MALAKIA 3
3
1Ngunatumu kanganda kami akalulike jila yami kulutwe liami, mba Mwene yoze nunamufupu meza susumuku mu tembele yenyi. Yehova-wa-Tujita kanambe ngwenyi, Kanganda ka usendo yoze nunawahilila nenyi, kumanyi kaneza. 2Alioze iya mahasa kumana ha tangwa lia kwiza chenyi? Iya mahasa kujikiza ha kusoloka chenyi?
Mumu iye kapwa ngwe kahia ka mukwa kupemesa oru; ngwe sabau ya kutomesa. 3Iye makatwama ngwe mukwa kuwahisa ni kupemesa prata. Makapemesa ana ja Levi, nikwawahisa ngwe oru ni prata ndo maneha milambu yize yinalite kuli Yehova. 4Henaho mulambu wa Yunda ni Yerusaleme muuwahila Yehova ngwe ha matangwa a shakulu, miaka ya kushi.
5Mba mungukakundama kuli yenu ha upatwilo. Mungupwa chela keshi kulaluka wa kuhisa yimbanda, ni yitanji, ni akwa kulishinga ni mahuza, ni waze akwiya fweto kuli mukwa milimo, ni tuliwa, ni shiwa, ni waze akukapula njize, kanguvwilile woma. Chocho kanambe Yehova-wa-Tujita.
6Mumu yami Yehova chishi kwalumuka, kashika enu ana ja Yakomba kanunongesele. 7Chize ku matangwa ja tulamba twenu hinwahambuluka ku shimbi jami, kunwaatungile. Hilukenu kuli yami, ni yami munguhiluka kuli yenu. Chocho kanambe Yehova-wa-Tujita. Alioze yenu nwakwamba ngwenu, Tuhiluke kuchi? 8Mutu mahasa kwiya kuli Zambi? Hindu yenu nunangwiyi. Alioze nunambe ngwenu, Tunakwiyi kuchi? Ha yihanda yenu ya kumi, ni milambu yenu. 9Nunashingiwa ni shingo mumu ha kwiya kuli yami, lie vungu lienu lieswe. 10Nehenu yihanda yeswe ya kumi ku zuwo lia kutulikila hanga mukapwe kulia mu zuwo liami, nukangweseke nacho nyi chanwazulwilile manjanela a malilu nikunuzukwila yiwape ya kulumbama. Chocho kanambe Yehova-wa-Tujita. 11Mungunukanjishila mukwa kwonwona alitwamine kwonwona mihuko ya mavu jenu. Mutondo wenu wa uva kuuchi kahona kwima. Chocho kanambe Yehova-wa-Tujita. 12Mavungu eswe makanutongola ngwo, Kunwawaha, mumu munukapwa chifuchi cha uwahililo. Chocho kanambe Yehova-wa-Tujita.
13Yehova kanambe ngwenyi, Maliji jenu hapwa a tachi a kulimika ni yami. Hindu nwakwamba ngwenu, Kuchi twakwamba kulimika ni yena? 14Hinwamba ngwenu, Kulingila Zambi, chamokomoko. Chika mutufumbula ha kufunga shimbi jenyi, hanji kwenda kumeso ja Yehova-wa-Tujita nikulinyenga? 15Haliapwila mutumona ngwe kawaha akwa kulizata. Akwa kulinga chipi kakuwaha, ni chikwo nawa muze meseka Zambi kakulilamwina.
16Henaho waze evwilile woma Yehova ahanjikile kanji umwe kuli mukwo ni mukwo; ni Yehova waapanjikile, wavwile, mba yasoneka mukanda wa kwiwuluka kumeso jenyi wa waze evwilile woma Yehova, nikunyonga ha jina lienyi. 17Yehova-wa-Tujita kanambe ngwenyi, Kumakapwa ninyami, a kupita ni kulemesa yami mwene ha tangwa lize mungukalinga. Mungukaavwila keke ngwe mutu kakuvwila keke mwanenyi wa lunga yoze wakumuvumbika. 18Henaho mba munuhandununa hakachi ka akwa ululi ni yingulungulu; hakachi ka mukwa kulingila Zambi ni yoze kamulingilile.
Currently Selected:
MALAKIA 3: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
