LUKA 11

1Shimbu apwile kumwe nikulemba, muze halitwamina, umwe wa kuli tumbaji twenyi wambile kuli iye ngwenyi. Mwene, tulongese kama kulemba, chizechene ngwe Yoano walongesele tumbaji twenyi. 2Iye wambile kuli ayo ngwenyi, Muze munulemba, ambenu ngwenu,

Tata yetu, uli mwilu, akalemese jina lie, wanangana we wize, upale we ulingiwe hano hashi chizechene ngwe mwilu. 3Twehe kama tangwa ha tangwa mbolo yetu yize twakufupa. 4Utukonekene kama milonga yetu; mumu yetu nawa twakukonekena mweswe uli ni kongo kuli yetu. Kanda ututwala kama ku cheseko, alioze tupulule kama kuli mwe mupi.

5Iye wambile kuli ayo ngwenyi, Iya hakachi kenu mapwa ni kasendo, nyi maya kuli iye ha muchima ufuku, akambe kuli iye ngwenyi, Kasendo kami, ngwehe kama mbolo jitatu; 6mumu kasendo kami mu wenyi heza kuli yami, chishi nacho chize mungumwaha; 7iye muchima lia zuwo makumbulula ngwenyi, Kanda unguketeka; hinájila pito kulu, ni anami hapomba hamuwika ni yami; Chahashile kuhinduka ngukwehe. 8Ngwami, Chipwe keshi kuhinduka akanwehe mumu iye kasendo kenyi, hindu mumu ha kuketeka chenyi kumakahinduka akanwehe jeswe mafupa. 9Ngunambe kuli yenu ngwami, Etenu, mba kumakanwaha; fupenu, mba kumunukawana; ngongwelenu, mba kumakanwazulwila. 10Mumu mweswe meta, matambula; ni yoze mafupa, mawana; ni yoze mangongwela, kumakanwazulwila. 11Chisemi muka hakachi kenu, kachi mwanenyi meta mbolo, mamwaha liwe? Hanji meta yishi, mamwaha kapela? 12Hanji meta lionda, mamwaha kavwanda, nyi? 13Mba kachi yenu nuli api, nunanyingika kuhana yawana yipema kuli ana jenu, Shinaho chikolo Tatenu wa mwilu mahana Spiritu Musandu kuli waze mamwita, nyi?

14Iye te kanatuhwisa ndemoniu kamama. Muze te ndemoniu hatuhuka, kamama wahanjikile; mbunga akomokene. 15Alioze amwe a kuli ayo ambile ngwo, Ni tachi ja Mbelezepu, mwata wa andemoniu, kakutuhwisa andemoniu. 16Akwo, nikumweseka, afupile kuli iye chilayi cha mwilu. 17Alioze iye, nikunyingika yitaka yo, wambile kuli ayo ngwenyi, Mawanangana waze eswe malihandununa ene kumakaapwisa ahululu; ni zuwo lia kuhandunuka mulipuzuka. 18Nyi kachi nawa Satana malihandununa mwene, ngwe kuchi wanangana wenyi muukola? Mumu nunambe ngwenu, kakutuhwisa andemoniu ni tachi ja Mbelezepu. 19Kachi yami ni tachi ja Mbelezepu nakutatwisa andemoniu, anenu a malunga ni tachi jaya akwatuhwisa? Kashika kumakapwa akwa kunupatwila. 20Alioze kachi ni munwe wa Zambi yami nakutuhwisa andemoniu, kachi wanangana wa Zambi hiuneza hali yenu. 21Muze chitakame wa kulipakata mafunga zuwo lienyi, yikumba yenyi muyiwaha. 22Alioze muze yoze makangana kuhiana iye meza, mamukumba, machiza kulipakata chenyi chize wachikolelele, iye makapangila yikumba yenyi. 23Yoze keshi hamwe ni yami kanalimika ni yami; ni yoze keshi kukunga hamwe ni yami kanasandula.

24Spiritu ya luchisa muze te hatuhuka muli mutu, mapalika ndusu muma mumu, nikufupa uhwimino. Se keshi kuuwana, mamba ngwenyi, Munguhilukila ku zuwo liami muze natuhukile. 25Iye se heza, maliwana lia kukomba, lia kululika. 26Hohene maya, matwala hamwe nenyi maspiritu eka shimbiali a ungulungulu ahiana; no manjila, matwamamo. Songo lia yoze mutu mulihiana kupiha.

27Shimbu machihanjika yino yuma, umwe pwo wa ku mbunga wakalumiokene, ngwenyi, Kuliawaha jimo lize liakusemene ni mele aze waamwine. 28Iye wambile ngwenyi, Ewa Shinaho, kawaha waze akwivwa liji lia Zambi nikulifunga.

29Muze mbunga ahonekene nikukungama waputukile kwamba ngwenyi, Chisemuko chino che chisemuko cha ungulungulu: chakufupa chilayi; ni chilayi kechi kaahacho shina chilayi cha profeta Yona. 30Mumu chizechene ngwe Yona wapwile chilayi kuli A-Ninive, chocho nawa mwe Mwana Mutu makapwa ku chisemuko chino. 31Mwanangana wa pwo wa ku Sule kumakahinduka ha upatwilo hamwe ni malunga ja chisemuko chino, makaahisa: mumu iye wakatukile ku masongo ja hashi mukwivwa mana ja Solomone; kumanyi, umwe Wahiana Solomone kuno kwali. 32Malunga a ku Ninive kumakahinduka ha upatwilo hamwe ni chisemuko chino, makachihisa: mumu alikonyekene ha kwambujola cha Yona; kumanyi, umwe Wahiana Yona kuno kwali.

33Niumwe, muze hawika ndeya, mayisa ku tenga, chipwe mushi lia chisoka, alioze ha chikwachilo cha ndeya, hanga waze manjila akamone pangu. 34Ndeya ya mujimba we, liso lie; muze liso lie mulipwa lingunu, mujimba we weswe muuzala tò ni pangu; alioze muze mulipwa lipi, mujimba we nawa muuzala tò ni milima. 35Chitalenu, kashika pangu lize lili muli yena kanda Ukapwa milima. 36Kachi kashika mujimba we weswe muuzala tò ni pangu, ni chihanda nichimwe cha milima, kachi muuzala weswe ni pangu, chizechene ngwe muze ndeya muyikupangulwisa ni pangu liayo.

37Achi, shimbu ahanjikile, umwe Ka-Fwariseu wamulakenyene alie hamwe nenyi, iye wanjilile, Watwamine ku mesa. 38Muze Ka-Fwariseu achimwene, wakomokene kumona ngwe kaliangile kusana shimbu kanda alia. 39Alioze Mwene wambile kuli iye ngwenyi, Achi, yenu A-Fwariseu nwakupemesa haze lia musenge ni lia panda; alioze muchima lienu munazala ni mbenga ni ungulungulu. 40Yihepuke, yoze watangile haze katangile muchima nawa, nyi? 41Alioze Shinaho hanenu yawana ya ku yize yili muchima; nyi chocho, yuma yeswe muyipwa yipema kuli yenu.

42Alioze lamba lienu A-Fwariseu! nwakutambula chihanda cha kumi cha chimbumba ni aluta, ni yilimalima yeswe, alioze nwakulelesa ululi ni zango lia Zambi: Chanutamba Shinaho kulinga yino ni kulitwamina yikwo, ka. 43Lamba lienu A-Fwariseu! mumu nwakuzanga yitwamo ya kulutwe mu masunangonga, nwakuzanga anumeneke mu yitanda. 44Lamba lienu akwa kusonyeka ni A-Fwariseu! yilembese! mumu nunapu ngwe mafuka aze keshi kusoloka, ni waze mapalikaho keshi kuchinyingika.

45Mba umwe wa kuli akwa shimbi wamukumbulwile, ngwenyi, Longeshi, ha kwamba yino yuma unatusaula nawa. 46Iye wambile ngwenyi, Lamba lienu akwa shimbi nawa! mumu nwakutwika akwo yiteli yikalu kumbata, ni yenwene kunushi kusa chipwe munwe umuwika ku chiteli. 47Lamba lienu! mumu nwakutunga mafuka ja aprofeta, ni akakenu aashihile. 48Chocho nunapu yela, nwakutayiza ku yitanga ya akakenu! mumu o aashihile ni yenu nwakutunga mafuka jo. 49Kashika nawa mana ja Zambi ambile ngwo, Mungukatuma kuli ayo aprofeta ni apostolo; mba amwe a kuli ayo makaashiha, nikwahungumiona; 50hanga manyinga ja aprofeta eswe aze amwanganyine chize ku kusela cha fundamentu ya hashi, akaafwetese ha chisemuko chino; 51chize ku manyinga ja Abele ndo ku manyinga ja Zakaria, yoze wafwile hakachi ka chilumbilo ni tembele: ewa, ngwami, Kumakaafwetesa ha chisemuko chino. 52Lamba lienu akwa shimbi! mumu nwachijile sapi ya chinyingi; kunwanjilile yenwene, ni waze apwile nikunjila nwaakwikile.

53Muze te hatuhukamo, akwa kusonyeka ni A-Fwariseu aputukile kumushinjila chikolo nikumusungasunga ahanjike yuma yinji; 54nikumujikinyina, nikufupa kukwata chuma chimwe mu kanwa lienyi hanga amusume.

Currently Selected:

LUKA 11: Csa

Highlight

Copy