Markus 10

Heb nongen le bieni nambulen.

1Muren su dne su la manan le gor asu Juda le ndran Jordan le horo. Su ndramed mabosanged su la goure ndro i, i henunuen su lie dege bern aden. 2Su Pharisi su me ndro i, su ndemani i, i monen de bugane, hom gamel robuldi nambulen i le iao. Su beg seslaini i. 3I vong mul le ndro su i boi: Mose gin hondre sa? 4Su boi: Mose i somui homo robuldi nambulen ilgi peper le robulda su bihin le nemen. 5Jesu i boi: Mose i somui, i danen golmu ndoun, mu momen ge. 6-7Jehova de hinen dagara bui, i hinen sor, hom gamel hom bihin. Dogoro hom gamel ibdi hom bihin le nambulen i bieni damen e nanen: 8sor nambulen sor habed ge. Sor marmou la ge homo. 9Jehova ibdi sor marmou le goure, gamel i danen de robuldi i bihin bui. 10Su la um lie su lao aden su ndemani i leri. 11Jesu i boi me ndro su: Be homo robuldi bihin aden, gi bo hom lie le surian, i sungsou. 12Hom bihin i robieni nambulen, gle bo hom gamel lie i sungsou.

Jesu hengen su mbunana.

13Malabo su la bah su mbunana asu me ndro Jesu, a i gi selbe su. Su lao ad Jesu su bangondrngondr asu. 14Jesu i hirong i, ndrnen i ma i boi: Hian su mbunana su gam ndro io, mbue mu ga sendraini su; longu ad Jehova longu asu. 15Ndangen, io boi me ndro mu: Homo i de hedi longu ad Jehova bui, dege su mbunana su hedi i, i danen de me ri bui. 16Jesu hedi su le berbalen, golnisden su i bogarni su.

Nongen Jesu le ndro hom ulhou.

17Muren Jesu i iao le sal, hom hilou me ndro i, me godurhu me ngondrnegen i ndemani i, i boi: Ndorlaben uo hian, sehe longu io ghineni io gu le lundielang muren. 18Jesu i boi le ndro i: Uo desa absou io hian e? Hom de hian bui, Jehova ge i hian i homo ge. 19Uo danem nongen ad Jehova: Mbue sungsou, mbue rii homo, mbue behena, mbue bahilou, mbue aburei, orgulue dam e nanem. 20I vong i bode: Ndorlaben, io ma mbunana ge, io gin hinen i sumburdi. 21Jesu i lele le ndro i, voaniso aden, i boi me ndro i: Longu hendre ge uo ma de hinen masou. Uo ala al dou longu adem masi, eruei gle ndro su, heb longu asu bui, Jehova i hanguruen uo, i surien i, boen am drondrbo. 22I hirong nongen ad Jesu, i gus, ndrnen irgu i iao, memrad aden mabosanged. 23Boen Jesu i lele me ndro su lao aden i bode: Hom ndramed aden mabosanged de la longu ad Jehova roud bui, i ndoundoun le aden. 24Meluasu lao aden i ieb le nongen ogo. 25Jesu i boi me ndro su lie: Mu nduro, i ndoa le ad homo i hanguruen longu aden ge, a i de me longu ad Jehova bui. 26Meluasu i ieb lie le nongen aden, su vong le goure su bode: A i dagara, sie gle lundielang? 27Jesu i lele le ndro su, i boi: Ndramed danen bui, Jehova ge i danen, Jehova ge i danen longu masi. 28Malabo Petrus i boi: E lele, iou gin bieni longu adu masi iou rndrbom. 29Jesu i boi: Ndangen io boi me ndro mu: Hom lao ordo i bien um aden, i bien ndernsu, bisonsu, damen e nanen, nambulen e ndurn ma gor aden me ndrbo, voaniso nongen hian ge, 30io surieni mabersanged. Malabo i hedi um e ndernsu e bisonsu, nanensu e ndursu ma gor aden, e muren i me ndro io me lundielang. 31Nongen hendre ge, su mabosanged su hanu su la muren, su muren su me la hanu.

Heb nongen le ngendian ad Jesu.

32Su do da sal, su la Jerusalem. Jesu i hanu meluasu i ieb, su do ndrbon su noh. Jesu i loh su masongul e rumou, i boharni me ndro su longu masi gmeher ndro i, 33i boi: Du gal Jerusalem, su semani Ndurndramed le ndro su ndurhian su ndremda bohernou, su dieni Jesu na gmed, su Haiden su huri i: 34su rodi i, su daii i, su rogumbunhi i, boen su daii i na gmed; madolo muren i gedne lie.

35Muren Jakobus e Johanes ndur Sebedeus sor me ndro Jesu sor bode: Ndorlaben, voaoroiso uo hirong nongen adu oro. 36Jesu i bode: Gle, uomor leng sa? 37Sor boi: A uo gin me lundielang lie, homo adu oro gim geiao adem gle nemem sengen, homo gim nemem gameao. 38Jesu i boi: Uomor danmor nongen ademor bui. Uomor ndoun le longu masi momen, su hinen i ndro io ie? 39Sor bode: Ehe, dansor. Jesu i boi lie: Ndangen su ghinen uomor momen dege io; 40hendre lie, io dono bui, io ghinen mor, mor gam geiao ordo, aga longu ad Jehova, i ge i gbosou su. 41Su masongul su dandon su hirong i ndrnesu i mah asoro Jakobus e Johanes. 42Jesu i loh su masi i boi: Su ndurhian ber gor ogo su ndoun, lao dandendegei asu mabosanged. 43Bern ademu de hendre. Homo ie lengi i hian ademu na gle lao dandendegei ademu. 44Uomu dagara, homo beg le ndorlaben ademu, i hirong nongen asu masi. 45Ndurndramed de me bui beg le ndorlaben ademu, bugane i me sobani mu ge, i regunha su masi le ndrai aden.

Jesu regurdueni Bartimeus.

46Muren su me Jerigo su iao lie, i e su lao aden e su ndramed mabosanged. Hom ndramed marn bui, ngarn Bartimeus, ndur Dimodeus, i da mandrgos sal i soling. 47I hirong Jesu ber Nasaret me boan, i loholo i boi: Jesu, ndur David, golmgisden io. 48Su mabosanged su habai i, su bode, i ge simge. Ilgi bohon manden lie, i boi: Uo ndur David, golmgisden io. 49Jesu ir lugdo ir boan i bode su geloh i. Su loh ndramed marn bui su bode: Mbue uo noh, edne, i loh uo. 50I bien soubal aden, i dne, le ndro Jesu. 51Jesu i boi me ndro i: Voamiso sa, io ghinen gme ndro uo? Ndramed marn bui i boi: Ndorlaben, io beg gu lele lie. 52Jesu i boi: Ala, nongen adem hian gin sobani uo. Malabo i lele lie irndrbo Jesu le sal aden.

Currently Selected:

Markus 10: LLENT

Highlight

Copy