UPUTUKILO 16
16
1Serai pwo lia Apalama kamusemenene ana, alioze te kali ni ndungo umwe, Ka-Engitu, jina lienyi Hekare. 2Serai yamba kuli Apalama ngwenyi, Tala haliapwila Yehova hangujika ngoji. Ngunasakwila, uchinjile kuli ndungo yami wa pwo, hanji munguwana ana kuli iye. Mba Apalama wapanjikile liji lia Serai. 3Chocho Serai pwo lia Apalama yanda ndungo yenyi Hekare Ka-Engitu yamuhana kuli mukwo-lunga Apalama akapwe pwo lienyi, muze te Apalama hatwama kumi lia miaka mu chifuchi cha Kanana. 4Iye yanjila kuli Hekare, mba yaka ufumba. Muze hamona ngwenyi, Ufumba nguli nawo, mba watalile kakó ni kaleleso. 5Serai yamba kuli Apalama ngwenyi, Chipi chami chikapwe hali yena; ami nahanyine ndungo yami wa pwo mu tulo ye, mba muze iye hamona ufumba kanangulelesa. Kashika Zambi akapatule hakachi ka yena ni yami. 6Alioze Apalama yamba kuli Serai ngwenyi, Tala ndungo ye mu kwoko lie ali, linga nenyi cheswacho chinakupemena. Mba Serai yamupinjisa, chocho yamuchina.
7Alioze mungelo wa Yehova yamuwana ku fuji lia meya mu puya, ku fuji lia meya mu jila ya kuya ku Shure. 8Yamba ngwenyi, Ena Hekare ndungo ya Serai kulihi unakatuka? Kulihi unayi? Iye ngwenyi, Ngunachina kumeso ja kaka Serai. 9Mungelo wa Yehova ngwenyi, Hiluka kuli kakenu ukamuzeyele. 10Mungelo wa Yehova yamba kuli iye nawa ngwenyi, Mungwokesa akwa munyachi we, kechi kahasa kwaalula ha wunji wo. 11Mungelo wa Yehova yamba kuli iye nawa ngwenyi, Tala ufumba uli nawo. Kumukasema mwana wa lunga, ukamuluke jina lienyi, Ishemali, mumu Yehova hapanjika ku luyinda we. 12Kumakapwa ngwe chimbulu wa mu yambu hakachi ka atu. Kwoko lienyi mulikalimika ni akwo eswe, mba moko ja akwo eswe makalimika nenyi. Kumakatwama hatalanganyi ni usoko wenyi eswe. 13Mba pwo yaluka jina Yehova yoze yahanjika nenyi ngwenyi, Yena uli Zambi wa kumona. Mumu yamba ngwenyi, Kumanyi chipwe kuno hinatala yoze wakungumona; 14kashika jina lia shima lize ngwo, Mbia-ha-rohi. Lili hakachi ka Kandeshe ni Mberete.
15Mba Hekare yasema mwana wa lunga kuli Apalama. Apalama yaluka mwanenyi yoze Hekare yamusemena ngwenyi, Ishemali. 16Muze Hekare yasema Ishemali kuli Apalama, Apalama te kali ni makumi nake a miaka ni miaka yisambano.
Currently Selected:
UPUTUKILO 16: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
