Markus 9

1Antua bale bilang par dong lai kata, “Dengar bae-bae tagal apa yang Beta bilang ni batul! Dari kamong samua yang ada di sini, ada satu dua orang yang nanti balong mati sampe dong lia Allah pegang parenta jadi Raja deng Antua pung kuasa.”

Yesus pung murid-murid lia Antua pung kuasa yang hebat di atas gunung

9:2-13

(Matius 17:1-13; Lukas 9:28-36)

2Abis itu, lewat anam hari, Yesus bawa Petrus, Yakobis, deng Yohanis ka gunung tinggi satu. Di situ seng ada orang laeng, cuma dong ampa sa. Waktu itu, dong lia Antua pung rupa jadi laeng. 3Antua pung pakiang jadi paleng puti mangkilat-mangkilat. Seng ada satu orang lai di dunya ni yang bisa kura pakiang sampe puti macang bagitu. 4Skrek bagini, dong tiga dapa lia Allah pung Juru Bicara Elia deng Musa ada bicara deng Antua.

5La Petrus bilang par Antua kata, “Tuang Guru e, katong paleng sanang ada di sini. Bagemana kalo katong biking walang tiga bua di sini? Satu par Tuang Guru, satu par Musa, deng satu lai par Elia.” 6Dia bilang bagitu tagal dia seng tau mau bilang apa lai, barang dong tiga paleng takotang.

7Tarus, ada awang datang tutu dong la ada suara dari dalang awang tu kata, “Ini ni Beta pung Ana yang Beta paleng sayang. Kamong musti dengar Dia!”#Matius 3:17; Markus 1:11; Lukas 3:22; 2 Petrus 1:17-18 8Skrek bagini, waktu dong lia kiri-kanang, dong seng lia satu orang lai, cuma Yesus sandiri sa.

9Waktu dong turung dari gunung tu, Yesus pasáng par dong kata, “Jang carita apa yang kamong lia tadi tu par sapa-sapa! Tunggu sampe Beta Ana Manusia ni hidop kombali dari kamatiang do!” 10La dong pegang dong pung janji tu. Mar, dong tiga sandiri ada baku bicara soal apa yang Antua maksud deng hidop kombali dari kamatiang tu.

11Tarus dong tanya Antua kata, “Tuang Guru e! Kalo Tuang Guru su datang jadi Orang yang Allah su Angka par Kasi Salamat Manusia, la mana Elia? Barang, guru-guru Torat bilang kata Elia musti datang kamuka do baru Orang yang Allah su Angka par Kasi Salamat Manusia tu.”#Malaki 4:5; Matius 11:14

12La Yesus jawab dong kata, “Memang batul, Elia datang kamuka par biking samua-samua jadi bae kombali do. La bagemana deng Allah pung Tulisang yang bilang kata Beta Ana Manusia ni musti sangsara deng seng dapa tarima? 13Mar dengar Beta bilang par kamong: Elia memang su datang la orang-orang biking dia iko dong pung suka, sama deng apa yang su tatulis soal dia.”#9:13 Yang Yesus maksud deng Elia di sini ni, Yohanis Tukang Baptis yang dapa susa deng sangsara (Markus 6:14-29), sama deng apa yang Allah pung Juru Bicara Elia dapa waktu jamang Raja Ahab (1 Raja-Raja 19:2, 10).

Yesus user setang dari ana satu yang takanal

9:14-29

(Matius 17:14-21; Lukas 9:37-43)

14Waktu Yesus deng Antua pung murid tiga tu bale par murid-murid yang laeng, dong lia bagini, ada orang banya koliling murid-murid tu la guru Torat satu dua orang ada baku soal jawab deng dong. 15Waktu orang banya tu lia Yesus, dong samua langsung taherang-herang la paparipi pi baku dapa Antua. 16La Antua tanya dong kata, “Kamong baku soal jawab apa deng guru-guru Torat tu?”

17Tarus satu dari orang banya tu bilang par Antua kata, “Sio Tuang Guru e, beta bawa beta pung ana ni par Tuang Guru tagal dia ada takanal. Setang yang ada dalang dia tu biking sampe dia jadi bisu. 18Sabang kali dia takanal, dia tabanting ka tana. Skoim kaluar dari dia pung mulu, dia mama gigi, deng dia pung badang takancing. Beta su minta Tuang Guru pung murid-murid par user akang, mar dong seng bisa.”

19La Antua bilang par dong kata, “Hoe, kamong manusia jamang sakarang yang tar parcaya Allah e! Sampe apa tempo Beta musti tinggal deng kamong? Sampe apa tempo Beta musti sabar deng kamong?” Abis itu, Yesus bilang par ana tu pung bapa kata, “Bawa ana tu kamari!”

20La dong bawa ana yang takanal tu par Antua. Waktu setang yang ada dalang ana tu lia Antua, akang goyang-goyang dia la dia tabanting ka tana. Dia taguling-guling deng skoim kaluar dari dia pung mulu. 21La Antua tanya dia pung bapa kata, “Dia su macang bagini dari apa tempo?”

La dia pung bapa bilang kata, “Dari masi kacil lai Tuang Guru e! 22Setang tu jaga hela dia ka dalang api kalo seng ka dalang aer par bunu dia. Jadi kalo Tuang Guru bisa tolong katong, kasi unju Tuang Guru pung hati bae par katong jua.”

23La Antua bilang par ana tu pung bapa kata, “Ale bilang, ‘Kalo Beta bisa?’ Apa sa bisa, asal parcaya Beta!”

24Ana tu pung bapa langsung bataria kata, “Tuang Guru e, beta parcaya! Tolong beta biar labe tamba parcaya jua.”

25Waktu Antua lia orang banya su mulai manggurebe datang bakumpul, Antua hokmat setang yang ada dalang ana tu kata, “He setang yang biking ana ni bisu deng tuli! Beta parenta se par kaluar dari dia la jang maso dalang dia lai!”

26Tarus, setang yang ada dalang ana tu biking dia gamatar sampe tagoyang-goyang la kaluar dari dia bataria-bataria. Ana tu lia macang deng orang mati sampe orang banya tu bilang kata, “He, dia su mati!”

27Mar, Antua pegang dia pung tangang par kasi badiri dia la dia badiri.

28Waktu Antua deng Antua pung murid-murid ada sandiri di ruma satu, dong tanya Antua kata, “Tuang Guru e, mangapa kong katong seng bisa user setang tu?”

29Antua bilang par dong kata, “Kamong bisa user setang macang bagitu tu cuma deng sombayang.”

Yesus kasi tau par kali kadua kalo Antua nanti dapa bunu

9:30-32

(Matius 17:22-23; Lukas 9:43-45)

30Yesus deng Antua pung murid-murid pi dari tampa tu la dong bajalang lewat propinsi Galilea. Antua seng mau sapa sa tau kata dong ada di mana, 31tagal Antua ada ajar Antua pung murid-murid. Antua bilang par dong kata, “Seng lama lai Beta Ana Manusia ni nanti dapa jual par orang-orang yang pung kuasa, la dong nanti bunu Beta. Mar akang pung tiga hari, Beta nanti hidop kombali.” 32Antua pung murid-murid seng mangarti apa yang Antua bilang tu, mar dong jua taku par tanya akang dari Antua.

Sapa yang paleng basar

9:33-37

(Matius 18:1-5; Lukas 9:46-48)

33Tarus, Yesus deng Antua pung murid-murid sampe di kota Kapernaum. Waktu Antua dong su maso dalang ruma, Antua tanya dong kata, “Tadi kamong baku malawang apa di jalang?”

34Mar dong tado sa tagal di tenga jalang tadi dong ada baku malawang kata sapa dari dong yang paleng basar.#Lukas 22:24 35La Antua dudu la panggel dong sapulu dua tu la bilang kata, “Sapa yang mau jadi yang paleng basar, dia musti biking diri macang deng orang yang paleng kacil dari dia pung tamang-tamang samua deng dia musti tolong samua orang, macang deng orang suru-suru.” #Matius 20:26-27, 23:11; Markus 10:43-44; Lukas 22:26

36Tarus, Antua ambe ana kacil satu la taru dia di tenga-tenga dong. Antua polo dia la bilang par dong kata, 37“Kalo orang yang parcaya Beta tarima satu dari orang-orang yang seng pung arti apapa macang deng ana kacil ni, itu dia su tarima Beta. La sapa yang tarima Beta, itu dia su tarima Allah yang utus Beta.”#Matius 10:40; Lukas 10:16; Yohanis 13:20

Sapa yang satu kalompok deng Yesus

9:38-41

(Lukas 9:49-50)

38Tarus, Yohanis bilang par Yesus kata, “Tuang Guru e, katong lia satu orang user setang deng Tuang Guru pung nama. Katong larang dia tagal dia seng satu kalompok deng katong.”

39Mar Yesus bilang, “Jang larang dia! Tagal seng satu orang lai yang biking tanda herang deng Beta pung nama bisa langsung biking busu Beta pung nama. 40Sapa sa yang seng malawang katong, dia tu satu kalompok deng katong.#Matius 12:30; Lukas 11:23 41Dengar bae-bae tagal apa yang Beta bilang ni batul! Sapa sa yang bantu kamong tagal kamong iko Kristus, biar kata cuma kasi aer puti satu galas sa, Allah pasti nanti balas dia pung bae tu.”#Matius 10:42

Jang biking orang jatu dalang dosa

9:42-50

(Matius 18:6-9; Lukas 17:1-2)

42Yesus bilang lai, “Sapa sa yang biking sampe satu dari anana kacil#9:42 Yang Yesus maksud deng anana kacil tu, “samua orang parcaya”. yang parcaya Beta ni jatu dalang dosa, dia nanti dapa hukum barát dari Allah. Masi labe bae par dia kalo dia pung leher dapa ika deng batu basar la dapa lempar dalang aer masing daripada dia biking bagitu. 43Jadi, kalo kamong pung tangang biking kamong bardosa, potong akang! Tagal labe bae kamong maso sorga deng tangang sabala, daripada musti dapa buang deng tangang dua-dua dalang naraka, tampa api manyala tarus-tarus.#Matius 5:30 44[Di sana akang pung ulat seng parna mati deng akang pung api jua seng parna mati.] 45Kalo kamong pung kaki biking kamong bardosa, potong akang! Tagal labe bae kamong maso sorga deng kaki sabala, daripada musti dapa buang deng kaki dua-dua dalang naraka. 46[Di sana akang pung ulat seng parna mati deng akang pung api jua seng parna mati.] 47Deng kalo kamong pung mata biking kamong bardosa, cungkel akang! Tagal labe bae kamong maso dalang Allah pung Karajaang deng mata sabala, daripada musti dapa buang deng mata dua-dua dalang naraka. 48Di sana akang pung ulat seng parna mati deng akang pung api jua seng parna mati.#Matius 5:29; Yesaya 66:24

49Sama deng orang taru garang di daging binatang yang dong mau kasi korbang par Allah par biking akang jadi barsi,#Imam-Imam pung Atorang 2:13 Allah jua nanti taru susa deng sangsara dalang orang parcaya pung hidop par biking dong jadi barsi.

50Garang tu memang bagus, mar kalo akang su tawar, kamong mau kasi asing akang deng apa lai? Tagal itu, kamong musti jadi conto yang bae par dunya ni, macang deng garang yang orang taru biar daging seng busu. Kamong jua musti hidop dame satu deng laeng.”#Matius 5:13; Lukas 14:34-35

Currently Selected:

Markus 9: ABMA

Highlight

Copy