Lukas 9

Jesu rendegien su lao aden.

1Jesu i loh su masongul e rumou le goure, i hengen le ndro su ndoui ber lang, ndoui le robuldi su ngongong, ma le regurdueni su ndramed le iab asu. 2-3Boen i rendegien su le gor hoger e hoger, su bohernou le ndro su ndramed, longu ber gor ad Jehova, su gregurdueni su ndramed. I vong le ndro su i bai: Mbue hedi memrad gle sal ademu, ndes bui, ndob bugane, gan bui, moni bugane. Su sab salo hendr ge. 4I bai: Ar mu gmeher le um hom, mu da ndon le um ogo, mbue al le um hom lie. 5Be su ndramed su mburesu ademu, bieni gor asu, mbue de hedi heb memrad asu, su momen ge. 6Su lao aden su dne, la sal, su dogi le gor hoger hoger, su boharni le ndro su longu ber lang, su regurdueni su ndramed lie.

Heb nongen le Herodes.

7Herodes, ndurhian asu, gin hirong le longu ad Jesu, ndrnen i da noh, su holel su gin bai: Aga Johanes, i da gin dne lie le ngad aden. 8Su holel su gin hanguruen: Elia gin meher lie, su holel gin bai: Homo asu Provet ber nandugian gin ndne lie. 9Herodes i bode: Io gin sindrdi balen ad Johanes, aga i sie, i da hinen gelman ndoun dagara? I ha leng ilndri Jesu.

Gelman Jesu le gan.

10Su lao ad Jesu, su gin mul, su bosoui le ndro Jesu longu masigane, i hedi su lendi, i la gor hoger ngarn Betsaida, su ge su roh. 11Su ndramed, be su gin hirong i, Jesu la gor Betsaida, su ndrbon. I de sendraini su bui, i bosoui le ndro su longu ber lang, i regurdueni su, iab i da ndro su. 12Mernal baghege beg lol, su lao aden masongul e rumou su la ndro i, su vong le ndro i, su bai: Bai le ndro su ndramed, su gal gor hoger, su gal sim gan, aga marboga ge. 13Jesu i bodeie: Hengeni le gan ansu. Su bode: Suslong malima, ma ni marmou, aga gan anu. Aga i de vonei bui, iou beg sim gan le ansu masi derbe? 14Su da gin me goure, su gamel malibou. I vong le ndro su lao aden, mu ghinen i, su lugdo im boan. Ogo malimungul, ogo malimungul. 15Su hinen i dege i gin bai. 16Boen Jesu i hedi suslong malima, e ni marmou, i dendrai le belengan, i bamugueni Jehova, i iendri suslong, i hengen i le ndro su lao aden, su hur le ndro su masi. 17Su masi su ien, mosesu. Boen su nhui nogden, su da dandon le ndob ma ndobsungolerhed.

18Bersi muren, Jesu i la marboga, beg lodu, su lao aden su la born ndro i, su ge. I ndemani su, su ndramed su hanguruen sa, io sie? 19Su bode: su holel su bai, uo Johanes, Ndremda Surhi su; su holel su bai, uo Elias; su holel su bai, uo hom Provet ber goru, i da gin ndne lie. 20Malabo i ndemani su: Mu ge, mu de hanguruen sa, io sie? Petrus i vong le ndro i, i bodeie: Uo Kristo, Ndur Jehova, hohunan. 21I sendraini su, mbue su de vong de la ndro homo gleri. 22Boen i vong le ndro su, su labenen, su ndurhian, ma su ndremda hernou su gob momen le ndro Ndurndramed su bieni i, su ga rii i, madolo muren i gedne lie.

23Boen i vong le ndro su masi: Ar homo beg dogi sal ordo, beg ndrbon, i gbieni longu aden masi, i hedi beldigei aden bing si e rang si ie hauen, i ndrbo. 24Homo i da hanguruen mandern ge, bogulue i sidesi, na glos, homo i da bo mburer ordo, ghengen ndoui aden ndro io, i da horuan mamaren ge. 25Be hom ndramed i hedi me goure memrad masi ber boan, meluan na glos, i horuan derbe? 26Homo bombulen i da mesi le nongen ordo, gle ordo, Ndurndramed, bombulen i mesi le aden lie, be i da le engerang aden, le engerang ad Damen, le bormarsu Angelo helian. 27Ndangen io boi le ndro mu: Su holel gorbo su de somad bui, su ilndri hanu gor lundielang.

Engerang ad Jesu ndre bahali.

28Manondruo muren Jesu hedi Petrus, Johanes e Jakobus, su gobad ndre bahali si, beg lodu. 29Be i da raring, mandrn ir belueni, salo aden i beren gane, i hengerang. 30E lele, sor gamel marmou, sor la born ndro i, aga Mose sor Elia. 31Engerang ber gor lundielang i da ndro sor, sor vong le ndro i le longu masi, i da beg meher ndro i le gor Jerusalem. 32Petrus, Jakobus e Johanes, su madilmou su medir ge. Be su mamed, su ilndri engerang, ma sor gamel marmou la born ndro Jesu. 33Be sor marmou beg dogi, Petrus i vong le ndro Jesu: Ndorlaben, logna gorbo i hian ge. Iou beg mengseni bandrol madiluum, hom le ndro uo, hom le ndro Mose, hom le ndro Elia. I de danen i bui, i abde sa. 34I da vong ndon, ndoulang ber lang gin me, i ndrodhi su, su no manden, be su da le lundiendoulang. 35Ngasen si i do meher le ndoulang, i bai: Aga nduro, goloisden i, ghirong nongen aden. 36Ngasen ogo boen, su ilndri Jesu ge. Su madilmou su de gin bosoui hebsa bugane le ndro homo, le longu su da gin ilndri.

Jesu regurdueni hom ndurgamel.

37Bing si muren, su bieni bahali, su la ndogun lie. Su ndramed mabosanged so da sohal sal le ndro su. 38Hom ndramed le dogrosu masi i vong le ndro i, i bai: Ndorlaben, io soling ndro uo, golmgisden nduro i homo ge. 39E lele, ngongong i rii i, i da loholo ndoun ndoun, i da rosni i, i rui le horo ma le horo, ndorngon i muh, de bieni i bui, ndoui aden masi baghege gina boen. 40Io gin soling ndro su lao adem, su grobuldi ngongong giao, de dansu i bui. 41Jesu i bode: Mu ndramed heb monen bui, bern ademu momen ge. Io da ndro mu eluen, gehere mu belueni bern ademu? Dulieni ndurm meher ndro io. 42Mbunana i da le sal, ngongong gin me, gin rosni i ndoun. Jesu i boii ngongong, i regurdueni ndurgamel, boen hengen i mul le ndro damen. 43Su masi, meluasu i ieb manden ge, be su gin ilndri ndoui ad Jehova mandromai, meluasu masi gin ieb dagara, i vong le ndro su lao aden, i bai: 44Nongen ordo, io beg bosoui malabo le ndro mu, gle delengamu ndangen. Heb eluen bui muren su daui Ndurndramed le nemesu labenen, beg ga rii i, 45de dansu nongen aden bui, de dansu bui, sehe longu Jesu gin hanguruen, su de ndemani i leri bui, su noh.

46Su da gin hanguruen le bergolsu, sie i da hian, i da manden hanu le asu masi. 47Jesu i danen hanguruen asu i da le bergolsu, i hedi mbunana la bage ndro i. 48Boen i vong le ndro su: Be homo ir bogulue mbunana ogo le ngoro, i somui me ordo, homo i da somui me ordo, i da somui le aden ge i gin rendegien io. Be homo i da mandehege le hanguruen aden, i homo manden. 49Malabo Johanes i vong le ndro i, i bai: Ndorlaben, iou gin ilndri homo, i da robuldi su beld le ngarm, sendraini i, homo adu bui, i indrbon sal adem bugane. 50Jesu i bodeie: Mbue sendraini i, homo i de bo iil de la ndro mu bui, i gous ademu.

Jesu i da gor asu Samaria.

51Taim gin meher, Jehova beg rui ndurn le belengan, Jesu beg dogi le gor Jerusalem. 52I rendegien su lao aden hanu, su gin meher le gor asu Samaria. Su gahi um hom, Jesu beg medir ri. 53Su ber gor, su mburesu, be su gin ilndri Jesu beg dogi le gor Jerusalem. 54Su lao aden, Jakobus sor Johanes, sor vong le ndro Jesu: Ndorlaben, be uo lengi, iou vong, moan ber lang na gmener, i dilmui gor asu sumburdi, dege Elias gin hinen i goru. 55I belueni bormarn ndrbon, i sendraini sor, i vong le ndro sor, i bai: Danmor bui, mor mbunana ad sie? Meluan admor i derbe? Ndurndramed i de gin me le boan bui le daii su ndramed, beg rumburdi su. 56Boen su dogi le gor hoger, su dandon le gor.

Heb nongen le ndro su, su beg ndrbon Jesu.

57Boen su dogi le gor manan. Su da le sal, homo i la ndro i, i vong le ndro i, i boi: Io ha dogi la born ndro uo, io ndrbom. 58Jesu i bodeie: Ngai i da ndro su bosel, numen i da ndro su ndorgan ber lang, Ndurndramed heb logna aden bugane, i danen hengang ri. 59I vong le ndro homo lie: Irndrbo, ndramed ogo i bodeie: Ndorlaben io ha dogi hanu, beg doni Bo Domo le ngad, hian somui ri. 60Jesu i bode: Meluasu ginmad, su doni numbuesu le ngad. Uo ge, edne, bohernou le ndro su longu ber gor ad Jehova. 61Homo i vong le ndro i, i bai: Ndorlaben, io ndrbom, hanu io beg hilou le um ordo, beg vong gudbai le ndro su, hian somui ri. 62Jesu i vong le ndro i: Homo i da gin hedi mordo le bo mburer, boen i gbieni i, i de vonei gor lundielang bugane.

Currently Selected:

Lukas 9: LLENT

Highlight

Copy