Lukas 4

Sadan seslaini Jesu.

1Jesu, beb le Meluan Helian, i bieni Jordan, i mul gor Galilea, boen Meluan Helian i rendegien i le marboga, le bing mahangul. I dogi le horo ma le horo. 2Satan gin me, i seslaini i. Jesu de gin ien heb gan bui. Bing mahangul boen, i mundrul. 3Satan i vong le ndro i, i boi: Be uo ndurn Jehova, vong gle ndro bad ogo, ir belueni gle gan anem. 4Jesu i vong le ndro i, i bodeie: Nongen Helian i da le Buk ogoro: Ndramed homo de horuan gle gan anen ge bui. 5Boen Satan i dulieni Jesu, sor gobad ndre bahali manden, i bosilieni le ndro i gor masigane ber boan bersi. 6I vong le ndro i, i boi: Io beg hengen le ndro uo memrad masi ber boan aga ordo ge, io dono hengen i le ndro homo ma homo dege io lengi i. 7Ar uo godurhu uo gob lodu ndro io, io beg hengen i le ndro uo. 8Jesu i vong le ndro i, i bodeie: Su gin hondre le Buk Helian: Gob lodu le ndro Jehova, Nborlaben adem, gob mburer le ndro i ge. 9Boen Satan i dulien Jesu, sor la gor Jesusalem, sor gobad ndro um ad Jehova, gle balndo, i vong le ndro i, i bai: Be uo ndur Jehova, gohis gle boan. 10Su gin hondre le Buk Helian: I gu rendegien su Angelo aden le ndro uo, su gobgulue uo. 11Su bordoui uo gle berlalesu, debosan ndegen na glos gle bad. 12Jesu i bode: Su gin hondre: Mbue seslaini Jehova, Ndorlaben adem. 13Boen Satan i bieni Jesu, beg meher ndro i bersi muren.

Jesu i da le gor aden Nasaret.

14Boen Jesu i mul le gor Galilea, le ndoui ad Meluan Helian. Ngarnongen le aden i hilou le gor masigane. 15I henunuen su le numohernou asu, su mugueni i le nongen aden. 16I me lie le gor Nasaret, gor ad nanen, i gin menda ri, i gina le numohernou asu le sabbath, aga bern aden sidesi. I dne, beg absou nongen ad Jehova. 17Su hengen le ndro i Buk ad Provet Jesaia. I erbei Buk, i ilndri nongen ogoro. 18Meluan ad Ndorlaben i da ndro io, i gin daui ndrelgei le borbalo, i gin rendegien io le boharni le ndro su ndramed molhe longu ber lang, su mugmug leri. I gin rendegien io, io bohernou le ndro su, su da kalabus, beg rumburdi su, le ndro su begmarsu bui, begmarsu i greu, su da gina momen ge, su horuan, su mamaren lie. 19Aga uru ad Ndorlaben le golnisden aden gle ndro su. 20I gin daui Buk gle nemen ad lao dandendegei ber um ogo, boen i lugdo im boan begmarsu masi, su da le lundieum, su lele i, su masi belengeni le hernou aden. 21Malabo i vong le ndro su, i bai: Nongen ogo su gin hinen i boen eruar. Longu masigane, delengamu gin hirong leri, i gin me. 22Su masi, su somuo le nongen aden, meluasu masi i ieb le nongen aden, i da gin bosoui le ndro su, nongen le golnisden ad Jehova. Boen su vong, su bai: Aga ndur Josev, de bui? 23I vong le ndro su i bodeie: Mu va vong me ndro io heb nongen ademu i da hilou le gor: Doktor, osbani manderm, longu masigane uo da gin hinen i le gor Kapernaum, ngarnongen gin hilou le ndro du, hian ghinen i le gor adem lie. 24Boen i vong le ndro su, i bai: Ndangen oi boi le ndro mu, nongen ad Provet homo i molhege le gor aden. 25Ndangen io boi le ndro mu, su bihinou mabosanged asu Israel le rang ad Elia, be i gin vadi babi ber lang, lengen de gin ndrud bui le uru madolo, ma le vara manono. Song manden gin hilou le gor asu. 26Jehova de gin rendegien Elia de la hom bihinou asu Israel bui, le ndro bihinou homo ge i da gor Sarepta, i da le horo le gor Sidon. 27Su ndramed mabosanged mandrsu momen, legen ge, su da le gor Israel, le rang ad Provet Elisa. I de gin regurdueni su bui, homo ge, i gin sobani i aga Naeman, homo asu Siria. 28Be su gin hirong nongen ogo, su masi su da numohernou, ndrnesu i irgu manden. 29Su dne su boro i, su rui i le marbohongor ndre bad manden ber bahali, gor asu i do dari, su beg bieni i le dogun. 30I ge, i gin irgai le dogrosu, gin bieni su, gin dogi le gor manan.

Jesu i da gor Kapernaum.

31Boen Jesu i dogi le gor asu Galilea, Kapernaum, i henunuen su ndramed ber gor le sabbath asu. 32Meluasu masi i ieb leri. I gin henunuen su le ndoui ad Jehova ber belengan. 33Hom gamel i da lundiehernou ngongong le ndrnen, i loholo, i vale, i bai: 34Ha, uo lengi sa, Jesu ber Nasaret, uo gin me, uo beg ndumbue du, io dono uo sie: Uo ndur Jehova Helian. 35Jesu i sendraini i, i vong i bai: E simge, e bieni ndramed ogo; ngongong i bieni ndramed le boan, i rosni i, boen i bieni ndramed, gineao, i de danen bo momen de la ndro ndramed ogo bui. 36Meluasu masi i ieb manden, su vong me goure, sehe nongen aden ndoun, ndoun dagara. Ngongong masi delengan le nongen aden, su gbieni su ndramed. 37Ngarnongen le longu ogo i hilou le gor masi. 38Boen i bieni numohernou asu, i iao le um ad Simon. Naloson Simon i da med, i busngad manden, su gin ndemani Jesu, i osbani i. 39I la ndro i, i godurhu i boii iab aden, iab gin bieni i. Bihin ogo i bieni berle aden, i bo mburer le gan ansu. 40Mernal gin lol, su huri su ndramed iab i da ndro su, su me ndro i. I boro su masi le nemen, i regurdueni su. 41Su ngongong mabosanged su da ndrnesu ndramed, su loholo, su vale, su boi: Uo ndur Jehova. I sendraini su, mbue su vong nongen, su dansu Jesu i Mesias. 42Mabing, i dne, i dogi le marboga. Su ndramed su gahi i, s ula ndro i, su beg i dandon, beg hosi i, debosan i bieni gor asu. 43I vong le ndro su, i bai: Io la ndro su gor masigane, io gobharni le ndro su longu ber lang, Ndorlaben gin rendegien io. 44I bohernou le ndro su Juda masi le numohernou asu.

Currently Selected:

Lukas 4: LLENT

Highlight

Copy