YOANO 12

1Yesu kashika, matangwa asambano shimbu Chizomboka kanda chiheta, wejile ku Mbetaniya, kuze apwile Lazaru, yoze amuhindwishile Yesu hakachi ka afu. 2Kuze kashika amulingilile chiteleka: ni Marta wavumbikile; alioze Lazaru wapwile umwe wa kuli waze atwamine ku mesa hamwe nenyi. 3Maria kashika wanjile #12.3 Libra—ngwe meio kilo.libra ya yitumbo ya vumba lipema, yilemu chikolo, wawayishile nayo yiliato ya Yesu, wakusumwine yiliato yenyi ni kambu jenyi; ni zuwo liazalile tò ni vumba lia yitumbo. 4Alioze Yundase Ka-Keriote, umwe wa kuli tumbaji twenyi, yoze mamukunjika, yamba ngwenyi, 5Kuchi te kalanjishile yitumbo yino ha kulakaji atatu a mbongo, akajihane kuli yiswale? 6Achi, kambile chino mumu wanyongene yiswale, ka; alioze mumu wapwile mwiji, ni se wapwile ni tuku, iye wambachile jize aselemo. 7Yesu kashika wambile ngwenyi, Mwechenu; ha tangwa lia kufunda chami hanayifungu. 8Mumu yiswale nuli no matangwa eswe hamwe ni yenu; alioze yami, kunushi ni yami matangwa eswe.

9Mbunga yinene ya A-Yunda kashika anyingikine iye wapwileko: o ejile, hi mumu hali Yesu wika ko, alioze hanga akamone Lazaru nawa, yoze amuhindwishile hakachi ka afu. 10Alioze asasendote akwa lutwe atwamine punga, hanga akashihe Lazaru nawa; 11mumu te hali iye anji a kuli A-Yunda apwile nikuya, nikufuliela Yesu.

12Muze hikwacha, mbunga yinene ya waze ejile ku chiwanyino, muze evwile ngwo, Yesu kaneza ku Yerusaleme, 13anjile mitango ya mingaji, atuhukile mukumupatwiza, nikukololoka ngwo, Vulie! Kafumana yoze meza mu jina lia Mwene! mwe Mwanangana wa Izalele! 14Yesu muze te hawana mwana-chimbulu, watwamine hali iye; ngwe chinasonewa ngwo,

15Kanda wivwa woma, yena mwana wa Zaione;

Tala Mwanangana we kaneza, kanatwama hali mwana-chimbulu.

16Yino yuma tumbaji twenyi kayinyingikine hatangu; alioze muze te Yesu hanjila mu uhenya wenyi, hohene ewulukile ngwe yino yuma yasonewene hali iye, ngwe alingile yino yuma kuli iye. 17Mbunga kashika yize apwile hamwe nenyi, muze atambikile Lazaru atuhuke mu fuka, amuhindwishile hakachi ka afu, ashindakenyene. 18Ha chikuma chino nawa mbunga amupatwijile, mumu evwile ngwo, Halinga chilayi chino. 19A-Fwariseu kashika aliambile hakachi ko ngwo, Nunamono ngwe kunushi kulinga nichimwe; talenu, akwa hashi eswe hanayi kunyima yenyi.

20Hakachi ka waze akandukile mukuwayila ku chiwanyino kwapwile amwe A-Ngresia. 21Wano kashika ejile kuli Fwilipe, yoze wa ku Mbeteseta, limbo lia mu Ngalileya, o amulembele ngwo, Mwane, tunazange kumona Yesu. 22Fwilipe yaya, yambulwila Andeleu: Andeleu ni Fwilipe yaya, o yambulwila Yesu. 23Yesu yaakumbulula, ngwenyi, Ola hiyeza, mwe Mwana Mutu akanjile mu uhenya wenyi. 24Pundu, pundu, ngunambe kuli yenu ngwami, Lunona wa tiliku matwama ukawenyi shina maholoka hashi, mafwa; alioze kachi mafwa, kachi mema mihuko yinji. 25Yoze mazanga mwono wenyi, mautokesa; ni yoze mavwila kole mwono wenyi hano hashi, kumakaufungu ku mwono wa mutolo. 26Kachi umwe manguvumbika, kachi akangukaule; ni kuze yami nguli, kuze kwene nawa kumakapwa kavumbi kami: kachi umwe manguvumbika, kachi Tata kumakamulemesa.

27Haliapwila mbunge yami yinalipikala, kuchi mungwamba? Tata, ngulamwine ku ola yino. Alioze ha chikuma chino hineza ku ola yino. 28Tata, chichimieka jina lie. Kashika liji liatuhukile mwilu ngwo, Hingunalichichimieka, kumungukalichichimieka cheka nawa. 29Mbunga kashika, yize amanyineko, o evwile, ambile ngwo, Kunakulunguza: akwo ambile ngwo, Mungelo kahanjika kuli iye. 30Yesu wakumbulwile, ngwenyi, Liji lino kuliejile mumu hali yami, alioze mumu hali yenu. 31Haliapwila upatwilo wa hashi hiweza; haliapwila kumambila haze mwata wa hashi. 32Nyi kachi manguzundula hashi, kachi mungukakoka atu eswe kuli yami mwene. 33Alioze chino wambile nikulweza kufwa chize mafwa. 34Mbunga kashika amukumbulwile ngwo, Hitunevu mu shimbi ngwo, Kristu matwama ndo ku miaka ya mutolo; ngwe kuchi yena unambe ngwe, Chatamba kuzundula mwe Mwana Mutu? Yono mwe Mwana Mutu iya? 35Yesu kashika wambile kuli ayo ngwenyi, Hindu shimbu likepe nawa pangu lichili hakachi kenu. Endenu shimbu nuli ni pangu, hanga milima kuyichi kanuwana; ni yoze menda mu milima kanyingikine kuze maya. 36Shimbu nuli ni pangu, fulielenu pangu, hanga nukapwe ana a pangu.

Yino yuma ahanjikile Yesu, mba yakatuka, yaswama kuli ayo. 37Alioze chipwe hanalingi kulu yilayi yinji chikolo kumeso jo, hindu kamufulielele: 38hanga liji lia profeta Izaia likamanunuke, lize ambile ngwenyi,

Mwene, iya hanafuliela sango lietu?

Kuli iya kwoko lia Mwene hilinasoloka?

39Ha chikuma chino kahashile kufuliela, mumu te Izaia wambile cheka nawa ngwenyi,

40Iye hanapupuchisa meso jo, iye hanakalisa mbunge jo;

Kuchina mamona ni meso jo, manyingika ni mbunge jo, akalumuke,

Ni yami mungwahindwisa.

41Yino yuma ambile Izaia, mumu wamwene uhenya wenyi; wahanjikile ha kutwala kuli iye. 42Chipwe chocho, hindu anji a kuli akwa kuyula akamufuliele; alioze mumu hali A-Fwariseu kamutayijileko, kuchina makaakatwisa ku sunangonga: 43mumu azangile uhenya wa atu, hi uhenya wa Zambi ko.

44Yesu wakololokele ngwenyi, Yoze mangufuliela kafulieleleko yami, alioze kuli yoze wangutumine. 45Ni yoze mangumona, mamona yoze wangutumine. 46Hinguneza ngwe pangu hano hashi, hanga mweswawo mangufuliela, kechi katwama mu milima. 47Kachi umwe mevwa maliji jami, keshi kwafunga, yami chishi kumupatwiia: mumu chejile hanga ngukapatwile akwa hashi, alioze hanga ngukalamwine akwa hashi. 48Yoze malituna yami, keshi Kutambula maliji jami, kali ni yoze mamupatwila: liji lize nahanjikile, lienalio kumulikamupatwila ha tangwa lia kusula. 49Mumu chahanjikile cha kuli yami mwene; alioze Tata yoze wangutumine, iye mwene hanangwehe shimbi, chize mungwamba, ni chize munguhanjika. 50Ngunanyingika shimbi yenyi, mwono wa mutolo; yuma yize kashika nakuhanjika, chizechene ngwe Tata hanambe kuli yami, chocho nakuhanjika.

Currently Selected:

YOANO 12: Csa

Highlight

Copy