numbata chipwe chipakumuna ha ungeji, chipwe mbinja jiali, chipwe haku, chipwe mulumbu, ka: mumu mukwa milimo kanatela kulia chenyi. 11Mu limbo lieswaho, hanji chihunda mununjila, nukahule hali yoze unatelamo; muze mwene nukatwame ndo munutuhuka. 12Ha kunjila mu zuwo, nukalimeneke. 13Kachi zuwo mulitela, sambukila yenu yikezeho, alioze kachi kulishi kutela, sambukila yenu yikahilukile kuli yenu. 14Mweswawo kechi kanutambula, chipwe kechi kevwa maliji jenu, shimbu munutuhuka mu zuwo lize, hanji limbo lize, nukakukumwineho fufuta ya ku molu jenu. 15Pundu ngunambe kuli yenu ngwami, Kumuchikapwa chashi ha chifuchi cha Sondome ni Ngomora ha tangwa lia upatwilo, kumuchikapwa chikalu ha limbo lize.

16Nyingikenu, ngunanutumu ngwe mapanga hakachi ka tungunga: kanyamenu kashika ngwe tupela, alioze pwenu akwa kusamba ngwe tutele. 17Alioze keyelenu atu, mumu kumakanukunjika kuli akwa kuyula, kumakanulamba ni shikote mu masunangonga jo. 18No kumakanuneha kumeso ja manguvulu ni mianangana mumu hali yami, hanga nukapwe Shindakenyo kuli ayo, ni kuli akwa mavungu. 19Alioze muze munukunjika, kanda nukalipikala ngwe chize munukahanjika: mumu kumakanwahacho ha ola yize chize munukahanjika. 20Mumu hi yenu ko nwakuhanjika, alioze mwe Spiritu ya Tatenu yoze wakuhanjika muli yenu. 21Alioze mukulwana makakunjika mwanakwo ku kufwa, ni tato makunjika mwanenyi: ni ana makakatukila yisemi jo akaashihe. 22Kumakanuvwila kole kuli eswe mumu ha jina liami: alioze yoze manyongonona ndo ku songo kumakamulamwina. 23Alioze muze manuhungumiona mu limbo lino, chinyinenu ku likwo, mumu pundu ngunambe kuli yenu ngwami, Kunuchi kamanununa membo a mu Izalele ndo mwe Mwana Mutu meza.

24Kambaji keshi kuhiana longeshi yenyi, chipwe ndungo keshi kuhiana mwata wenyi. 25Kunahu hali kambaji akapwe ngwe longeshi yenyi, ni ndungo akapwe ngwe mwata wenyi. Kachi hanavuluka mwenya zuwo ngwo, Mbelezepu, kumahiana chikolo kuvuluka akwa zuwo lienyi chocho.

26Kanda nukaavwila woma kashika: mumu chuma cha kufuka chize kuchichi katukuka chakuhi, nichimwe; mba kukushi chimwe chuma cha kuswama chize kechi kachinyingika, nichimwe. 27Chize ngunambe kuli yenu mu milima, hanjikenu ha mwalwa; chize nunevu mu twitwi, ambujolenu ha mafulumba ja mazuwo. 28Kanda nukavwila woma waze akushiha mujimba, hindu kahashile kushiha alma: alioze Shinaho muvwilenu woma yoze mahasa kwonwona ni alma ni mujimba mu Ngehena. 29Keshi kulanjisa tulujila twaali ha kalumbongo kamuwika, nyi? Hindu niumwe wa kuli ayo kechi kaholokela hashi shina Tatenu machitayiza: 30alioze chipwe je kambu ja ha mitwe yenu hanajalula jeswe. 31Kanda nukevwa woma kashika: yenu kunwahiana tulujila tunji. 32Mweswawo kashika mangutayiza kumeso ja atu, yami nawa kumungukamutayiza kumeso ja Tata yoze uli mu malilu. 33Alioze mweswawo malikata yami kumeso ja atu, yami nawa kumungukalikalaye kumeso ja Tata yoze uli mu malilu.

34Kanda nukashinginyeka ngwe nejile mukuneha sambukila hano hashi: chejile mukuneha sambukila alioze katana. 35Mumu nejile mukumika mutu ni tato, ni mwanenyi wa pwo ni naye, ni tembwa-mwana ni tato-pwo: 36akwa kole ja mutu kumakapwa akwa zuwo lienyi. 37Yoze mafwila tato hanji naye kuhiana yami, kangutelele; yoze mafwila mwanenyi wa lunga, hanji mwanenyi wa pwo kuhiana yami, kangutelele. 38Yoze keshi kuzundula kulusu yenyi, keshi kungukaula, kangutelele. 39Yoze mawana mwono wenyi kumakautokesa; yoze matokesa mwono wenyi mumu hali yami, kumakauwana.

40Yoze manutambula, mangutambula yami; yoze mangutambula yami, matambula yoze wangutumine. 41Yoze matambula profeta mumu iye profeta, kumakatambula kwononona cha profeta: yoze matambula mukwa ululi mumu iye mukwa ululi, kumakatambula kwononona cha mukwa ululi. 42Mweswawo manwisa umwe wa kuli wano akepe musenge wa meya a kekema wika, mumu iye kambaji, pundu ngunambe kuli yenu ngwami, Yoze kechi katokesa kwononona chenyi nichimwe.

Currently Selected:

MATEU 10: Csa

Highlight

Copy