Lukas 8

Heb nongen le su bihilou ad Jesu.

1Boen Jesu i dogi le gor hoger e hoger, le gor manden e mandehe, i henunuen su ndramed masi le longu hian ber gor lundielang. Su lao aden masongul e rumou su la born ndro i le sal aden. 2Dagara su bihin holel, i da gin rumburdi su gle ngongong, gle ndoui ad beld, i da gin hosi su, i gin regurdueni su le iab asu. Bihin homo i da ndrbon Jesu, aga Maria Magdalena, mahanu i gin robuldi su beld manondrdilmou le ndrnen. 3Homo ngarn Johana, nambulen ad Gusa, Kuskus ad Herodes, homo lie, ngarn Susana, ma su mabosanged, su da sobani Jesu le gan anen.

Heb nongen dohongein le gorn ber beleng.

4Su ndramed mabosanged su la goure, su ber gor hoger e hoger, su me geherong. Malabo i vong le ndro su heb nongen dohongein, i bai: 5Hom ndramed gineao le daui gorn le beleng. I robieni gorn le boan, holel i los ir sal su ndramed irgai ri, ndorgan gin me gin ni. 6Holel i los ir bad, boan heb ge mandehe ndre bad, i reg roud, boen i voiliu, ngondrn bugane gin meng gane. 7Holel i los le barvas, barvas i reg lie, i ndrodhi dohobern, i ginmad. 8Holel i los le boan hian, i reg la manden, sengen mabosanged gin meher ri. Boen Jesu i bai: Homo ma delengan, i hirong nongen ordo.

9Boen su lao aden, su ndemani i, nongen dohongein ogo i vonei sa? 10I bodeie: Jehova gin hengen le ndro mu, danmu longu ber gor ad Jehova, longu masi i da gin nhui. Su ge, su hirong leri le nongen dohongein ge, begmarsu, de dansu lele bui, delengasu de dansu hirong bui. 11Nongen dohongein ogo, io da gin bosoui, i vonei ogoro: Gorn su da gin daui le beleng, aga nongen ad Jehova. 12Gorn i da los le sal, aga su holel su gin hirong nongen ad Jehova, boen Satan i me, i behena nongen, i da le bergolsu giao. Debosan su boro ndoui ber lang su manmaren. 13Gorn i da gin los ndre bad, aga su ndramed, su da hirong nongen ad Jehova, su somui ri, su mugmug ge. Ngondrn bui, heb eluen bui muren, be rang momen i gmeher ndro su, su da los. Su gina momen ge. 14Gorn i da gin los ie barvas, aga su ndramed, su da gin hirong nongen ad Jehova, boen su iao, hangungrou le longu ber boan, gle memrad asu, i ndrodhi nongen ad Jehova, mugueni le gous asu i ndrodhi dohobern, heb sengen bugane. 15Gorn i da los le boan hian, su da hirong nongen ad Jehova, boen su bogulue i le bergoln hian, rosan ge, sengen asu mabosanged sidesi.

16Hom ndramed i do da bui, i da hesu lamp, boen i ndrodhi i gle lus hendre, i daui i behendra geiao, bugane, i daui i ndre geiao, i da hinganen le ndro su, su da meher lundieum. 17Homo de danen gorni longu hendre bugane, Ndorlaben gobharni i, homo de danen ndrodhi hebsa bui, heb eluen bui muren, su dansu leri. 18Or gulue meluamu, ha hirong gmonen ge, su hengen le ndro i, memrad aden dsoln, su hedi giao heb memrad ad homo mandehege.

Su loun ad Jesu.

19Nanen Jesu, ma su ndern, su beg ilndri i, de dansu bui, su ndramed besbas le sal, dansu me lundieum bugane. 20Su vong le ndro Jesu, su bai: Nanem, ma su nderm su da lobohonum, su beg ilndri uo. 21I bode: Nano, ma su ndere, aga su ndramed, su da delengasu le nongen ad Jehova.

Jesu i ndounen ndran manden.

22Bersi muren, Jesu la lundiendol heie, ma su lao aden su la born ndro i, i vong le ndro su, i bai: Du gao le ndran le leng horo. Su bieni leng, su iao. 23Su da le ndran, Jesu medir. Malabo gemis manden hai ndoun ndoun i ngoh, ndran la lundiendol, baghege na glol. 24Su hilou le ndro i, su hingeni i, su vong, su bai: Ndorlaben, Ndorlaben, iou na glol. Jesu i dne, i boii hai e ndran, i mulhili, hai boen. 25Boen i vong le ndro su, ndoui ademu i da oho, mu da boro ndoui ordo derbe? Su ge, nohasu dsoln, meluasu masi i ieb. Su vong me goure, su bai: Aga i sie, hai e ndran hirong nongen aden?

Jesu regurdueni homo ngongong i da ndrnen.

26Boen su iao le horo le leng. 27Su gin ilndri hom ndramed, i da sohal sal le ndro su, ngongong i da ndrnen. Eluen i de dou salo bui, i da medir le um hom bugane, i da medir le ngai. 28Be i gin ilndri Jesu, i loholo, i vale, i los le boan, i vong: Uo ha lengi sa me ndro io, Jesu, uo Ndur Jehova ber belengan, io soling ndro uo: Mbue bo momen me ndro io. 29I danen, Jesu beg robuldi ngongong le ndrnen ndramed giao, ngongong gin rii ndramed ogo eluen. Su ber gor, su beg hosi i le vas, ma le sen, i ge i ndrhomuri vas, i ndumbue sen bomud, homo de danen hosi i bui, ngongong i robuldi i le marboga. 30Malabo Jesu i ndemani i: Garm sie? I bode: Io ngoro: Legion, su beld mabosanged su da ndrnen. 31Su soling le ndro Jesu i de buldi su, de rendegien su le gor moan bui. 32Su bu mabosanged su da baghege, su do da duldul, su snel soling ndro Jesu su bode, be su gal ndre bu. Jesu i somui ri. 33Malabo su snel masigane, su da ndrnen ndramed, su bieni i, su la ndrnen su bu, su bu masi su la vob bahali, su gohis le ndran su la mad. 34-35Su ndremda bogulue bu, be su gin ilndri longu ogo, su vob, su hilou le gor asu, so bosoui le ndro su ndramed longu ogo. Be su gin hirong longu ogo, su bieni gor asu, su la ndro Jesu beg lele longu masi, ndremda bu gin bai. Su ilndri ndramed, snel masi gin bieni i, i la lugdo im boan baghege ndro Jesu, salo aden hian ge, hanguruen aden monen gane. Meluasu masi i ieb leri. 36Su da gin ilndri gelman ad Jesu, su gin bosoui longu masi, Jesu gin hinen i, i da gin regurdueni ndramed ogo. 37Su ndramed masi ber gor Gergesa, su ndemani Jesu i gbieni gor asu, su ha noh manden. Jesu i la lundiendol, i la mul. 38Boen ndramed ogo, Jesu gin robuldi ngongong le ndrnen, i ndemani Jesu i la ndrbon sal aden. Jesu i mbueren, i vong le ndro i, i bai: 39Al le um adem, absou le ndro su ndramed ber gor le gelman ndoun, Jehova gin hinen le ndro uo. I iao, i bohernou le ndro su masigane le gor aden, sehe mburer Jesu gin hinen le ndro i.

Gelman ad Jesu le ndro hom bihin ma le ndro hom ndurbihin.

40Jesu i la mul, su ndramed masi su mugueni i, su gin belengeni i. 41Hom gamel gin me, ngarn Jairus, ndremda bogulue numohernou, i meher ndro Jesu, i godurhu, i los le boan, i soling le ndro Jesu, i gmeher le um aden, 42ndurn homo ge, ndurbihin, uru aden masongul e ruo, i da le berle aden baghege na gmed. Jesu i la ndro i. Su ndramed dsoln su da besbas. 43Hom bihin, i da med, le uru masongul e ruo le ndrai aden, i gin bieni memrad aden masigane le ndro su doktor, su girgurdueni i, de dansu i bui. 44Bihin ogo i me, i gohon le ndrbon Jesu, i boro salo aden heb ge mandehe. Malabo ndrai aden i horuan. 45Jesu i ndemani su, sie i gin boro io ie? Su masi de dansu i bui. Malabo Petrus ma su lao aden su vong le ndro Jesu: Nongen adem derbe, su ndramed mabosanged su da besbas ndro uo. 46Jesu i bode: Homo gin boro io, io dono i, ndoui ordo gina le ndro homo. 47Ar bihin gin ilndri, Jesu i danen, sie gin boro i, i rerr, i me, i los le boan, i boharni le ndro su ndramed masigane, desa i gin boro Jesu, i bosoui le ndro su, ndoui ad Jesu gin regurdueni i. 48Jesu i vong le ndro i, i boi: Nduro, uo da gin boro ndoui ordo hian ge, aga gin sobani uo, al le mandri ad Jehova. 49I da vong ndon, homo ber um ad Jairus ndremda gulue numohernou, i me dala, i boi: Ndurm ginmad, uo al bur Ndorlaben gle oho? 50Jesu, i da gin hirong nongen ogo, i vong le ndro i, i bai: Mbue uo go noh, gboro ndoui ordo, io beg sobani i. 51I gin me le um, i sendraini su, su la lundieum. I hedi Petrus, Johanes e Jakobus, dagara damen sor nanen ad mbunana. 52Su masi su da dang, su do da durui su, Jesu i boi le ndro su: Mbue de dang, mbunana de ginmad bui, medir ge. 53Su hal le aden, su dansu i hian, ndurbihin ginmad. 54I la ndro mbunana, i boro nemen, i vong le ndro i, i boi: Ndurbihin, edne. 55Meluan gin mul le mandrn, i dne malabo. I vong le ndro su, su hengen gan le anen. 56Damen sor nanen meluasor i ieb manden. I vong le ndro sor, de bosoui heb de la ndro homo bui.

Currently Selected:

Lukas 8: LLENT

Highlight

Copy