Apostel 3

Mburer ad Petrus sor Johanes.

1Bersi muren, Petrus sor Johanes, sor la um ad Jehova ibia, sor beg lodu. 2Su ndramed holel gin huri hom gamel, ndegen momen gle mamemei. Su gin lugi baghege le babi ber um ad Jehova, su bosoui i, babi mamali. Bing si e rang si i lugdo im boan, i soling ndro su, su da gin me le lodu, gle heb moni. 3Petrus sor Johanes gin meher, i ndemani sor lie gle heb memrad. 4Petrus sor Johanes sor lele bormarn ndoun, Petrus i boi: E lele iouoro. 5I ilndri sor hian, eluen, i belengen gle heb memrad asor. 6Petrus i bodeie: Moni ordo hebsa bui, longu hendre ge i da ndro io, io ghengen uo: Io boi le ndro uo le ngarn ad Jesu Kristo ber Nasaret: Edne, naiu! 7-8I bordoui nemen sengen, i sobani i, malabo i dne i dogi. I la lundieum ad Jehova bersi ndro sor, i hivane le horo ma le horo, i hilou ge i mugueni Jehova. 9Su ndramed masi su ilndri i da dogi, i da mugueni Jehova. 10Malabo dansu i, aga ndramed, i da gin soling baghege le babi mamali, bing si e rang si. Meluasu masi i ieb, be su gin ilndri, ndramed ogo i da irgai monen ge. 11I de bieni sor bui, i da ndro sor, su ndramed masi, su da lundieum ad Salomo, su gin me goure, meluasu masi i ieb.

12Be Petrus i gin ilndri su, su da me geherong, i vong le ndro su, i boi: Mu gamel ber Israel, desa meluamu i ieb, desa mu ilndri bormardor ndoun dagara? Desa mu da hanguruen, iouoro gin hinen gelman ogo gle ndoui adoro, gle hanguruen adoro hian ge. 13Bugane, Jehova, Ndorlaben ad Abraham, Ndorlaben ad Isaak ma Ndorlaben ad Jakob, ma Ndorlaben asu Damdu, i ge, i gin daui engerang aden le ndro lao aden Jesu, mu ge, mu gin daui i le nemen asu Haiden, gin hangaini i, gin gogobaini i le bormarn ad Pilatus, be i beg rumburdi i. 14Mu da gin hangaini Ndurndramed ogo, i da Helian, monen gane, gin rumburdi hom daiandramed. 15Mu gin daii Ndurhian ber gor lundielang. Jehova gin hingeni i: Aga dandu i, aga iou boharni. 16Iou da gin boro ndoui aden, iou da gin regurdueni ndramed ogo le ngarn ad Jesu Kristo, i da horuan mamaren malabo. Jesu, i ge, i gin regurdueni i, dege begmarmu ilndri i. 17Mu ndere, malabo io dono, uomu da gin hinen momen le ndro i dagara, danmu hanguruen heb monen bui, dagara su labenen ademu. 18Longu masi ogo gin meher, dege Jehova gin boi goru le bohon asu Provet aden, be su da gin boharni ngendian ad Mesias. 19Garbelueni bern ademu, gu reng le longu ademu momen, boen Ndorlaben i esbui longu ademu momen. 20Muren mu da horuan ge le gor ademu gle ndoui ad Ndorlaben, i da beg rendegien Mesias ademu. 21I ogo, i gina le gor lundielang, i dandon le gor lundielang mabenan longu masi houen na gmehere, dege Jehova i gin boharni le bohosu Provet aden Helian. 22Mose gin bai nandugien: Jehova, Ndorlaben adu, beg rendegien hom Provet, i homo adu ge, i manden dege io, delengamu le nongen aden, hirong nongen aden ge. 23Homo ma homo i de delengan le nongen ad Provet ogo bui i gina momen gane, su gdaii i. 24-25Dagara su Provet mabosanged, ber goru, Samuel, ma su Provet muren, su gin boharni gle rang ogo, i da beg meher, mu ndursu Provet, nongen ad Ndorlaben Jehova le ndro su damdu ber goru, i nongen adu, dege Abraham gin bai: Homo ademu ber muren i da gob hian ge le ndro su gor masi ber boan. 26I ogo i gin meher hanu le ndro mu, Jehova gin rendegien i, beg hengen ndro mu, homo ma homo garbelueni bern aden gle houen.

Currently Selected:

Apostel 3: LLENT

Highlight

Copy