UPUTUKILO 17

1Muze te Apalama kali ni makumi livwa a miaka ni miaka livwa Yehova yasoloka kuli Apalama nikwamba kuli iye ngwenyi, Yami nguli Zambi Mukwa-Ndundo-Jeswe, enda kumeso jami upwe mungunu. 2Mba kumungukolesa ni yena usendo wami. Mungukakwokesa kuhiana. 3Apalama yafulamana ha meso jenyi, mba Zambi yahanjika nenyi ngwenyi, 4Nyi yami, tala usendo wami kuwakola ni yena, kumukapwa kakó ya chihuji cha mavungu. 5Jina lie kulichi kupwa Apalama, alioze makuvuluka ngwo, Apalahama mumu hinakupwisa kakó ya chihuji cha mavungu. 6Mungukakupwisa semi kuhiana. Kuli yena mungutanga mavungu, chipwe mianangana kumakatuhuka muli yena. 7Kumungukakolesa usendo wami hakachi ka yami ni yena ni munyachi we kulutwe lia yena ku yisemuko yo ukapwe usendo wa mutolo, ngukapwe Zambi kuli yena ni kuli akwa munyachi we kulutwe lia yena. 8Chifuchi cha unjize we, chifuchi chino cheswe cha Kanana munguchihana kuli yena ni ku munyachi we kulutwe akachizuke ku miaka ya mutolo. Yami mungukapwa Zambi yo.

9Zambi yamba kuli Apalahama nawa ngwenyi, Ni yena ukafunge usendo wami, ni yena ni munyachi we kulutwe lia yena nawa ndusu yisemuko yo yeswe. 10Usendo wami mukaufunga hakachi ka yami ni yena ni munyachi we kulutwe lia yena uno, ngwami, Lunga mweswe akapwe ngalami. 11Kumakanupwisa ngalami mu musunya wenu, ukapwe chilayi cha usendo hakachi ka yami ni yena. 12Mweswe maheta ku matangwa nake hakachi kenu akamupwise ngalami, lunga mweswe ndusu yisemuko yenu, chipwe yoze wasemuka mu zuwo chipwe yoze wa kulanda ni mbongo kuli mukwa munyachi weka, hi munyachi wenu ko. 13Ni yoze wasemuka mu zuwo lie, ni yoze wa kulanda ni mbongo jenu, eswe akwete kupwa ngalami. Mba usendo wami muukapwa mu musunya wenu, usendo wa mutolo. 14Lunga yoze wapwa chilima akamupatule kuli atu jenyi; hashiha usendo wami.

15Zambi yamba nawa kuli Apalahama ngwenyi, Ha kutwala kuli pwo lie Serai, kanda umuvuluka nawa ngwe Serai alioze jina lienyi likapwe Sara. 16Kumungukamuwahisa, chikwo nawa mwana wa lunga kumakasemuka kuli iye. Ewa mungukamuwahisa, kumakapwa semi ya mavungu. Mianangana ya mavungu kumakasemuka kuli iye. 17Henaho Apalahama yafulamana ha meso jenyi, yaseha, yamba mu mbunge yenyi ngwenyi, Te kumakasema mwana kuli yoze hapwa ni kulakaji lia miaka, nyi? Te Sara meza kusema, hapwa ni makumi livwa a miaka nyi? 18Chocho Apalahama yamba kuli Zambi ngwenyi, Nyi kachi Ishemali mahasa kutwama kumeso jenu kama. 19Zambi yamba ngwenyi, Hi chocho ko, alioze mukwenu-pwo Sara makusemena mwana wa lunga. Ukamuluke jina Izake, mba mungukolesa nenyi usendo wami ukapwe usendo wa mutolo ku munyachi wenyi kulutwe. 20Alioze ha kutwala kuli Ishemali, hinakwivwa, hinamuwahisa. Iye kumapwa semi, mungukamwokesa kuhiana. Kumi lia mianangana ni mianangana aali makasema. Mungukamupwisa vungu linene. 21Alioze usendo wami mungukakolesa ni Izake, yoze Sara makusemena ha kakweji yono ngunatongola ha mwaka muwizaho.

22Mba yamana kuhanjika nenyi, chocho Zambi yahichika Apalahama, yazezuka mwilu. 23Mba Apalahama yatwala mwanenyi, Ishemali ni waze eswe asemukine mu zuwo lienyi, ni waze eswe a kulanda ni mbongo, malunga eswe hakachi ka atu a ku zuwo lia Apalahama, yaapwisa eswe ngalami mu musunya wo tangwa lioliene ngwe Zambi hamwamba. 24Apalahama te kali ni makumi livwa a miaka ni miaka livwa muze amupwishile ngalami mu musunya wenyi. 25Mwanenyi Ishemali te kali ni kumi lia miaka ni miaka yitatu muze amupwishile ngalami mu musunya wenyi. 26Tangwa limuwika aapwishile ngalami ni Apalahama ni mwanenyi Ishemali, 27ni malunga eswe a kusemuka mu zuwo lienyi, ni waze a kulanda ni mbongo, eswe aapwishile ngalami hamwe nenyi.

Currently Selected:

UPUTUKILO 17: Csa

Highlight

Copy