YOANO 10

1Pundu, pundu, ngunambe kuli yenu ngwami, Yoze keshi kunjilila ku chikolo mu limba lia mapanga, alioze manyinyina kweka, mwenawo mwiji ni muhuza. 2Yoze manjilila ku chikolo iye mwe kafunga ka mapanga. 3Iye, mukwa kufunga chikolo mamwazulwila; ni mapanga mevwa liji lienyi: iye matambika mapanga jenyi mwene ha majina jo, iye maatwala haze. 4Muze te hatuhwisa nienyi mwene eswe, maatetekela, ni mapanga mamukaula: mumu manyingika liji lienyi. 5Alioze chilambala kechi kamukaula, alioze mamuchina: mumu kanyingikine liji lia yilambala. 6Chishima chino Yesu wahanjikile kuli ayo: alioze kanyingikine chize ahanjikile kuli ayo.

7Yesu kashika wambile kuli ayo cheka nawa ngwenyi, Pundu, pundu, ngunambe kuli yenu ngwami, Chikolo cha mapanga yami. 8Waze eswe anguliangilile kwiza, eji ni mihuza; alioze mapanga kaevwileko. 9Chikolo yami; kachi umwe manjilila kuli yami, kumakamulamwina, makanjilanjila, makatuhwoka, makawana kelo. 10Mwiji keshi kwiza shina ha kwiya, akashihe, akonwone: yami nejile hanga akapwe ni mwono, hanga akapwe nawo wa kulumbama. 11Mwe kafunga mupema yami; kafunga mupema matumbika mwono wenyi hali mapanga. 12Alioze yoze wakulingila fweto, iye hi kafunga ko, mapanga hi nienyi ko, mamona kangunga kaneza, mahichika mapanga, machina; ni kangunga maachangumuna, maamwanga. 13Achi, yoze wakulingila fweto machina, mumu iye mukwa kulingila fweto, keshi kunyonga mapanga. 14Mwe kafunga mupema yami, ngunanyingika waze niami, ni waze niami kanangunyingika, 15chizechene ngwe Tata kanangunyingika, ni yami ngunanyingika Tata; mungutumbika mwono wami hali mapanga. 16Mapanga akwo nguli no, waze hi a ku limba lino ko, waze nawa, changutamba kwaneha, kumakevwa liji liami; o kumakapwa chendo chimuwika, kafunga umuwika. 17Kashika mwe Tata kakunguzanga, mumu mungutumbika mwono wami, hanga ngukawande cheka nawa. 18Niumwe mauchiza kuli yami, alioze munguutumbika yami mwene. Chiyulo nguli nacho cha kuutumbika, ni chiyulo nguli nacho cha kuwanda cheka nawa. Shimbi yino nayitambwile kuli mwe Tata.

19Kwapwile kulihandununa cheka nawa hakachi ka A-Yunda mumu ha maliji ano. 20Anji a kuli ayo ambile ngwo, Ndemoniu akwete, kanazaluka; kuchi te nunamwivu? 21Akwo ambile ngwo, Maliji ano hi a kuli mukwa ndemoniu ko. Ndemoniu mahasa kulawisa meso ja kapuputa, nyi?

22Ha matangwa aze afungile ku Yerusaleme chiwanyino cha kulitumbikila: 23kwapwile mwaka wa chishika; ni Yesu te kanende mu tembele mu senge lia Solomone. 24A-Yunda kashika amujingilikile, o ambile kuli iye ngwo, Ndo mwiji muka mukatupwisa ni chisweswe? Kachi mwe Kristu yena, twambulwile pundu. 25Yesu waakumbulwile ngwenyi, Nanwambulwilile, alioze kunushi kufuliela: yitanga yize nakulinga mu jina lia Tata, yino kuyakushindakenya hali yami. 26Alioze kunushi kufuliela, mumu hi nuli a kuli mapanga jami ko. 27Mapanga jami kakwivwavwa liji liami, yami ngunaanyingika, no kakungukaula: 28ngunaahe mwono wa mutolo; o kechi katoka nichimwe ndo ku miaka ya mutolo, mba niumwe kechi kaachangumuna ku kwoko liami. 29Tata, yoze wanguhelo, iye munene wahiana eswe; mba niumwe mahasa kwachangumuna ku kwoko lia Tata. 30Yami ni Tata tuli umuwika.

31A-Yunda anjile mawe cheka nawa hanga amwase. 32Yesu waakumbulwile ngwenyi, Yitanga yinji yipema hingunanulweze ya kuli Tata; ha chitanga chika cha yize munungwashila mawe? 33A-Yunda amukumbulwile ngwo, Ha chitanga chipema kutuchi kukwasa mawe, alioze ha kushililika Zambi; mumu yena, se uli mutu, wakulipwisa Zambi. 34Yesu waakumbulwile ngwenyi, Kuchasonewene mu shimbi yenu ngwo, Nambile ngwami, Nuli mazambi, nyi? 35Kachi waavulukile ngwenyi, Mazambi, waze kuli ayo liji lia Zambi liahetele (ni chisoneko kuchishi kuhasa kuhwa), 36nunambe hali yoze Tata hanamusela ku lisandu, hanamutumu hano hashi ngwenu, Yena unashililika Zambi, mumu hinamba ngwami, Mwe Mwana Zambi yami, nyi? 37Kachi chishi kulinga yitanga ya Tata, kanda nungufuliela. 38Alioze kachi nakuyilinga, chipwe kunushi kungufuliela, fulielenu yitanga: hanga nukanyingike, hanga nukafuliele ngwe mwe Tata mwali muli yami, ni yami muli iye. 39Afupile kashika cheka nawa kumukwata: iye wakatukile kuli ayo.

40Wayile kuze kanda lia Yordau, kuma kuze Yoano apwile nikupapachisa hatangu: kuze Watwamine. 41Anji ejile kuli iye; ambile ngwo, Yoano, chamwenemwene, kalingile chilayi nichimwe; alioze yuma yize yeswe ahanjikile Yoano ha kutwala kuli yono mutu yapwile yamwenemwene. 42Anji amufulielele kuze.

Currently Selected:

YOANO 10: Csa

Highlight

Copy