Johanes 3

Jesu sor Nikodemus

1Homo asu Pharisi, ngarn Nikodemus, homo asu labenen ber Juda, 2gin meher ndro Jesu lobing ge, i vong le ndro i, i bai: Ndorlaben, dandu i, uo homo, i da henunuen su ndramed Jehova, i ge, gin rendegien uo. Hom ndramed ber boan de danen hinen gelman dege uo gin hinen i hebsa bui, ar Jehova i da le bergoln bui. 3Jesu i bodeie: Ndangen, ndangen, io boi le ndro uo, be homo de meher gle houen bui, i de meher le gor ad Jehova bugane. 4Nikodemus i bode: Hom ndramed ber boan i da hibermanda i danen meher le gor gle houen derbe? I danen iao le ndrnen ad nanen lie? Boen i gmeher le boan gle houen derbe? 5Jesu i bodeie: Ndangen, ndangen, io boi le ndro uo, ar homo de meher gle ndoui ad Meluan ma gle ndoui ber ndran bui, i de danen meher le gor lundielang bugane. 6Sengen masi i da gin meher gle mandrsu ndramed, aga sengen ge. Longu masi i da gin meher gle ndoui ad Meluan, aga ad Meluan ge. 7Meluam i ieb derbe, be io gin bai: Mu gmeher le boan gle houen ge. 8Ior i da ngoh le horo, de le horo dege i lengi, uo danem hirong ngasen, uo de danem logna aden ber goru hebsa bui, uo de danem bui i da hilou oho. Dagara homo ma homo i da meher gle ndoui ad Meluan Helian. 9Nikodemus i vong le ndro i, i bode: Longu ogo i hi derbe? 10Jesu i bodeie: Uo hom ndremda hernou asu Israel, uo de danem longu ogo heb bui? 11Ndangen, ndangen io boi gle ndro uo: Iou bohernou longu masi, dandu i, iou boharni longu masi iou gin ilndri, mu de somui le boharni adu bui. 12Io gin bosoui le ndro mu longu molhe ber boan, mu de gin boro i hebsa bui, danmu boro i derbe, ar io absoui le ndro mu longu ber lang? 13Homo de gin gobad le gor lundielang bugane, i ge, homo i da gin meher le boan, aga Ndurndramed ber lang. 14Mose i da gin dadhe moad si le marboga goru, dagara su ghinen i le ndro Ndurndramed lie. 15Su masigane su gboro ndoui aden su de glos bui, su da mamaren ge sidesi. 16Jehova golnisden gor masi dagara: I hengen Ndurn i homo ge, su masi su hirong i, su de somad bui su mamaren ge sidesi. 17Jehova, be i gin rendegien ndurn i mbueren dieni gor masi, i beg rumburdi su ge. 18Homo i da boro ndoui aden, Ndorlaben i de dieni i bui, ar homo i de boro ndoui aden bugane i gina momen gane, Ndorlaben gin dieni i, i de gin boro ndoui le ngarn ad Ndur Jehova, i da homo ge, heb bui. 19Aga gord le ndro su ndramed: Sul ber lang gin meher le boan, su ndramed su da le ndrogmoan ge, voasuiso ndrogmoan, mbueresu sul ber lang, longu asu momen ge. 20Homo ma homo, i da bo longu momen, ndrnen i mah le ad sul, i de boharni longu aden momen bui, i drodhi longu aden. 21Homo i da monen ge, i da hinen longu aden lorang, su masi dansu ilndri mburer aden, i gin hinen longu aden le ndro Jehova.

Heb nongen ad Johanes, ndremda surhi su, le ad Jesu.

22Boen Jesu ma su lao aden su ha dogi le gor Judea, i dandon le gor eluen hebe, i surhi su ndramed. 23Johanes lie i da le gor Enon baghege le gor Salim, i surhi su lie, ndran mabosanged i da le gor. Su ndramed su la ndro i, su beg i surhi su. 24Su de gin daui Johanes le rang ogo le kalabus masou. 25Homo asu Juda, ma su lao ad Johanes, su bo iil le nongen asu le heb bern asu Juda. 26Malabo su la ndro Johanes su vong le ndro i: Ndorlaben, hom ndramed i da gin meher ndro uo le ndran Jordan, le horo, uo da gin boharni le aden, i ge, i surhi su ndramed lie, ma su masi su hilou le ndro i. 27Johanes i vong le ndro su, i bodeie: Hom ndramed ber boan i de danen hedi hebsa bui gle ndoui aden, be Ndorlaben ber belengan de hengeni de la ndro i bui. 28Mu masi danmu, io da gin bai, io Kristo bui, io homo ge, Ndorlaben gin rendegien io hanu le sal aden. 29Homo i gin ibdi bihin, i ge, i nambulen ad bihin, gous ad ndramed ogo i da hirong leri, gous aden gin ibdi hom bihin le nambulen, i mugmug manden, be i da ilndri gous aden i ngei, i mugmug ge le ad bihin, io dagara lie io mugmug manden ge. 30Io ha lengi i, i gmenda, io ge io na gmed. 31I ge, i da gin meher le lang i hanu le asu masigane. Homo ber boan, aga ber boan ge, nongen aden gle longu ber boan, i ge, i da gin meher le lang, i manden hanu le asu masigane. 32I da boharni le longu masigane, begmarn gin ilndri, delengan gin hirong i, hendre ge su de somui le nongen aden bui. 33Homo ma homo i da somui le nongen aden, i da boharni nongen ad Jehova, i monen ndangen. 34Homo, Jehova gin rendegien i, i vong nongen ad Jehova, Jehova i daui Meluan le bergoln, Meluan dsoln, i da vonei le mburer aden. 35Damen golnisden Ndurn, i gin daui longu masigane le nemen ad Ndurn. 36Ar homo i boro ndoui ad Ndurn, i da horuan sidegesi. Homo i de delengan le nongen ad Ndurn bui, i na gmed ge. Gus ad Jehova i da ndro i sidegesi.

Currently Selected:

Johanes 3: LLENT

Highlight

Copy