UPUTUKILO 15

1Kulutwe lia yino yuma liji lia Yehova yiliza kuli Apalama mu usolwelo ngwo, Apalama, kanda wivwa woma, yami nguli lukepwe we, kanda nguli kwononona che chahiana. 2Apalama yamba ngwenyi, Mwene Yehova, yika mukangwaha se ngunayi chishi mwana, mba yono Elieza wa Ndamaseku mahinga zuwo liami? 3Apalama yamba ngwenyi, Kuli yami kwanguhele munyachi mba umwe mwana wa ha chihunda mapwa swana yami. 4Kumanyi liji lia Yehova yiliza kuli iye ngwo, Yono kechi kupwa swana ye alioze umwe wa kusemuka ku jimo lia yena mwene iye mapwa swana ye. 5Yamuneha haze, yamba ngwenyi, Tala kwilu haliapwila walule matongonoshi nyi muhasa kwaalula. Mba yamba ngwenyi, Chocho makapwa akwa munyachi we. 6Iye yafuliela Yehova, mba Yehova yamwalwilacho ngwe ululi.

7Yamwamba ngwenyi, Yami nguli Yehova, nakuchijile ku Ure ya A-Kaletea ngukwehe chifuchi chino cha chihinga. 8Iye yakumbulula ngwenyi, Mwene Yehova ngwe kuchi mungunyingika ngwami, Munguchihinga? 9Yamwamba ngwenyi, Ungwanjile chimbembe cha ngombe wa miaka yitatu, ni chihwo cha pembe wa miaka yitatu, ni kuji ya panga wa miaka yitatu, ni katele ni mwana-liembe. 10Yaanda eswe, yaapula hakachi. Yasa kwoko ni kulu hatalanganyi ni kwoko ni kulu. Alioze tujila kaapulile. 11Tujila a kulia yifwo yeza hanga akapwile ha mijimba, Apalama yaahuma.

12Ha kunjila cha tangwa tulo anji awanyine Apalama, ni mwongo wa milima yimwe yinene yiumukwata. 13Mba yamba kuli Apalama ngwenyi, Nyingika pundu akwa munyachi we makapwa njize mu chifuchi hi nicho ko, makapwa ndungo, makaapinjisa makulakaji awana a miaka. 14Mba mungukalamba atu aze aapita. Kulutwe makatukako ni upite wunji. 15Alioze yena kumukaya kuli akakenu ni sambukila. Kumakakufunda ni ushinakaji upema. 16O ha chisemuko chamuchiwana kumakeza nawa ku kuno, mumu uhenge wa A-Amore te kanda woka.

17Mba muze te tangwa hilianjila, hikwapwa ufuku, kumanyi kahia ka kutuhwisa mwishi ni soka lia kulekwoka liapalikile hakachi ka yipinji ya yifwo. 18Ha tangwa lienalio Yehova yakolesa usendo ni Apalama ngwenyi, Chifuchi chino hinachihana ku munyachi we, chize ku lwiji wa Engitu ndo ku lwiji munene, mwe Ufrateze; 19ni A-Kene, ni A-Kenaze, ni A-Katumone, 20ni A-Hete, ni A-Perize, ni A-Refane, 21ni A-Amore, ni A-Kanana, ni A-Ngikashe, ni A-Yepushe.

Currently Selected:

UPUTUKILO 15: Csa

Highlight

Copy