MALAKIA 2
2
1Kashika, enu asasendote, shimbi yino kuli yenu yili. 2Yehova-wa-Tujita kanambe ngwenyi, Nyi kunuchi kupanjika ni kuchisa mu mbunge kuchichimieka jina liami mungutuma shingo hali yenu. Yiwape yenu munguyishinga, chipwe haliapwila hinayishinga kulu mumu chino chuma kunwachisele mbunge. 3Mungukánjisa mbuto ye, mungukwita tuji ha meso jenu, tuji ja milambu yenu, ni yenu manumbata hamwe nayo. 4Chocho mununyingika yami hinatuma shimbi yino kuli yenu, hanga usendo wa yami ni Levi ukakole. Chocho kanambe Yehova-wa-Tujita. 5Usendo wa yami ni iye wapwile usendo wa mwono ni sambukila. Namuheleyo hanga akevwe woma; mba yanguvwilawo; yachikimina jina liami. 6Shimbi liamwenemwene liapwile mu kanwa lienyi; chipi nichimwe kachiwanyine ha mivumbo yenyi. Waliendelele ni yami ni sambukila ni ululi; watembwile anji ku uhenge. 7Mumu mivumbo ya sasendote chatamba kufunga yinyingi. Chatamba atu akafupe shimbi ku kanwa lienyi, mumu iye kanganda ka Yehova-wa-Tujita. 8Alioze yenu hinwahambuluka mu jila; hinwatalingisa anji ni shimbi jenu; hinwalumbula usendo wa Levi. Chocho kanambe Yehova-wa-Tujita. 9Kashika ngunanupwisa nwalela, nwasauka kumeso ja atu eswe, mumu kunwafungile ndako jami, alioze hinwalinga katonde ni shimbi.
10Te eswe hi tata umuwika ko? Katutangile kuli Zambi umuwika? Nyi chocho kuchi te twakulinga ni mafwefwe umwe kuli mukwo ni mukwo nikujilula usendo wa tulamba? 11Yunda halinga ni mafwefwe; halinga chuma cha kuvwisa lwaji mu Izalele ni mu Yerusaleme. Mumu Yunda hajilula tembele ya Yehova yize iye kanazange; hambata mwana wa zambi umwe wa tundaka. 12Kashika hali mutu yoze malinga chuma chino Yehova akasutule hakachi ka mbalaka ja Yakomba mukwa kushindakenya ni mukwa kukumbulula, hanji yoze maneha mulambu kuli Yehova-wa-Tujita.
13Ni chikwo nawa nwakulinga. Nwakufuka chilumbilo cha Yehova ni masoji, ni kulila, ni mikuma mumu katalile nawa mulambu chipwe kuutambula ni vumbi ku moko jenu. 14Nwakwamba ngwenu, Kuchi te kautambwile? Mumu Yehova wapwile chela cha usendo hakachi ka yena ni pwo lia ukweze we. Kwalalaminyine kuli iye, chipwe wapwile sepa lie ni pwo lie wa usendo. 15Zambi te katulingilile spiritu ya mwono nikuyiholesa? Mba yika anazange? Ana ja uwayilo kevwe. Kashika keyelenu, niumwe kandapwa ni mafwefwe kuli pwo lia ukweze wenyi. 16Yehova, Zambi ya Izalele kanambe ngwenyi, Mumu kulakula changupihila ni yoze mapihisa mazalo jenyi ni upupilo. Chocho kanambe Yehova-wa-Tujita. Kashika keyelenu kuli yenwene; kanda nupwa ni mafwefwe.
17Hinwakatalisa Yehova ni maliji jenu. Hindu nwakwamba ngwenu, Twamukatalisa kuchi? Ha kwamba ngwenu, Mweswe kanalingi chipi, kanapeme kumeso ja Yehova, aye kakuwahilila no. Hanji ha kuhula ngwenu, Zambi ya upatwilo wa kulita kuli ali?
Currently Selected:
MALAKIA 2: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
