UPUTUKILO 22

1Kulutwe lia yino yuma Zambi yeseka Apalahama. Yamba kuli iye ngwenyi, Apalahama. Iye yakumbulula ngwenyi, Yami uno. 2Yamba ngwenyi, Twala mwané, mwané wa wika unamuzange, mwe Izake, ukaye ku chifuchi cha Moria, ukamulambuleko mulambu wa kulumba ha mulundu umwe mungukulwezawo. 3Chocho Apalahama yalimeneka chimenemene, yalulika chimbulu chenyi, yatwala akweze jenyi aali hamwe nenyi, ni mwanenyi Izake. Yapula kunyi ja mulambu wa kulumba, yakatuka, yaya kuma kuze Zambi te hamulweza. 4Ha tangwa liamuchitatu yahetula meso jenyi, yamona kuma kuze kusuku. 5Apalahama yamba kuli akweze jenyi ngwenyi, Salenu kuno ni chimbulu shimbu yami ni mwanami mutuya kuze. Mutuwayila mba mutwiza nawa kuno nuli. 6Mba Apalahama yanda kunyi ja mulambu wa kulumba, yajitwika hali mwanenyi Izake. Yambata kahia ni poko mu kwoko lienyi. Chocho eswe ni aali ayile hamuwika. 7Izake yamba kuli tato Apalahama ngwenyi, Tata. Iye yamba ngwenyi, Yami uno, mwanami. Iye yamba ngwenyi, Tala kahia ni kunyi, alioze mwana-panga wa mulambu wa kulumba, ulihiye? 8Apalahama yamba ngwenyi, Mwanami, Zambi kumakaliwanyina mwana-panga wa mulambu wa kulumba. Chocho ayile eswe ni aali hamuwika.

9Chocho yaheta kuma kuze Zambi hamulweza. Apalahama yatungako chilumbilo, yatengekaho kunyi, yakasa mwanenyi Izake, yamusa ha chilumbilo ha kunyi. 10Apalahama yazoza kwoko lienyi, yanda poko akashihe mwanenyi. 11Alioze mungelo wa Yehova mwilu yamusanyika ngwenyi, Apalahama, Apalahama. Iye yamba ngwenyi, Yami uno. 12Yamba ngwenyi, Kanda usa kwoko lie hali mwana, chipwe kumulinga chimwe chuma, ka, mumu haliapwila ngunanyingika ngwami, Wakuvwila woma Zambi se kwanguminyine mwané, mwe mwané wa wika. 13Apalahama yahetula meso jenyi, yatala, kumanyi kunyima yenyi kuji ya panga kanasakaminya ku mbinga jenyi mu lutandulwila. Mba Apalahama yanda mwe kuji ya panga yamulambula wa kulumba kusalakana mwanenyi. 14Apalahama yalukako jina ngwenyi, Yehova-yile. Chocho kakwamba ndo musono ngwo, Mu mulundu wa Yehova kumakachimona.

15Mungelo wa Yehova mwilu yasanyika Apalahama kakwo kamuchiali ngwenyi, 16Hinalishinga ni jina liami mwene, chocho anambe Yehova ngwenyi, Mumu walinga chuma chino, kwanguminyine mwané, mwe wa wika; 17kuwahisa mungukakuwahisa; kwokesa mungukokesa munyachi we ukapwe ngwe matongonoshi a mwilu; ukapwe ngwe masekeseke a ha ngenge ya kalunga-lwiji. Munyachi we makazuka chajilo cha akwa kole je. 18Mu munyachi we makawahisa mavungu eswe a hashi, mumu hiunononoka ku liji liami. 19Mba Apalahama yahiluka kuli akweze jenyi. Chocho yakatuka eswe, yaheta hamuwika ku Mbia-shipa. Apalahama Watwamine ku Mbia-shipa.

20Mba kulutwe lia yino yuma yambulwila Apalahama ngwo, Milika hanaseme ana kuli mwanakwenu Nehore. 21Kapula-jimo ngwo, Uze, ni mwanakwo Buze, ni Kemuele tato ya Arame, 22ni Chesede, ni Hazo, ni Pilitashi, ni Yilape, ni Mbetule. 23Mbetule yasema Rebeka. Wano nake Milika wasemene kuli Nehore yayo ya Apalahama. 24Mba konkubina yenyi jina lienyi Rehuma iye nawa wasemene Tepa, ni Ngahame, ni Tahashi, ni Maka.

Currently Selected:

UPUTUKILO 22: Csa

Highlight

Copy