Apostel 2

Penticost.

1Rang i gin me, su bosoui Pentikost, su da gin me goure, beg lodu. 2Malabo ngasen manden ber lang gin meher, aga dege ior manden mandromai i da ngoh. I gina le lundieum, su do da ri. 3Germen ber moan i gin mbsig le ndro su, moan mandehe i da iad le horo ma le horo i lugdo ndre borbalsu. 4Meluan Helian gin meher ndro su, bergolsu gina beb leri, malabo su da bosoui nongen ber gor masi homo ma homo, dege Meluan gin boharni le ndro su. 5Le rang ogo, su Juda ber gor masigane su da gin me goure le gor Jerusalem, su da voaniso nongen ad Jehova. 6Be su gin hirong ngasen ogo, meluasu masi i ieb. Su hilou me goure, su hirong nongen asu ber gor manan. 7Be su gin hirong i, meluasu i ieb, su vong, su boi: Su masi gorbo ber Galilea de bui? 8Derbe, iou da hirong nongen asu, aga nongen adu ber gor adu. 9Iou ber Parta, iou ber Media, iou ber Elam, iou ber Mesopotamia, iou ber Judea, iou ber Kapadosia, iou ber Pontus, iou ber Asia mandehe, 10iou ber Vrigia, iou ber Pamvilia, iou ber Egipten, iou ber Libia i da baghege le Kirene, ma iou ber Rom. 11Su Juda, ma su Haiden lie, su da gin ibdi lodu asu Juda, su Kreta, ma su Arabia, iou masigane iou hirong nongen adu, su da bosoui longu ber lang ad Jehova me ndro du. 12De dansu i bui, aga derbe, meluasu masi i ieb, homo i ndemani homo: Aga i vonei sa? 13Su holel su hal, su vong, su boi: Su rungui, ndrnesu i beb le ndrunvain.

Boharni ad Petrus.

14Malabo Petrus ma su masongul e homo su dne, Petrus i vong le ngasen ndoun le ndro su, i boi: Mu gamel ber Juda, mu masigane mu do da le gor Jerusalem, delengamu le nongen ordo, io beg bosoui heb nongen le ndro mu. 15Su gamel ogo, su de gin ilmui ndrunvain bui, dege mu da hanguruen i, malabo mabing ge. 16Aga longu, Provet Joel gin hondre nandugian: 17Jehova i boi: Rang na gmeher, io beg daui Meluo gle ndro su ndramed ber boan, su ndurgamel ma su ndurbihin ademu su gobharni, su ulhou dansu ilndri gelman, su hibermanda su inhini gle longu ber lang. 18Io beg daui Meluo gle ndro su lao dandendegei ordo, gle ndro su bihilou ordo, su gobharni. 19Io bo gelman le lang, ma gelman gle boan, gelman gle ndrai, gle moan, ma gle gusmoan. 20Mernal na ge ndrogum, mbul na ge ndrai, boen rang ad Ndorlaben na gmehere, rang aden manden mandromai. 21Boen, homo ma homo, i geloh ngarn ad Ndorlaben, i horuan mamaren ge.

22Mu gamel ber Israel, ha hirong nongen ordo: Jesu ber Nasaret, hom gamel, Jehova gin rendegien i, i da gin hinen gelman manden, longu ndoun le dogromu masi, danmu leri, mu gin ilndri. 23Gamel ogo su gin hevani le ndro mu, dege Jehova i gin bai nandugian. Mu gin daui i le nemesu Haiden, mu gin dadhe i le gei, mu gin dieni i, i ginmad. 24Jehova gin hingeni i le ngad, ngaibad de danen hosi i bui, i gin rumburdi i, i mamaren lie. 25David i gin bai le aden: Io gin ilndri Ndorlaben, sidesi begmoro i ilndri i, i da le nemo sengen, io de los bui. 26Io mugmug ge germo i da ngei, mondro i da hengang ge, ir belengen i. 27Meluo i da le gor ndrogum bui, uo mbuerem lao adem Helian mandrn i borah. 28Uo gin bosilieni me ndro io sal adem hian, io mamaren gleri, io mugmug ge, bergolo i beb gleri le bormarm. 29Mu ndere hian io bosoui le ndro mu longu le damdu David: I ginmad, su gin doni i le ngad dandu ngaibad aden, i da le gor adu malabo lie. 30I hom Provet i danen nongen ad Jehova, i da gin vong le ndro i, gin daui nemen le belengan, i gin bai le ndro i: Hom ndurn ber muren i da le logna King. 31I da gin ilndri longu ber muren, i gin bosoui longu ad Mesias, i da gedne lie bersi muren, mandern de danen borah bui. 32Aga Jesu, Jehova gin hingeni i le ngad, i gin ndne lie, aga dandu i, aga iou boharni. 33Be nemen ad Jehova gin rui i le belengan lie, i gin daui Meluan Helian, Damen gin hengen le ndro i, le bergoldu ogo, dege mu ilndri, dege mu hirong i. 34David i de gin voh le gor lundielang dege i bui. I ge, i gin hondre: Ndorlaben i gin boi le ndro Ndorlaben ordo: E lugdo im logna gle nemo sengen. 35Io beg ndounen su ndremda rah adem, beg bieni su gle ndegem. 36Su masi ber Israel, su ghanguruen i malabo, Jehova i gin hinen Jesu, mu da gin dadhe i le gei, gle Mesias, gle Ndorlaben ge.

37Be su gin hirong nongen ogo, i gina le bergolsu gane, su ndemani Petrus ma su Apostel, su vong, su boi: Mu ndere hian, iou gob sa malabo? 38Petrus i bodeie: Garbelueni bern ademu, boen mu gme, su gsurhi mu, homo ma homo le ngarn ad Jesu Kristo, boen i esbui longu ademu momen giao. Muren Meluan Helian i gmeher ndro mu lie, Ndorlaben i ghengen i le ndro mu. 39Nongen ad Joel gle ndro mu, ma gle ndro su ndurmu, ma le ndro su masigane su da manan ge. Jehova gin loh su, Ndorlaben i ha lengi i, su gmeher ndro i. 40I da gin bosoui nongen ogo, ma nongen mabosanged, hendre a hendre le ndro su, i soling ndro su: E. bieni bern asu gor masi. 41Su da gin somui le nongen aden su gin me, su gin surhi su, su madilbou su lao ad Jehova, su da le lodu ad Jesu.

Heb nongen le su lao ad Jesu ber lodu houen

42Su da gin me goure, delengasu le nongen asu Apostel, su da gin hirong nongen ad Jesu, su da gin ien gan ber lang, su da me goure le raring. 43Su ndramed ber gor masi noh asu dsoln, be su gin ilndri gelman manden, ma longu ber lang, su Apostel ber Jerusalem gin hinen i. 44Ndangen su noh asu. Su da gin boro ndoui ad Jesu su da gin me goure sidesi, golsuisden homo ma homo, memrad asu le ndro homo ma homo. 45Su gin semani beleng asu, ma memrad asu, su gin daui moni gle memrad asu le ndro su lao ad Jesu, su semani gan le ndro su. 46Bing si e rang si, su da gina le um ad Jehova, delengasu le nongen ad Ndorlaben. Sidesi su da gin ien gan Helian ad Jesu Kristo. Be su gin ien gan ansu, su gin bamugueni Jehova leri, bergolsu gin bamugueni Jehova. 47Su ndramed ber gor golnisden su. Bing si e rang si su holel gin meher su gin hondre ngarsu le bug ber lodu ad Jesu.

Currently Selected:

Apostel 2: LLENT

Highlight

Copy