LUKA 12

1Muze tununu anji akungulukile chocho aliachile umwe hali mukwo, waputukile kwamba kuli tumbaji twenyi kuliangila ngwenyi, Keyelenu futunwiso ya A-Fwariseu, yenayo ulembese. 2Alioze chuma cha kufukiwa chize kuchichi kafukuka chakuhi nichimwe; chipwe cha kuhengama chize kechi kachinyingika chakuhi nichimwe. 3Kashika cheswacho nwambile mu milima kumakachivwa mu mwalwa; ni chize nwahanjikile mu matwi mu yipatulo ya muchima kumakachiambujola ha mafulumba ja mazuwo.

4Mba ngunambe kuli yenu, tusendo twami ngwami, Kanda nuvwila woma waze akushiha mujimba, ni kulutwe lia chize keshi nacho nichimwe nawa chize mahasa kulinga. 5Alioze mungunutoweza yoze nukamuvwile woma, muvwilenu woma, yoze kulutwe lia kushiha, akwete chiyulo cha kumbila mu Ngehena; ewa, ngunambe kuli yenu ngwami, muvwilenu woma yoze! 6Keshi kulanjisa tulujila tutano ha tulumbongo twaali, nyi? Mba keshi kuvulama niumwe wa kuli ayo kumeso ja Zambi. 7Alioze chipwe je kambu ja mitwe yenu hanajalula jeswe. Kanda nwivwa woma; yenu kunwahiana tulujila tunji.

8Alioze ngunambe kuli yenu ngwami, Mweswawo mangutayiza kumeso ja atu, mwe Mwana Mutu kumakamutayiza nawa kumeso ja angelo ja Zambi. 9Alioze yoze malikata yami kumeso ja atu, kumakalikalaye liakulu kumeso ja angelo ja Zambi. 10Mweswawo mahanjika liji lia kusaula mwe Mwana Mutu, kumamukonekenalio; alioze yoze mashililika Spiritu Musandu, kechi kamukonekenacho. 11Muze manuneha kumeso ja masunangonga ni mianangana ni akwa kuyula, kanda nulipikala ha chize numukumbulula, hanji chize munukamba: 12mumu Spiritu Musandu kumanulongesa ha ola yize yene chize Chanutamba kwamba.

13Mba umwe wa ku mbunga, wambile kuli iye ngwenyi, Longeshi, amba mwanakwetu akalianyine chihinga ni yami. 14Alioze wambile kuli iye ngwenyi, Lunga, iya wangupwishile ngaji hanji mukwa kwanyina hakachi kenu? 15Iye wambile kuli ayo ngwenyi, Kanyamenu, lifungenu ku kuzo yeswe; mumu mwono wa mutu kuushi kupwa ni kulumbama cha yize ali nayo. 16Iye wahanjikile chishima kuli ayo ngwenyi, Minda ya umwe pichi yemine ya kulumbama. 17Iye wanyongene mu mbunge yenyi ngwenyi, Kuchi mungulinga? Mumu muhela chishi nawo muze mungutulikila mihuko yami. 18Ngwenyi, Chino mungulinga, mungupuzula machila jami, mungutanga anene ahiana, muze mwene mungutulikila mbuto yami yeswe ni yuma yami yipema. 19Mba mungwamba ku mbunge yami ngwami, Mbunge yami, yuma yinji uli nayo ya kutulikila ha miaka yinji; hwima, ulie, unwe, usehejele. 20Alioze Zambi ngwenyi, Chihepuke, ufuku uno kumatambula mwono we kuli yena; ni yuma yize hiunalulika, yaya muyipwa? 21Chocho anapu yoze wakulitulikila upite, keshi upite kuli Zambi.

22Iye wambile kuli tumbaji twenyi ngwenyi, Kashika ngwami, Kanda nulipikala ha mwono wenu, chize munulia; chipwe ha mujimba, chize munuzala. 23Mumu mwono kuwahiana kulia, ni mujimba kuwahiana mazalo. 24Zewulenu yikwakwalo, keshi kukuwa, chipwe keshi kucha; chila keshi nayo chipwe fwandinga, hindu Zambi kakwahoka; yenu kunwahianyine tujila, nyi? 25Mba iya wa kuli yenu ha kulipikala mahasa kuweza ku Chizundamo chenyi chipwe mbandu yimuwika? 26Kachi kashika kunwahashile kulinga chize chikepe, kuchi te nwakulipikala ha yize yikwo. 27Zewulenu lirio, ngwe chize muyitatuka; kuyishi kukilikita chipwe kuyishi kuhosa; alioze ngwami, Chipwe Solomone mu uhenya wenyi weswe kazalileko ngwe chimwe hakachi kayo. 28Kachi Zambi chocho majika mwambu uze muupwa musono, ni hamene maumbila mu jiko, Shinaho chikolo manujika yenu, yenu akwa Ufulielo ukepe? 29Kanda nufupa chize munulia, hanji chize mununwa, chipwe kanda nulipikala. 30Mumu yuma yino yeswe mavungu a hashi kakuyifupa; ni Tatenu kananyingika ngwe nwakufupafupa yino yuma. 31Alioze fupenu wanangana wenyi, mba kumanuwezela yino yuma yeswe.

32Kanda nwivwa woma, mbunga yikepe; mumu chinawahila Tatenu kunwaha wanangana. 33Lanjisenu chize nuli nacho, hanenu yawana kuli yiswale; litungilenu yipakumuna yize kuyishi kupapujoka, upite mu malilu uze kuushi kuhwa, muze mwiji keshi kukundama chipwe ndulu keshi kupihisa. 34Mumu kweswe upite wenu uli, kuze kwene mbunge jenu kumujipwa nawa.

35Zalilo jenu jilijichike miya, ni ndeya jenu jiyile. 36Pwenu ngwe atu akutatatata mwene wo, muze mahiluka ku ulungi; hanga, muze meza, mangongwela, akamwazulwile nikawashi. 37Kawaha ndungo aze, mwene muze meza maawana nikulá; pundu ngwami, Kumalijichika muya, maatwamisa ku mesa, makundama, maavumbika. 38Nyi kachi meza ha ola ya kalayi wamuchiali, hanji ha ola ya kalayi wamuchitatu, aawane chocho, kawaha waze. 39Alioze chino nyingikenu, kachi mwenya zuwo wanyingikine ha ola yize meza mwiji, kachi walayile, kachi kamutayijile kulokola zuwo lienyi. 40Yenu nawa lilulikenu: mumu ha ola yize kunushi kushinginyeka mwe Mwana Mutu meza.

41Petulu wambile ngwenyi, Mwene, unahanjika chishima kuli yetu nyi, shina kuli eswe nawa? 42Mwene ngwenyi, Iya kevwe kaselo wamwenemwene, wa kukanyama, yoze mwene wenyi masa helu lia akwa zuwo lienyi, mukuhana njongo yo ya kulia ha mwaka wayo? 43Kawaha ndungo yoze, mwene wenyi muze meza mamuwana kanalingi chocho. 44Chamwenemwene, ngwami, Kumamusa helu lia yize yeswe ali nayo. 45Alioze kachi ndungo yoze mamba mu mbunge yenyi ngwenyi, Mwene wami kanashimbula; maputuka kulamba akweze ni ana-mapwo akwa milimo, nikulialia, nikunwanwa, nikuzengewa. 46Mwenya ndungo yoze kumakeza ha tangwa lize keshi kutalatala, ni ha ola yize kachinyingikine, kumamupatula mukachi, mamusela chihanda ni waze kafulielele. 47Alioze ndungo yoze wanyingikine upale wa mwene wenyi, hindu kalulikileko, kalingile upale wenyi, kumamulamba ni mijiji yinji. 48Alioze yoze kanyingikineko, walingile yuma ya kutela lamba, kumamulamba ni mijiji yikepe. Ni mweswawo mamwaha yinji, kuli iye kumafwetesa yinji: ni kuli yoze makunjika yinji, kuli iye maketa yinji yahiana.

49Nejile mukumbila kahia hano hashi; ni chikwo chika munguzanga, kachi hakawika kulu? 50Alioze upapachiso nguli nawo akangupapachise nawo; ngunalishinyika Chichize ndo muumanunuka! 51Nunashinginyeka ngwe nejile mukuhana sambukila hano hashi, nyi? Ngwami, Ka, alioze kuhandununa: 52mumu chize ku haliapwila ndo ku miaka, atano a mu zuwo limuwika mahandunuka; atatu malihandununa kuli aali, ni aali malihandununa kuli atatu. 53Tato kumalihandununa kuli mwanenyi wa lunga, ni mwanenyi wa lunga kuli tato; naye malihandununa kuli mwanenyi wa pwo, ni mwanenyi wa pwo malihandununa kuli naye; tato-pwo malihandununa kuli tembwa-mwanenyi, ni tembwa-mwanenyi malihandununa kuli tato-pwo.

54Iye wambile nawa ku mbunga ngwenyi, Muze munumona lelwa linavumbuka ku Chitokelo, haze hene ngwenu, Vula kaneza; ni chocho muchipwa. 55Muze fuji ya ku Sule muyiza, ngwenu, Chivukuminya kumuchiza, ni chocho muchipwa. 56Yilembese, nunanyingika ngwe chize kulumbununa kusoloka cha hashi ni lilu; alioze ngwe kuchi kunwanyingikine kulumbununa we mwaka?

57Kuchi te chipwe kuli yenwene kunushi kupatula chize cha kululika. 58Mumu shimbu muoya hamwe ni mukwa kole ye kuli mukwa kuyula, eseka chikolo mu jila kuwana nenyi; kuchina hanji makukoka kuli sopi, ni sopi makukunjika kuli kapita, ni kapita makumbila mu zuwo lia ususu. 59Ngunambe kuli yenu ngwami, Kuchi katuhukamo nichimwe ndo hiwafweta chipwe kalumbongo ka kusula.

Currently Selected:

LUKA 12: Csa

Highlight

Copy