Mateus 25
25
Heb nongen dohongein le su ndurbihin masongul.
1Boen gor lundielang i dege su ndurbihin masongul, su da gin hedi lamp asu beg sohal sal ad Ndorlaben asu. 2Su malimou hanguruen asu monen, su malimou su heb monen bui. 3Su gin hedi lamp asu, golsu gin dud bobiri ber kerasin. 4-5Su malimou hanu su gin hedi lamp asu, ma kerasin dagara lie, Ndorlaben de gin me roud bui, su da gin belengen i, mandrsu i berad, su medir ge. 6Dogrobing ngasen le su ndramed mabosanged gin me, su loholo, su bai: Ndorlaben gorbo, edne, sohal sal aden. 7Su ndurbihin masi su gin ndne su hinen lamp asu monen. 8Su malimou, kerasin asu bui, su vong le ndro su malimou hanu, hengen heb kerasin me adu, lamp adu na gmed. 9Su malimou ogo, su vong, su bode: Bugane, kerasin ogo gle lamp adu ge, i vonei gleri. Mu al ndro ndremda simsim, mu semani la. 10Su gina, beg semani kerasin. Malabo Ndorlaben gin me, su malimou su sohal sal aden, i dulieni su le um aden, i gob gous le ndro su. Boen i vadi babi ber um aden. 11Heb eluen bui muren, su ndurbihin malimou gin me, su loh, su bai: Ndorlaben, Ndorlaben, audi babi ber um adem. 12I vong le ndro su, i bode: Ndangen io boi le ndro mu: Io de dono mu bui. 13Hian mu mamed ge, de danmu rang ad Ndorlaben bugane.
Nongen dohongein le moni ad Ndorlaben.
14Longu ogo, i dege longu ad hom ndorlaben, i da beg dogi le gor manan. I loh su lao aden hanu le ndro i, i hengen le ndro su memrad aden, su gobgulue i. 15Le ndro homo i hengen pound malima le ndro homo pound maruo, le ndro homo pound si. Le ndro su masi dege i gin hanguruen, i gmonen ndro su. Boen i dogi le gor manan. 16Ndramed, pound aden malima i gina, i bo mburer leri, pound malima gina la born, le mburer aden. 17Dagara lao, pound maruo i da ndro i, i bo mburer, i hedi pound maruo la born. 18Ndramed, pound si i da le nemen, i gina i daui moni aden le ngai, i da boan, i gorni moni ad ndorlaben. 19Eluen muren ndorlaben i gin mul, i loh su lao aden, beg hedi moni aden, i da le nemesu. 20Homo i gin me, pound malima i da le nemen, i hengeni le ndro ndorlaben, i daui pound malima le born i vong i bai: Ndorlaben, uo gin daui pound malima le nemo, e lele, io gin bo mburer leri, aga pound malima io gin hedi leri. 21Ndorlaben i vong le ndro i, i bai: Uo lao dandendegei ordo hian, monen ge. Uo, gin bogulue memrad ordo heb ge mandehe, io beg hinen uo le labenen ber memrad ordo dsoln, al le um ad Ndorlaben adem, um le mugmug ge. 22Malabo ndramed i gin me, pound maruo i da le nemen, i vong, i bai: Ndorlaben, uo gin daui pound maruo le nemo, e lele, io gin bo mburer leri, io gin hedi pound maruo lie le born. 23Ndorlaben i vong le ndro i, i bai: Uo lao dandendegei ordo, hian, monen ge. Uo da gin bogulue memrad ordo heb ge mandehe, io beg hinen uo le labenen ber memrad ordo mabosanged al le um ad Ndorlaben adem, um le mugmug ge. 24Malabo ndramed i gin me, pound si i da le nemen, i vong, i bai: Ndorlaben, io dono uo, uo ndramed homo ndoun ndoun ge. Uo beg huri me goure, goru uo de gin daui bugane. 25Io noh adem, io gina, io gin gorni moni adem le ngai boan. E lele pound si adem gorbo. 26Ndorlaben i bodele: Uo lao dandendegei momen ge, nongen adem derbe, io beg daui me goure, goru io de gin daui le boan bui, io beg huri geherong, mahanu io de gin bieni le boan bugane? 27Desa uo de gin daui moni ordo le um moni bugane, muren io dono hedi i mul, ma ndurmoni la born. 28Hedi moni aden giao, hengen i le ndro i, pound masongul i da ndro i. 29Homo ma homo memrad i da le um aden, su hengen memrad le ndro i, bersi ma bersilie memrad aden bulhe muren. Be homo memrad aden heb ge mandehe, su hedi giao memrad aden, bersi ma bersilie, muren memrad aden heb sa bui. 30Hosi ndramed ogo momen, gbieni le ndrogmoan, i da gu dang, i da undri lehen.
Heb nongen le gord ad Jesu.
31Ar ndurndramed i gmeher le engerang aden, su Angelo aden masi su la born ndro i, boen i lugdo im logna, aden, i da le engerang aden. 32Su ndramed ber gor masigane, su la goure le bormarn, muren i ghinen i le ndro su, dege hom ndremda meh i hinen i, 33i da huri meh gamel le seher, meh bihin le seher. 34Boen King i boi le ndro su meh bihin, su da le nemen sengen aden, i boi: Gmeher baghege ndro io, mu da hian monen ge, Bo Domo i da hanguruen mu, i hengen mu. Hedi gor ordo gle ademu gor, io da gin mengseni le ndro mu nandugian, nandugian ge. 35Goru io gin mundrul, mu gin hengen gan me ono, golo gin mar, mu gin hengen me ndro io ndran. Io homo ber gor manan, mu gin ndemani io, io gmeher le um ademu. 36Salo ordo bui, mu gin hengen i me ndro io. Io da med le berle ordo, mu gin meher ndro io. Io da le kalabus, mu gin hanguruen io gin me, beg ilndri io. 37Su da le nemen sengen, su ndramed hian monen ge, su gvong su bai: Ndorlaben, gehere iou gin ilndri uo, uo mundrul, iou gin hengen gan me anem? Gehere iou gin ilndri uo, golm gin mar, iou gin hengen ndran le ndro uo? 38Gehere uo gin meher ndro du le gor manan iou gin somui le adem? Gehere iou da gin ilndri uo salo adem bui, iou gin daui salo gle mandrm? 39Gehere iou gin ilndri uo, uo da med le berle adem de uo da le kalabus, iou gin meher ndro uo? 40Muren King i vong le ndro su, i boi: ndangen io boi le ndro mu: Longu masigane, mu da gin hinen i le ndro su ndere molhege, mu gin hinen i me ndro io. 41Boen King i vong le ndro su, su da le nemen gameao, i boi: Alndi, mu ndramed gina momen gane al le moan manden, Bo Domo i gin mengseni le ndro Satan, ma le ndro su Angelo aden. 42Goru io gin mundrul, mu de gin hengen gan me ono bui. Golo gin mar, ndran ademu bui. 43Io gin meher le gor manan, mu de gin somui me ordo bui. Salo ordo bui, mu de gin daui salo gle mondro bui. Io da med, io da le kalabus, mu de gin meher de la ndro io bui. 44Muren su da le nemen gameao, su vong, su bodeie: Ndorlaben, gehere iou gin ilndri uo gan anem bui, ndran bugane, um adem bui, salo adem bugane? Gehere iou gin ilndri uo, uo da med le berle adem, de uo da kalabus, iou de gin sobani uo bui? 45Boen i vong le ndro su, i bode: Ndangen io boi le ndro mu: Longu masi, mu de gin hineni le ndro su ndere ogo molhege bui, umu de gin hinen i de la ndro io bugane. 46Su ogo, su iao le gor moan, moan de somad bui. Su monen ge, su de somad bui, su horuan sidesi.
Currently Selected:
Mateus 25: LLENT
Highlight
Share
Copy

Want to have your highlights saved across all your devices? Sign up or sign in
Published by the British and Foreign Bible Society 1956