Mateus 26
26
Nongen le ngendian ad Jesu. Su labenen ber Juda beg daii Jesu.
1Nongen ad Jesu ogo boen, i vong le ndro su lao aden, i bai: 2Danmu, rubing gous adu na gmeher, su dadhe Ndurndramed na gmed. 3Su ndurhian, ma su labenen ber gor, su la geherong, le um ad ndurhian asu, ngarn Kaivas. 4Su vong le goure, su beg hosi Jesu, beg bahilou ndro i, beg daii. 5Su vong, su bai: Mbue de du garii i gir margous, debosan su ndramed su gob iil le ndro du.
Heb gous ber Betanien.
6Jesu i da Betanien, i da um ad Simon, mahanu mandern momen, legen ge. 7Bihin homo, i gin me baghege le ndro Jesu, bobiri i da le nemen, ndrelgei ngohondonreen i dari, i ilgi i le mburbalen Jesu, be i da le mandrgosgeao. 8Su lao aden, be su gin ilndri i, ndrnesu i irgu, su vong, su bai: Desa su robieni ndrelgei ngohondonreen molhe dogoro? 9Su gilgi i gle moni mabosanged, su ghengen su gleri, longu asu bui. 10Jesu i danen bangondrngondr asu, i vong le ndro su, i bai: Desa mu bangondrngondr aden, i girge, i bo hian ge me ndro io. 11Su ndramed, memrad asu bui, su do da ge ndro mu sidesi, io or ndro mu heb eluen bui. 12Ndrelgei ngohondondreen i da gin ilgi le mondro, i gin nouni io le ngad leri. 13Ndangen io boi le ndro mu: Le gor masigane, su bohernou Nongen Helian ri, su hanguruen bihin ogo, ma mburer aden i da gin hinen me ndro io, ma su bosoui gle aden.
Judas hevani Jesu.
14-15Boen Judas Isgariot, homo asu masongul e rumou, i la ndro su ndurhian, i vong, i bai: Mu beg hengen sa me ndro io, io gilgi i gle nemu? Su hengen le ndro i moni madilingul. 16Muren Judas i bogulue Jesu, beg ilgi i gle ndro su, beg hevani i.
Gous ad Jesu le ndurmeh e suslong.
17Bing le gous asu gin meher, su lao ad Jesu su la ndro i su ndemani i: Voamiso sa, du gain ndurmeh anu girn oho? 18I bodeie: Mu gal gor le ndro ndramed homo, i da le seher, vong le ndro i: Ndorlaben i ndemani uo, i bai: Rang ordo gin me, io beg bo gous le um adem, io, ma su lao ordo lie. 19Su lao aden su hinen i, dege Jesu gin bai, su dueni ndurmeh ge i roh. 20Lobing Jesu, ma su lao aden masongul e rumou, su mi boan le mandrgosgeao su ian gan. 21Jesu i vong le ndro su, i bai: Ndangen io boi le ndro mu: Homo ademu na gi hevani io. 22Ndrnesu masi i gosusngo le nongen ogo, su ndemani homo ma homo, homo i bode io ie? Homo i bode io ie, Ndorlaben? 23Jesu i vong, i boi: Homo ademu i gilgi nemen le ndrogao, le bor nemo, na gi hevani io. 24Ndurndramed na gmed, dege su gin hondre dugian. Ndramed, i da hevani Ndurdramed, i gina momen gane, hian mbue de gmeher ndrnen nanen. 25Boen Judas Isgariot i da beg hevani Jesu, i vong, i ndemani i, i bai: Ndorlaben io ie? Jesus i bode: Ehe, uo ge. 26Su ian gan, Jesu i hedi suslong, i bo lodu leri, i iendri suslong, i hengen i le ndro su lao aden, i vong, i bai: Mu ghedi mu gu ni, aga mondro. 27Boen i hedi lumian‐ndurnvain, i bo lodu lerii, i hengen i le ndro su, i vong, i bai: Mu masi mu gien leri. 28Aga ndrai ordo, ndrai le mburer houen. Su gharengeni me asu mabosanged, le sebui longu asu momen. 29Io vong le ndro mu: Io de ilmui ndrunvain bui lie, muren io gu ilmui lie mahouen, le gor ad Bo Domo.
Nongen le Getsemane.
30Su bosoui nongen helian, su bieni gor, su gobad le bahali Oliva. 31Su da le sal, Jesu i vong le ndro su, i bai: Lobing ogo, mu masi, ndrnemu i irgu me ordo, dege su gin hondre goru: Io gu rii ndremda meh, su meh aden, su do da ma sumbue. 32Be io gedne lie, io gal hanu le gor Galilea, mu gor ndrobo. 33Petrus i vong le ndro i, i boi: Ar su masi, ndrnesu i irgu gle adem, io ge, io bugane. 34Jesu i bode: Ndangen io boi le ndro mu: Lobing ogo, goho ma de dang masou, uo gbieni io maberdolo, uo abde, uo danem io bui. 35Petrus i boii: Gle su gari io, iour gamed bersi ge, io de bieni uo bui. Su lao aden masi, su bai dagara lie. 36Boen su me beleng hasel, ngarn Getsemane. Jesu i boi le ndro su lao aden: Gim ban io gle hebe, io beg vong le ndro Jehova. 37Boen i hedi Petrus, ma ndursor Sebedeus, su iao, malabo i rerr, ndrnen i gosusngo. 38I vong le ndro su, i boi: Meluo i gosusngo manden ge, baghege na gmed, mu gor la, ma mamed, gor belengeni io. 39I la heb ndi, i los le boan, i nhui bormarn gle nemen, i soling, i bai: Bo Domo, uo da ndoa le longu masigane, ar uo lengi, e rumburdi io le longu masi i da beg meher. Gle uo mbuerem, i gorge, dege uo lengi, i da ge ndro uo. 40I gin mul le ndro su lao aden, i ilndri, su medir ge. I vong le ndro Petrus: Mu de heb ndoun bui, le belengeni io, de heb mamed bugane? 41Hian mu mamed, mu soling le ndro Jehova, debosan Satan i le silieni mu. Meluamu i hian, mandrmu i heb ndoun bui. 42Boen Jesu i la heb ndi lie, i soling le ndro Jehova, i bai: Bo Domo, ar uo de rumburdi io gle longu ogo momen bui, io somui ri, io ghinen i, dege uo lengi. 43Boen i gin mul le ndro su madilmou, i ilndri su, su medir ge, begmarsu i beb ge le mediriu. 44I bieni su, i la heb ndi bersilie, i soling le ndro Jehova lie le nongen dogoro. 45Boen i la ndro su lao aden, I vong le ndro su, i bai: Mu da medir ge, mosen, gmedir bersi muren gu hengang ge. Malabo rang gin me, su daui Ndurndramed le nemesu ndramed momen ge. 46Edne, du gou, e lele, ndramed i beg hevani io, gin me, i da baghege.
47Malabo i da vong ndon, Judas, homo asu masongul e rumou gin meher, ma su ndramed mabosanged, mordo borla e gagao i da nemesu, su ndurhian, ma su labenen ber Jerusalem gin rendegien su. 48Judas, i da beg hevani Jesu, i gin daui gelman le ndro su, i gin bai: Ar io bogarni homo, aga Jesu, mu boro i, mu hosi i ndoun. 49I la ndro Jesu, i vong le ndro i, i bai: Io bamugueni uo Ndorlaben, boen i bogarni i. 50Jesu i vong le ndro i, i bai: Gous, ghinen i, dege uo da hanguruen le bergolm. Su da baghege ndro Judas, su gin me, su gin boro Jesu, su gin hosi i ndoun. 51Homo asu lao ad Jesu i hedi mordo borla aden, beg rii hom lao ad ndurhian, i sehi delengan ge. 52Jesu i vong le ndro i, i bai: Hedi mordo borla adem giao, homo i da hedi mordo aden, na glos leri. 53Uo de danem bui, ar io ndemani Bo Domo i rendegien me ndro io su Angelo mabosanged, na gsobani io. 54Nongen i da le Buk Helian, i da gin boharni gle longu ogo, muren i derbe? 55Boen Jesu i vong le ndro su ndramed, su da gin meher: Mu gin meher ndro io le berla, le mordo borla, mu beg hosi sie, hom daiandramed? Bing si rang si, io da le um ad Jehova, io gin henunuen mu, mu de gin hosi io bui. 56Longu ogo masi, aga i vonei le nongen ad Jehova, su Provet gin boharni. Boen su lao aden masi su vob.
Jesu i la ndro ndurhian.
57Su ndramed, su da gin hosi Jesu, su dulieni i le ndro ndurhian Kaivas, i da gin loh su ndremda hernou, ma su labenen ber Jerusalem le um aden. 58Petrus, ir ndrbon su manan, i me le um ad ndurhian, i lugdo im born ndro su lao aden, beg ilndri longu masi su ghinen i le ndro Jesu. 59Su ndurhian su labenen masi, su gahi nongen, beg garii Jesu gleri. 60Su de danoni heb longu hendre bugane. Su mabosanged su gin me bahilou ge le Jesu, nongen asu heb monen bui. Boen sor marmou gin me, 61sor vong, sor bai: Ndramed ogo i gin bai: Io dono ndumbue um ad Jehova, io gu mengseni i le bing madolo lie. 62Ndurhian i dne, i ndemani i, i bai: Uo de vong de la ndro su heb le nongen asu bui? Jesu i simge. 63Malabo ndurhian i vong le ndro i, i boi: daui nemen gle belengan, vong le bormarn ad Jehova, i da mamaren ge, boharni me ndro du, uo Kristo, Ndur Jehova, de bui. 64Jesu i vong le ndro i, i bode: Io ie. Io vong le ndro mu: Mu gelndri Ndurndramed, i lugdo im nemen sengen ad Jehova i da ndoundoun ge, i gmehere le ndoulang ber lang. 65Ndurhian i mbuserei salo aden, i vong, i bai: I gin boii Jehova. Hisa, iou ndemani su le nongen aden? Du masi du gin hirong i, i gin boii Jehova. Mu bode sa? 66Su masi su bode: I gina momen ge, iou garii i na gmed. 67Boen su rogumbunhi i, su rii i le bud nemesu, su rii i nagbeluan. 68Su vong su bai: Kristo, boharni me ndro du, sie gin rii uo, gobharni ngarn.
Petrus Bieni Jesu.
69Petrus i da lobohonum, hom bihilas i me, i vong le ndro i: Uo da ndro Jesu ber Galilea lie? 70Petrus i bahilou le bormarsu masi, i vong, i bai: Io de dono uo bui, io de dono nongen adem bugane. 71Petrus i da baghege le babi, hom bihilao i vong le ndro su masi i bai: Ndramed ogo i da ndro Jesu ber Nasaret sidesi. 72Petrus i boi loldi, i daui nemen le belengan i vong i bai: Io de don ondramed ogo bui. 73Heb eluen bui muren su ndramed su da lobohonum, su vong le ndro Petrus, su bai: Ndangen uo homo asu, nongen adem i boharni. 74Petrus i berngai, i daui nemen le belengan, i vong i bai: Io de dono ndramed ogo bui, boen goho i reng. 75Malabo Petrus i hanguruen nongen ad Jesu, i da gin vong le ndro i, gin bai: Goho ma de dang masou, uo gin bieni io maber dolo. Petrus i gina marbohonum, i reng manden.
Currently Selected:
Mateus 26: LLENT
Highlight
Share
Copy

Want to have your highlights saved across all your devices? Sign up or sign in
Published by the British and Foreign Bible Society 1956