YOANO 11

1Achi, umwe mutu wayijile, Lazaru wa ku Mbetaniya, wa ku chihunda cha Maria ni yayo Marta. 2Iye Maria, yoze wawayishile Mwene ni yitumbo ya vumba lipema, wakusumwine yiliato yenyi ni kambu jenyi, ndumbwenyi Lazaru wayijile. 3Mapangienyi kashika atumine kuli iye, ngwo, Mwene, yoze yena wakumufwila, kanayiji. 4Alioze muze Yesu achivwile, wambile ngwenyi, Kuyiza chino hi cha kufwa ko, alioze cha kuneha uhenya kuli Zambi, hanga akachichimieke nacho mwe Mwana Zambi.

5Achi, Yesu wazangile Marta, ni mwanakwo, ni Lazaru. 6Muze kashika evwile ngwo, Kanayiji, wasalile matangwa aali muma muze apwile. 7Mba kulutwe yamba kuli tumbaji twenyi, ngwenyi, Tatuyenu ku Yundeya cheka nawa. 8Tumbaji yamba kuli iye ngwo, Longeshi, kashimbu wika hanga A-Yunda afupile kukwasa mawe, mba muoya kuze cheka nawa, nyi? 9Yesu wakumbulwile ngwenyi, Mwalwa kuushi ni kumi lia ola ni ola jiali, nyi? Kachi umwe menda ha mwalwa keshi kuhukana, mumu mamona pangu lia hashi. 10Alioze kachi umwe menda ha ufuku mahukana, mumu pangu kulishimo muli iye. 11Yino yuma wambile, ni kulutwe yamba kuli ayo ngwenyi, Kasendo ketu Lazaru hanayi mu tulo; alioze munguya, hanga ngukamulawise mu tulo. 12Tumbaji kashika ambile kuli iye ngwo, Mwene, kachi hanayi tulo, kachi makahinduka. 13Achi, Yesu te kanambe kufwa chenyi: alioze o ashinginyekene ngwo, Kanahanjika ha kupomba tulo. 14Hohene Yesu kashika wambile kuli ayo pundu ngwenyi, Lazaru hafwa. 15Mba hali yenu ngunawahilila te chapwileko, hanga nukafuliele; alioze tatuyenu kuli iye. 16Tomase kashika, yoze ukwete jina likwo ngwo, Ndilimu, wambile kuli tumbaji-ni-akwo ngwenyi, Tatuyenu yetu nawa hanga tukafwe hamwe nenyi.

17Yesu kashika muze ahetele, wawanyine te hapwa kulu matangwa awana mu fuka. 18Achi Mbetaniya kwapwile hakamwihi ni Yerusaleme, ngwe kilometro jitatu; 19ni anji a kuli A-Yunda ayile kuli Marta ni Maria, hanga akaasangulwise ha kutwala kuli ndumbwo. 20Marta kashika muze evwile ngwo, Yesu kaneza, wayile nikumupatwiza: alioze Maria wasalile mu zuwo. 21Marta kashika wambile kuli Yesu ngwenyi, Mwene, kachi yena unakapwa kama kuno, kachi ndumbwami kafwile. 22Chipwe haliapwila ngunanyingika cheswacho muwita kuli Zambi, Zambi kumakakwahacho. 23Yesu yamba kuli iye ngwenyi, Ndumbwe kumakahinduka. 24Marta yamba kuli iye ngwenyi, Ngunanyingika makahinduka ha uhindukilo ha tangwa lia kusula. 25Yesu wambile kuli iye ngwenyi, We uhindukilo ni we mwono yami: yoze mangufuliela, chipwe mafwa, hindu kumakapwa ni mwono. 26Ni mweswe uli ni mwono, mangufuliela, kechi kafwa nichimwe ndo ku miaka ya mutolo; Unafuliela chino, nyi? 27Yamba kuli iye ngwenyi, Ewa, Mwene: hingunafuliela ngwami, mwe Kristu yena, mwe Mwana Zambi, yoze meza hano hashi.

28Muze te hamba chocho, wayile, watambikile mwanakwo Maria ku tenga, ngwenyi, Longeshi heza, kanakutambika. 29Iye muze achivwile, wakatukile nikawashi, wayile kuli iye. 30Achi Yesu kanda achiza ku chihunda, alioze wapwile kuma kuze amupatwijile Marta. 31A-Yunda kashika waze apwile hamwe nenyi mu zuwo, nikumusangulwisa, muze amwene Maria ngwe wakatukile nikawashi atuhuke, amukawile, nikushinginyeka ngwo, Kanayi ku fuka mukulililako. 32Maria kashika ejile kuze apwile Yesu, muze hamumona, wafulamanyine ku yiliato yenyi, nikwamba kuli iye ngwenyi, Mwene, kachi yena unakapwa kama kuno, kachi ndumbwami kafwile. 33Muze Yesu kashika amumwene kanalili, ni A-Yunda nawa analili, waze ejile hamwe nenyi, watwile mikuma mu Spiritu, nikulipikala. 34Wambile ngwenyi, Kulihi nunakamusa? Yamba kuli iye ngwo, Mwene, tweya utale. 35Yesu Walilile. 36A-Yunda kashika ambile ngwo, Talenu ngwe wamufwilile! 37Alioze amwe a kuli ayo ambile ngwo, Yono mutu walawishile meso ja kapuputa, kahashile kumufunga hanga kechi kufwa, nyi?

38Yesu kashika nikutwa mikuma cheka nawa mu mbunge yenyi, yeza ku fuka. Achi fuka liapwile chivwenge, ni liwe aliseleho. 39Yesu yamba ngwenyi, Chizenu liwe. Marta, ndumbu wa mufu, yamba ngwenyi, Mwene, kanakupuka kulu; mumu matangwa awana hapalika. 40Yesu yamba kuli iye ngwenyi, Chambile kuli yena ngwami, Kachi mufuliela kachi mumona uhenya wa Zambi, nyi? 41Achijile kashika liwe; ni Yesu wahetwile meso jenyi kwilu, iye wambile ngwenyi, Tata, ngunakusakwila mumu wanguvwile. 42Ngunanyingika wakungwivwavwa matangwa eswe: alioze mumu ha mbunga yize akungujingilika nachamba, hanga afuliele ngwe wangutumine. 43Muze te hamba chocho, wakololokele ni liji linene ngwenyi, Lazaru, tuhukamo. 44Mufu watuhukile, wa kukasa molu ni moko ni miya ya fuka, ni ku meso jenyi kwakujinga ni chitambala. Yesu yamba kuli ayo ngwenyi, Mujitulenu, numweche aye.

45Anji kashika a kuli A-Yunda waze ejile kuli Maria, ha kumona chize alingile Yesu, amufulielele. 46Alioze amwe a kuli ayo ayile kuli A-Fwariseu, o ambile kuli ayo yuma yize alingile Yesu. 47Asasendote akwa lutwe kashika ni A-Fwariseu alikungulwile mukutwama punga, o ambile ngwo, Kuchi mutulinga? Mumu yono mutu kakulinga yilayi yinji. 48Kachi mutumwecha chocho, kachi eswe makamufuliela, ni A-Roma makeza, makachiza ni muhela wetu ni vungu lietu. 49Alioze umwe wa kuli ayo, Kayafwa, se wapwile sasendote mukwa lutwe ha mwaka uze wene, wambile kuli ayo ngwenyi, Yenu kunwanyingikine nichimwe. 50Chipwe kunushi kushinginyeka ngwe chinatambe mutu umuwika akatwile e atu, kuchina vungu lieswe lukombo makuwa. 51Alioze chino kambileko cha kuli iye mwene; alioze se wapwile sasendote mukwa lutwe ha mwaka uze, waprofetezele ngwenyi, Yesu mafwila lie vungu lieswe; 52ni hi vungu wika ko, alioze hanga akakungulule nawa kuli umuwika ana a Zambi waze anamwangana. 53Chize ku tangwa lize kashika atwamine punga hanga akamushihe.

54Yesu kashika kendeleko nawa kumeso ja atu eswe hakachi ka A-Yunda, alioze wakatukile kuze mukuya ku chifuchi cha kusulangana ni puya ku limbo, jina lialio, Eframe; watwamineko hamwe ni tumbaji twenyi.

55Alioze Chizomboka cha A-Yunda chakundamine: ni anji a ku chifuchi chize akandukile ku Yerusaleme muze te Chizomboka kanda chipwa, hanga akalipemese. 56Afupile kashika Yesu, o aliambile hakachi ko, nikumana mu tembele ngwo, Kuchi nunashinginyeka? Kechi kwiza ku chiwanyino, nyi? 57Achi asasendote akwa lutwe ni A-Fwariseu te hahana shimbi, kachi umwe manyingika kuze ali, kachi akachambulule, hanga akamukwate.

Currently Selected:

YOANO 11: Csa

Highlight

Copy