UPUTUKILO 21

1Yehova yanangisa Sara ngwe ambile. Yehova yalinga ni Sara ngwe ahanjikile. 2Mba Sara yaka ufumba, yasemena Apalahama mwana wa lunga mu ushinakaji wenyi, ha mwaka uze Zambi wamulakenyene. 3Mwanenyi yasemuka kuli iye, yoze te Sara yamusemena, Apalahama yamuluka jina ngwenyi, Izake. 4Apalahama wapwishile ngalami mwanenyi Izake muze hapwa ni matangwa nake ngwe Zambi hamwamba. 5Apalahama yapwa ni kulakaji Ha miaka muze asemene mwanenyi Izake. 6Sara yamba ngwenyi, Mba Zambi hangwaha kuseha, ni waze eswe machivwa maseha hamwe ni yami. 7Yamba nawa ngwenyi, Iya te wanyongene kwamba kuli Apalahama ngwenyi, Sara meza kwamwisa ana? Mumu hinamusemena mwana mu ushinakaji wenyi.

8Mba mwana watatukile, yamusumuna. Apalahama yalinga chiteleka chinene ha tangwa lize asumwine Izake. 9Sara yamona mwana wa Hekare Ka-Engitu, yoze wasemenene Apalahama, te kanalenye. 10Kashika yamba kuli Apalahama ngwenyi, Huma yono kapinji ni mwanenyi, mumu mwana wa kapinji kechi kuswana hamuwika ni mwanami, yono Izake. 11Chuma chino chapwile chikalu kumeso ja Apalahama ha mukunda wa mwanenyi. 12Alioze Zambi yamba kuli Apalahama ngwenyi, Kanda chipwa chikalu kumeso je mumu ha mukunda wa mwana ni ndungo ye wa pwo. Cheswacho Sara makwamba, panjika ku liji lienyi, mumu muli Izake makavuluka munyachi we. 13Alioze kuli mwana wa ndungo nawa mungutanga vungu, mumu iye nawa munyachi we. 14Apalahama yalimeneka, yanda mbolo ni tuku ya meya, yayihana kuli Hekare nikumutwikayo ha chipaya, ni mwe mwana, chocho yaakatwisa. Mba mwe pwo yaya nikwendangana mu puya ya Mbia-shipa.

15Meya mu tuku yahwa, mba yahichika mwana mushi lia chimwe chiputa. 16Yaya, yatwama hatalanganyi nenyi alioze kapinji kaliko ngwe kukonga cha mwivu, mumu yamba ngwenyi, Kanda ngutala kufwa cha mwana. Chocho yatwama hatalanganyi nenyi nikulila mbimbi. 17Zambi yevwa liji lia mwana mba mungelo wa Zambi mwilu yasanyika Hekare ngwenyi, Kuchi unevu yena Hekare? Kanda wivwa woma, mumu Zambi hevwa liji lia mwana kuze ali. 18Katuka, zundula mwe mwana umukwate mu moko je, mumu mungutanga kuli iye vungu linene. 19Mba Zambi yalawisa meso jenyi yamona shima lia meya, yaya, yazalisa tuku ni meya, yanwisa mwana. 20Zambi wapwile hamwe ni mwana, mba watatukile. Watwamine mu puya, wapwile ngashi. 21Watwamine mu puya ya Parane, mba naye yamumbachisa pwo wa ku Engitu.

22Ha mwaka uze Apimeleke ni kapitau ka tujita twenyi Fwikole yahanjika ni Apalahama ngwo, Zambi hwali hamwe ni yena mu yuma yeswe wakulinga. 23Kashika ulishinge hano ni Zambi kuli yami ngwe, kuchi kulinga ni kwonga kuli yami, chipwe kuli mwanami, chipwe kuli mujikulu wami. Alioze ukalinge nikulita ni utu uze yami nalingile kuli yena, chocho mulinga kuli yami ni ku chifuchi chino watwamamo njize. 24Apalahama yakumbulula ngwenyi, Mungulishinga. 25Mba Apalahama yámbila Apimeleke mumu ha shima lia meya ngamba ja Apimeleke te hatambula ni tachi. 26Apimeleke yamba ngwenyi, Chanyingikine yoze walingile chuma chino, chipwe yena kwangulwezelecho, chipwe kwivwa chachivwile ndo musono. 27Mba Apalahama yanda mapanga ni ngombe, yaahana kuli Apimeleke. Chocho o aali yakolesa usendo. 28Apalahama yasela ukawo ana-mapanga shimbiali a yihwo. 29Apimeleke yamba kuli Apalahama ngwenyi, Wano ana-mapanga shimbiali a yihwo hiwaasela kwa ukawo kuchi analumbunuka? 30Iye yakumbulula ngwenyi, Wano ana-mapanga shimbiali a yihwo kumutambula ku kwoko liami akapwe chinyingi kuli yami ngwe yami nafulile shima lino. 31Kashika yalukako ngwo, Mbia-shipa mumu alishingileko eswe ni aali. 32Chocho akolesele usendo ku Mbia-shipa, mba Apimeleke yakatuka hamwe ni Fwikole kapitau ka tujita twenyi, yahiluka ku chifuchi cha A-Filistea. 33Apalahama yatumba mutondo ku Mbia-shipa, yatambika Yehova ha jina lienyi, mwe Zambi wa mutolo. 34Apalahama yatwama mu chifuchi cha A-Filistea matangwa anji.

Currently Selected:

UPUTUKILO 21: Csa

Highlight

Copy