Mareko 2

2 PAKANA.

1Ma ba ta kaban a bug i rap, i ā wan balet u Kapanaumi; ma ra pirapira i winarag, lena, i tana u ra ruma. 2Ma magoro a kum tara diat tolug ugai i ai ma ruma pa i wewoat u diat, ma diat kana ruk tauni, pa te kai na ra bonanaka; ma i piri ta pirapira ta diat. 3Ma diat wan pat ma diat kipi korom i a muana i malapag ma ra paralutiko, watdi a muana diat lotai. 4Ma ba diat kana wan akit korom i kuma magoro a kum tara, diat reg‐arapai a inulugana ruma i tana i ai; ma ba diat reg‐arapai, diat wariri‐paritai a korokoro a muana paralutiko i inep uni. 5Ba Iesu i boboi a nudiat nurunuru i piri ta ra muana paralutiko, lena, Na tuglik, di unuai a num pet akakai. 6Ma ta magan diat a kum tenatimtimu diat ki i ai ma diat pukpukui u ra baladiat lenkumi, Lelawai i piri lenkumi a muana kumi? 7I piri ululi un Nara: Ka oi in unuai larapai a pet akakai? Nara ku i pam larapai a lig kuma. 8Ma ba Iesu i nunura kakai u ra balana diat pukpukui lenkuma u ra baladiat i piri ta diat lenkumi, Lelawai kuma muat nunuk lenkuma u ra balamuat? 9Awa duk ta lig i pet kaka Ba ag piri duk korom a muana paralutiko di unuai a num pet akakai ba ag piri tana duk Un turu un rakan a bam ma wan lala ma? 10Ma kumi, muat a nunura uni, Na Tu‐ra‐Muana i unuai larapai a pet akakai u ra bual rap kumi (i piri ta ra muana paralutiko lena.) 11Iau piri tam, un turu un rakan a bam ma wan ma ut u ra num ruma. 12Ma i turu kaka, ma rakanpai ma ut a bana ma i wan igen na ra matadiat rap. Ma diat rap diat kakaian uni, ma diat pira‐wala‐uai Nara, lenkumi, Pa dat boboi narap a lig lenkumi.

13Ma I wan balet u nakono ma diat a kum tara‐na‐kaiya rap diat wan korom i, ma i wera diat. 14Ma ba i wan karai, i boboi Levi na tun Alefaio, i ki u ra ruma na telo, ma i piri tana, un patap un iau, ma i turu ma patap uni. 15Ma na muru ba I ki na winagan ma diat u ra nuna ruma, a magoro bulug a kum telona ma diat a kum tara pet akakai diat wagan ugai ma Iesu ma nuna kum tara wawera kuma magoro diat, ma diat patap uni. 16Ma diat a kum tenatimtimu a nu ra kum te Faresaio ba diat boboi lena i wagan ugai ma diat a kum tena pet akakai ma ra kum telona diat piri ta diat a nuna kum tara wawera lenkumi, lelawai kuma i wagan ugai ma inim ugai ma diat a kum telona ma ra kum tara pet akakai? 17Ba Iesu i walogoropai i piri ta diat lenkumi, A tena wakadel pa i ka korom diat a kum tara diat lalaun na kuru, i ka ku korom diat diat malapag; iau pa iau wanurin iau wata diat a kum tara pet oduru iau wata diat ku a kum tara pet akakai.

18Ma diat a kum tara wawera a nun Ioane ma ra kum te Faresaio diat wawel; ma diat wan korom i ma piri tana, Lelawai diat a kum tara wawera a nun Ioane ma ra kum tara wawera bulug a nudiat a kum te Faresaio diat wawel rap, ma num kum tara wawera ku pa diat wawel? 19Ma Iesu i piri ta diat, Diat wawel lelawai diat a kum tepa ra matakina‐tinaula? Ba diat tana kubai ma ra matakinatinaula pa diat wawel. 20Ba ta bug na wanua in wan pat ma din kip‐igenuai ko diat a matakina tinaula diat wawel marakam u ra bug kuma. 21Pa te ra i igitbati a malu turaina ma ra pakana malu matakina; ba di pet lenkuma, a pakana malu matakina i pet rabanai a malu turaina diara igit ugai mai, ma in pet a galapi a tarabat. 22Pa te ra i witup a waini matakina u ra pala‐pani‐ra‐pika turaina; kaduk a waini matakina i pet puekuai a pala, ma ra waini i talabo, ma ra kum pala bulug diat pet aka‐uai; i ka ku ba di witup a waini matakina u ra pala‐pani‐ra‐pika matakina.

23Ma i wan akit u ra kum pinapam na padi u ra Bug Tabu ma diat a nuna kum tara wawera diat kitwanwanai a kum kurukuren na padi. 24Ma diat a kum te Faresaio diat piri tana, Boboi, lelawai kuma diat peti u ra Bug Tabu a lig di watabui ura bug kumi? 25Ma i piri ta diat. Pa muat luki utbai a lig kuma Davida i ā peti ba i kapan utna, ma i molo, ma ra kum tara kai diat weuru mai. 26Ba i ruk u ra ruma a nun Nara u ra pupukai kuma ba Abiata i tenapinapet gala, ma i ani a kem na tamtama? A lig kuma di watabui korom te i ani, a kum tenapinapet ku diat ani, ma i tabara diat kai diat weuru mai? 27I piri ta diat bulug, A Bug Tabu di pamtai kup diat a kum tara, ma pa i pamtai a kum tara kup a Bug Tabu. 28Ia kuma, na Tu ra muana, a Tadaru i ra Bug Tabu bulug ia.

Currently Selected:

Mareko 2: RAI

Highlight

Copy