Johanes 4

Jesu i da le gor Samaria.

1Ndorlaben gin hirong i, ngarnongen gin hilou le ndro su Pharisi, Jesu i surhi su dsoln, su lao aden mabosanged hanu le ad Johanes. 2Jesu de gin surhi su ndramed bui, su lao aden ge, su gin hinen i. 3I bieni Judea, i dogi mul le gor Galilea. 4Samaria i da le dogro. Sal aden gina le gor Samaria. 5I gin meher le gor si, ngarn Sigar, i da baghege le beleng ad Jakob, mahanu i gin hengen i le ndro ndurn Josev. 6Dogun i da le beleng, su bosoui dogun ad Jakob. Jesu, mandrn i da berad le dogi aden. I lugdo baghege le dogun le dogrorang. 7Hom bihin ber Samaria i gin me, beg hedi ndran. Jesu i ndemani i, hian ghengen heb ndran me ono. 8Su lao aden su gina le gor, beg semani gan la. 9Bihin ogo i vong le ndro i: Aga derbe, uo homo asu Juda, uo ndemani io, hom bihin asu Samaria gle ndran? Su Juda de dansu vong heb nongen le ndro su ber Samaria bui. 10Jesu i vong le ndro bihin, i boi: Ar uo danem memrad ad Jehova i da hengen i le ndro su ndramed, ar uo danem, ogo i sie, i ndemani uo gle ndran, uo soling le ndro i, i ghengen le ndro uo ndran i da maren, i da hian ge. 11Bihin i bode: Ndorlaben, bondran adem bui, dogun i eluen uo beg moe ndran maren oho? 12Uo de hanu le ad damdu Jakob bui, i ogo gin hengen me ndro du dogun. I ge, i gin ilmui gleri ma su ndurn, ma su meh aden. 13Jesu i bodeie: Homo ma homo, i da gilmui le ndran ogo, goln i gmar le ndran lie. 14Ar homo i gilmui gle ndran, io beg hengen le ndro i, goln i de mar bersilie bui. Ndran io beg hengen le ndro i, aga dege ndran haga, i da muh sidegesi, i ghinen su mamaren ge. 15Bihin i vong le ndro Jesu: Ndorlaben, ghengen me ndro io ndran dagara, debosan golo i mar gleri bersilie, ma io gmeher bersi e bersilie le hedi gle ndran ogo.

16Jesu i vong le ndro i, i boi: Al, hilou, eloh nambulem, boen uo gmul le logna ogo. 17Bihin i bodeie: Nambulo bui. Jesu i vong le ndro i: Nongen adem i monen ge, uo da gin bai: Nambulo bui. 18Su gamel malimou su nambulem, ma homo, i da le um adem malabo, i nambulem bui, nongen adem i monen ge. 19Bihin i vong le ndro i, i boi: Ndorlaben, io lele i, uo hom Provet. 20Su damen adu su gin lodu le ndro Jehova ndre bahali gorda, mu ge, mu bai: Jerusalem ge aga logna le dirhor le ndro Jehova. 21Jesu i bodeie: Bihin, aga ndangen, rang na gmehere, de danmu lodu le ndro Jehova le gor Jerusalem bui, dagara ndre bahali gorda bugane. 22Mu da lodu le ndro homo, de danmu i bui, iou da lodu ge le ndro i, dandu le aden. Longu hian ber lang i gin meher le asu Juda. 23Rang na gmeher, i da baghege malabo, su da dirhor le ndro Damen gle meluasu e ndangen, Damen i ie lengi su da dirhor dagara. 24Jehova, aga Meluan ge, su da beg lodu le ndro i, su gob lodu le ndro i gle meluasu, su gob lodu le ndro i monen ndangen. 25Bihin ogo i vong le ndro i: Io dono, ar Mesias i gmehere, su da bosoui i Kristo, be i gmeher, i gobharni le ndro du longu masigane. 26Jesu i bode: Io Kristo, i da vong le ndro uo.

27Malabo su lao aden gin mul, meluasu masi i ieb be su gin ilndri, i da vong le ndro hom bihin. Homo de gin ndemani i bui: Uo ha lengi sa le ndro i, de, desa uo da vong le ndro i. 28Malabo bihin i da daui lumiandran le boan, i hilou mul le gor, i vong le ndro su ndramed: 29Mu gama e lele hom gamel i gin boharni longu ordo masigane, io da gin hinen i, aga Mesias adu, de bui? 30Su masi su hilou le marbohongor, su la ndro Jesu.

31Su lao ad Jesu su ndemani i su boi: Ndorlaben gien gan. 32I bode: Io gien gan, de danmu heb leri bugane. 33Su lao aden su vong le goure, homo gin hengen gan le anen, de derbe? 34Jesu i bodeie: Gan ono i ogoro: Io beg hinen mburer ad Jehova, i da gin rendegien io boen, dege i ha lengi. 35Mu da vong, vara mahahu muren, su huri gan ber beleng gle um asu, malabo io boi le ndro mu: Lugi begmarmu gle manan e lele, su beleng masi, rang gorbo su ghuri gan le um. 36-37Malabo su da gin bo mburer le beleng, su hedi surian asu. Homo i da gin hedi me goure gan hian ber lang, aga surian ir belengen sor marmou, homo i da gin daui sengen le boan, ma homo i da gin huri i le um. Nongen asu ber gor i monen ge, su da vong su boi: Homo i da lugi le boan, ma homo i da hedi me geherong le um aden. 38Io gin rendegien mu le beleng, mu ghurdi me goure gan hian ber lang, mu de gin bo mburer hanu le beleng ogo bui, su ge, ber goru su gin hinen i. Malabo mu gin meher le beleng asu.

39Su ndramed dsoln ber gor Sigar su da delengasu le nongen ad bihin, i da gin vong le ndro su: I gin boharni me ndro io longu ordo masi, io da gin hinen i. Su gin boro ndoui ad Jesu Kristo, su lao aden. 40Su la ndro Jesu, su ndemani i, i dandon le gor. I da medir maruo le gor ogo. 41Su mabosanged, su da gin hirong nongen aden, su lao aden. 42Su vong le ndro bihin: Malabo iou lao aden ge gle nongen adem, uo da gin bosoui me ndro du bui, delengadu gin hirong nongen aden. Malabo dandu i, aga Kristo ber gor masi.

Jesu regurdueni ndurn ad hom labenen ber Kapernaum.

43Maruo muren, Jesu i bieni gor, i dogi le gor Galilea. 44De gin hanguruen nongen aden bugane, i da gin boi: Hom Provet i da molhege le gor ad nanen. De delengasu le nongen aden bui. 45Be i gin meher le gor Galilea, su ber gor Galilea su gin somui le aden, su gin ilndri gelman masi i da gin hinen i, le gor Jerusalem, le uru asu, be su gin dogi le gous asu Juda. 46I gin me le gor Kana, i da Galilea, hanu i gin belueni ndran gle ndrunvain. Hom guskus ad ndurhian i da le gor Kapernaum, ndurn i da sik le berle aden. 47Be i gin hirong i, Jesu gin bieni Judea, i gin me Galilea, i la ndro i, i ndemani i, Jesu na gmeher, i gregurdueni ndurn i da baghege na gmed. 48Jesu i vong le ndro i: Ar mu de ilndri gelman e longu ndoun bui, dandu boro ndoui ordo bui. 49Kuskus i bode: Ndorlaben, gmeher ndro io, debosan nduro na gmed. 50Jesu i bodeie: Gal gor ademndurm i horuan ge. Ndramed ogo i boro ndoui ad Jesu Kristo, i mul le gor aden. 51Be i gin me, su lao aden su sohal sal le ndro i, su vong, su boi: Ndurm i horuan ge. 52I ndemani su, gehere iab gin bieni i? Su bodeie: Bihe le dogrorang, busngad gin bieni i. 53Malabo damen i danen, aga le rang, be Jesu gin bai le ndro i: Ndurm i horuan ge! I, ma su masi ber um aden su lao ad Jesu ge. 54Aga gelman, Jesu i da gin hinen i muren le gor Kana, be i gin mul le gor Galilea.

Currently Selected:

Johanes 4: LLENT

Highlight

Copy