UPUTUKILO 14

1Kwapwile ha matangwa a Amarafele mwanangana wa Shinare, ni Arioke mwanangana wa Elesa, ni Chetoleome mwanangana wa Elame, ni Tetale mwanangana wa Ngoyime. 2O ashile jita ni Mbera mwanangana wa Sondome ni Mbisha mwanangana wa Ngomora, ni Shinape mwanangana wa Andama, ni Shemene mwanangana wa Zepoime, ni mwe mwanangana wa Mbela (likwo Zoare). 3Wano eswe alifutwile hamuwika mu chana cha Shindime (likwo ngwo, Chitende cha Mungwa). 4Azeyele kuli Chetoleome kumi lia miaka ni miaka yiali, mba ha mwaka kumi ni wamuchitatu amukatukilile. 5Ha mwaka kumi ni wamuchiwana wejile Chetoleome, ni mianangana aze apwile hamwe nenyi. Yalamba A-Refane mu Aseterote-Kanaime, ni A-Zuji mu chifuchi cha Hame, ni A-Emi mu chana cha Keriataime. 6Ni A-Hore mu mulundu wo wa Sere ndo ku Eleparane hakamwihi ni puya. 7Mba yahiluka, yeza ku Emishipate (likwo ngwo, Kandeshe). Yalamba chifuchi cheswe cha A-Amaleke, ni A-Amore aze atwama mu Hazazone-Tama. 8Yikutuhuka mwanangana wa Sondome, ni mwanangana wa Ngomora, ni mwanangana wa Andama ni mwanangana wa Zepoime, ni mwanangana wa Mbela (likwo Zoare), yalisela mu chikulo cha Shindime akase jita; 9ni Chetoleome mwanangana wa Elame, ni Tetale mwanangana wa Ngoyime, ni Amarafele mwanangana wa Shinare, ni Arioke mwanangana wa Elesa. Mianangana awana kulimika ni mianangana atano. 10Chikulo cha Shindime cha tò ni mena a malowa, mba mianangana a Sondome ni Ngomora yachina mba yafwilamo. Waze kafwile o yachinyina ku milundu. 11Yapupa yikwata yeswe ya Sondome ni Ngomora ni kulia cho cheswe, chocho yaya kwo. 12Yakwata Lote, mwana wa yayo ya Apalama hamwe ni yikwata yenyi, se iye yatunga ku Sondome, mba yaya nenyi.

13Umwe yomboka, yeza, yambulwila Apalama mwe Ka-Hepreu. Iye te kanatwama ku mitondo ya Mamare Ka-Amore, mwanakwo wa Esekole ni wa Anere. Wano te halikunda ni Apalama. 14Muze Apalama yevwa ngwo, Usoko we hamukwata funge, yatwala atu jenyi a kufumba, waze asemukine mu zuwo lienyi, makulakaji atatu ni kumi ni nake, yaahanga ndo ku Ndane. 15Yahandununa atu jenyi ha ufuku, iye ni ndungo jenyi. Yaalamba, yaahanga ndo ku Hoba, kwapwa ku sali lia chimeso lia Ndamaseku. 16Yeza ni yikwata yeswe, yaneha nawa usoko wenyi Lote ni yikwata yenyi ni mapwo nawa ni e atu.

17Mwanangana wa Sondome yatuhuka nikumupatwiza ha kuhiluka ku kukumba Chetoleome ni mianangana aze apwile hamwe nenyi, ku chikulo cha Shave (likwo ngwo cha Mwanangana). 18Melekizeteke mwanangana wa Saleme yaneha mbolo ni vinyu, iye te sasendote ya Zambi Chitunda. 19Yawahisa Apalama ngwenyi,

Zambi Chitunda,

Mwenya malilu ni hashi akawahise Apalama,

20Chikwo nawa, Zambi Chitunda akafumane,

Iye hanakunjika akwa kole je mu kwoko lie.

Mba Apalama yamwaha chihanda chimuwika ha yihanda kumi ya ku yuma yeswe. 21Mwanangana wa Sondome neye yamba kuli Apalama ngwenyi, Ngwehe e atu ukazuke yikwata yena mwene. 22Apalama yakumbulula kuli mwanangana wa Sondome ngwenyi, Hinazundula kwoko liami kuli Yehova mwe Chitunda, mwenya malilu ni hashi ngwami, 23Chichi kutambula chipwe wanda, chipwe toloshi lia sapato, chipwe chuma cheswacho cha yena, kuchina muwamba ngwe, Hinapichisa Apalama. 24Chichi kutambula nichimwe shina kulia chize alile akweze, ni chihanda cha malunga aze ayile hamwe ni yami. Alioze Anere, ni Esekole, ni Mamare o akatambule nicho.

Currently Selected:

UPUTUKILO 14: Csa

Highlight

Copy